قۋانتىروۆ تەڭگەنىڭ 30 جىلدا 56 ەسە قۇنسىزدانۋىنا بايلانىستى پىكىر ءبىلدىردى
ۇلتتىق ەكونوميكا ءمينيسترى الىبەك قۋانتىروۆ ۇكىمەت وتىرىسىنان كەيىن وتكەن بريفينگىدە تەڭگەنىڭ 30 جىلدا 56 ەسە قۇنسىزدانۋىنا بايلانىستى پىكىر ءبىلدىردى، دەپ حابارلايدى Kazinform.
«بۇگىن - ۇلتتىق ۆاليۋتا كۇنى. ۇلتتىق ۆاليۋتامىزدىڭ ەنگىزىلگەنىنە 30 جىل بولدى. تەڭگە قولدانىسقا ەنگىزىلگەننەن بەرى 56 ەسە قۇنسىزدانىپتى. ونىڭ كەلەشەگى تۋرالى نە ايتاسىز؟ ءالى دە قۇنسىزدانا بەرە مە، الدە تەڭگە نىعاياتىنداي فاكتورلار پايدا بولىپ كەلە جاتىر ما؟»،- دەپ سۇرادى جۋرناليست.
ءمينيستردىڭ سوزىنشە، تەڭگە باعامىنا الداعى ءۇش جىلدىڭ بەدەرىندە عانا بولجام ايتۋعا بولادى.
«تەڭگە قۇنىنا بايلانىستى بولجامعا كەلسەك، ءۇش جىلدىق بيۋدجەتتە ونى 460 تەڭگە دەڭگەيىندە بەلگىلەدىك. جالپى تەڭگە قۇنى تۇراقتى بولادى دەپ بولجاپ وتىرمىز»، - دەدى الىبەك قۋانتىروۆ.
ب ا ق وكىلى رەسەي ءرۋبلىنىڭ قۇبىلۋى، سانكتسيالاردىڭ سالقىنى بۇل بولجامدى قانشالىقتى وزگەرتۋگە قاۋقارلى ەكەنىن سۇرادى.
«بىلتىر ءسىز ايتىپ وتىرعان گەوساياسي جاعداي پايدا بولعاندا ءبىز بيۋدجەتتى ناقتىلاپ، قايتا باعدارلادىق. سەبەبى ماكروەونوميكاداعى سىرتقى فاكتورلار بىزگە اسەر ەتتى. ياعني، بيۋدجەتكە ءتيىستى وزگەرىستەر ەنگىزدىك. سودان كەيىن الەۋمەتتىك- ەكونوميكالىق دامۋدىڭ 5 جىلدىق بولجامىنا دا ءتيىستى تۇزەتۋ جاسادىق. دەمەك، ونداي قۇقىعىمىز بار. كەرەك بولىپ جاتسا، تاعى ىستەيمىز. وعان قاجەت رەزەرۆىمىز بار»، - دەدى ۇلتتىق ەكونوميكا ءمينيسترى.
