قۋاندىق بيشىمبايەۆ سوتتا س. نۇكەنوۆانىڭ تۋىستارىنان كەشىرىم سۇرادى

«شىن مانىندە ماعان ءسوز سويلەۋ وتە قيىن. مەن تۇسىنەم جانە ەشقانداي كەشىرىمنەن ۇمىتتەنبەيمىن. ءبىراق بۇل - مەنىڭ ادامدىق بورىشىم. مىنا جەردە جابىرلەنۋشىلەر، ونىڭ (س. نۇكەنوۆا - رەد. ) تۋىستارى، اتا-اناسى وتىر. شىنىمدى ايتسام، العاشىندا ونىڭ ءولىمىن وي-ساناممەن قابىلداۋ قيىن بولدى، - دەپ باستادى ول. - كەشىرىم سۇراعىم كەلەدى. مەن ەشقانداي كەشىرىمنەن دامەتپەيمىن. ءبىراق بۇل - مەنىڭ ىشكى مىندەتىم، جان-دۇنيەمنىڭ ۇندەۋى. مەن بۇل جوعالتۋدىڭ سالماعىن باعامدايمىن جانە وعان قاتىسىم بار ەكەنىن تۇسىنەمىن. ءبىرىنشى ايتقىم كەلەتىنى وسى».

سونداي-اق، ول وزىنە تاعىلعان ايىپتى نەگە ءىشىنارا عانا مويىندايتىنىن ءتۇسىندىردى.

«ەكىنشىدەن، قۇرمەتتى القابيلەر، مەنىڭ كىنالى ەمەس ەكەنىمدى، كىنامدى مويىندامايتىنىمدى ايتا وتىرىپ مىنانى تۇسىندىرگىم كەلەدى. قۇرمەتتى، سوت، پروتسەسكە قاتىسۋشىلار، مەن ءوزىمدى جۇبايىم سالتاناتتى اسقان قاتىگەزدىكپەن سانالى تۇردە ويلاستىرىپ ءولتىردى دەگەن ايىپتى مويىندامايمىن»، - دەدى قۋاندىق بيشىمبايەۆ.

ەسكە سالساق، 2023 -جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى. مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

وتكەن جىلى 15-قاراشادا وتكەن كەڭەستە مەملەكەت باسشىسى قاسىم-جومارت توقايەۆ ىشكى ىستەر مينيسترىنە ق. بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.

بيىل 11-قاڭتاردا ەلوردا سوتى قۋاندىق بيشىمبايەۆتى كۇزەتپەن ۇستاۋ مەرزىمىن 2 ايعا ۇزارتقان ەدى، 26-اقپاندا قۋاندىق بيشىمبايەۆتىڭ ءىسى سوتقا ءتۇستى.

1-ناۋرىزدا قۋاندىق بيشىمبايەۆتىڭ ءىسى بويىنشا الدىن الا تىڭداۋ كۇنى بەلگىلەندى. 11-ناۋرىز كۇنى استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءىس بويىنشا الدىن الا تىڭداۋ ءوتتى. الدىن الا تىڭداۋ 12-ناۋرىزدا جالعاستى.

27-ناۋرىزدا ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق. بيشىمبايەۆتىڭ ءىسى بويىنشا القابيلەردى ىرىكتەۋ ءوتتى.

29-ناۋرىزداعى سوت وتىرىسىندا مارقۇم سالتانات نۇكەنوۆانىڭ اعاسى ايتبەك امانگەلدى كۋاگەر رەتىندە جاۋاپ بەرىپ، قۋاندىق بيشىمبايەۆ پەن سالتانات نۇكەنوۆانىڭ اراسىنداعى العاشقى ۇرىس-كەرىستەر قالاي باستالعانى تۋرالى مالىمەتتەر ايتتى جانە مارقۇمنىڭ بەت-الپەتى كوگەرگەن سۋرەت كورسەتتى.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى