قۋاندىق بيشىمبايەۆ سوتقا شاعىم ءتۇسىردى
استانا. قازاقپارات - 24 جىلعا سوتتالعان ەكس- شەنەۋنىك قۋاندىق بيشىمبايەۆ قاماۋدا وتىرعان مەكەمە وزىنە ىنتالاندىرۋ شارالارىن قولدانباعانى ءۇشىن سوتقا شاعىمداندى. بۇل تۋرالى ىشكى ىستەر مينيسترلىگى قىلمىستىق-اتقارۋ جۇيەسى كوميتەتىنەن حابارلايدى.
- جازاسىن وتەۋشى سوتقا مەكەمە اكىمشىلىگى وعان كوتەرمەلەۋ بەرمەيدى دەگەن وتىنىشپەن جۇگىندى. قولدانىستاعى زاڭناماعا سايكەس، سوتتالعاندارعا جازانى وتەۋ ءتارتىبى بۇزىلعان جاعدايدا كوتەرمەلەۋ قولدانىلمايدى. اتالعان سوتتالعان ادامنىڭ ءبىر رەت ءتارتىپ بۇزعانىن ەسكەرە وتىرىپ، وعان كوتەرمەلەۋ بولمايدى، - دەلىنگەن كوميتەتتىڭ باسپاءسوز قىزمەتى تاراتقان حابارلامادا.
وسىلايشا سوت قۋاندىق بيشىمبايەۆتىڭ ارىزىن قاناعاتتاندىرمادى.
ەسكە سالا كەتەيىك، ازاماتتىق نەكەدە بولعان ايەلىن ولتىرگەنى ءۇشىن قۋاندىق بيشىمبايەۆ 24 جىلعا سوتتالدى.
