قالجىڭدايمىن دەپ ايىپپۇل ارقالاماڭىز: ءى ءى م ەسكەرتۋ جاسادى

ۆەدومستۆو مالىمەتىنشە، قازىر ادام كوپ جينالاتىن جەرلەردە، سونىڭ ىشىندە اۋەجايلار مەن تەمىرجول ۆوكزالدارىندا جارىلعىش زات قويىلعانى تۋرالى جالعان حابارلامالار جيىلەگەن.

جىل باسىنان بەرى انىقتالعان بارلىق دەرەك بويىنشا سوتالدى تەرگەۋ جۇرگىزىلگەن.

«جالعان جارىلعىش زات تۋرالى حابارلامالاردىڭ سەبەپتەرى ءارتۇرلى. كەيبىرەۋلەر بۇل ارەكەتتى ادەيى بۇزاقىلىق رەتىندە جاساسا، ەندى بىرەۋلەرى جاۋاپسىز ءازىل نەمەسە جەڭىل ويلىلىقتىڭ سالدارىنان ىستەيدى. ماسەلەن، كەيبىر جولاۋشىلار اۋەجاي قاۋىپسىزدىك قىزمەتكەرلەرىنىڭ «قول جۇگىڭىزدە نە بار؟» دەگەن سۇراعىنا قالجىڭداپ، «بومبا» نەمەسە «گراناتا» دەپ جاۋاپ بەرەدى. وسىنداي ازىلدەر ۇلكەن شىعىندارعا اكەلەدى. قۇقىق قورعاۋ ورگاندارى بارلىق شۇعىل قىزمەتتى دابىل بويىنشا كوتەرەدى، نىسانداردى قورشاپ، ادامداردى ەۆاكۋاتسيالايدى، كىرەبەرىس جولداردى جابادى، رەيستەردى توقتاتادى نەمەسە كەشىكتىرەدى. بۇل جاعداي اۋەجايلار مەن تەمىرجول ۆوكزالدارىنىڭ جۇمىسىن تولىقتاي بۇعاتتاۋعا دەيىن جەتكىزەدى»، - دەپ ەسكەرتتى پوليتسيا.

8-جەلتوقساندا الماتى اۋەجايىندا 18 جاستاعى ازامات ۇشۋعا دايىندالىپ جاتقان جولاۋشىنى شىعارىپ سالۋ بارىسىندا اۋە كومپانيا قىزمەتكەرىنىڭ «تىيىم سالىنعان زاتتارىڭىز بار ما؟» دەگەن سۇراعىنا قالجىڭداپ، «پيستولەت بار» دەپ جاۋاپ بەرگەن.

«اقپارات راستالمادى، ءبىراق مۇنداي ءازىل قوعامدا جاۋاپكەرشىلىك تومەندىگىن كورسەتەدى. كوبىنە جولاۋشىلار مۇنداي ارەكەتتەرى ءۇشىن قاتاڭ جازالاناتىنىن بىلمەيدى. ءبىراق سوتتا بارلىعى ءوز قاتەلەرىن مويىنداپ، وكىنىش بىلدىرەدى»، - دەدى پوليتسيا.

تەرروريزم اكتىسى تۋرالى جالعان حابارلاما تاراتقاندار ءۇشىن قازاقستان رەسپۋبليكاسىنىڭ زاڭناماسىندا 5000 ا ە ك كولەمىندە ايىپپۇلدان باستاپ، 5 جىلعا دەيىن باس بوستاندىعىنان ايىرۋ جازاسى قاراستىرىلعان.

مۇنداي ارەكەتتەر ءۇشىن قىلمىستىق جاۋاپكەرشىلىك 14 جاستان باستاپ قولدانىلادى.

سونىمەن قاتار جالعان حابارلاما جاساعان ازاماتتار وقيعا ورنىنا جەدەل شاقىرىلعان قىزمەتتەردىڭ شىعىنىن تولىعىمەن وتەۋگە ءتيىس.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى