قادىر ءتۇنى: نۇرلان يمام Jibek joly تەلەارناسىندا تىكەلەي ەفير وتكىزەدى
استانا. قازاقپارات - Jibek joly تەلەارناسىندا «جۇرەك ءسوزى» باعدارلاماسىنىڭ قادىر تۇنىنە ارنالعان شىعارىلىمى تىكەلەي ەفيردە كورسەتىلەدى.
نۇرلان بايجىگىت ۇلى (نۇرلان يمام) جۇرگىزەتىن «جۇرەك ءسوزى» باعدارلاماسى ءار سارسەنبى سايىن 11:10 دا Jibek joly تەلەارناسىندا كورسەتىلىپ كەلەدى. وندا ادامگەرشىلىك، يماندىلىق، ۇلكەن مەن كىشىنىڭ سىيلاستىعى، ىزەت-يناباتى ءتارىزدى ماڭىزدى ماسەلەلەر تالقىلانادى. بۇگىنگى ارنايى شىعارىلىم «قايىرى مول قادىر ءتۇنى» دەپ اتالادى.
- رامازان ايىنىڭ قاسيەتتى بولۋىنىڭ ەرەكشەلىكتەرىنىڭ ءبىرى - قادىر تۇنىندە تاعدىردىڭ جازىلۋى. مىڭ ايدان دا قايىرلى سانالاتىن بۇل ەرەكشە ءتۇندى قالاي قارسى الۋ كەرەك؟ قانداي امالدار جاساعان ءجون؟ بۇگىن 23:00 دە تىكەلەي ەفيردە نۇرلان يماممەن «جۇرەك ءسوزى» باعدارلاماسىن وتكىزىپ الماڭىز، - دەپ جازىلعان Jibek joly تەلەارناسىنىڭ Instagram پاراقشاسىندا.
تىكەلەي ەفير ساعات 23:00 دەن 00:00 گە دەيىن وتەدى. وندا كورەرمەندەر 87172954074 بايلانىس ءنومىرى نەمەسە ەكرانداعى QR- كود ارقىلى ورازا، قادىر تۇنىنە بايلانىستى ءوز ساۋالدارىن جولداي الادى.
ەسكە سالا كەتسەك، بۇگىن 26-ناۋرىزدان 27-ناۋرىزعا قاراعان ءتۇن - قادىر ءتۇنى. قادىر كەشىنىڭ ۋاقىتى كۇن باتقاننان سارەسىگە دەيىن جالعاسادى. بۇل ءتۇننىڭ عيباداتتارىن مۇسىلماندار مەشىتتەردە دە، ءوز ۇيلەرىندە دە اتقارا الادى.
سونداي-اق، Kazinform اگەنتتىگى رامازان ايىنا قاتىستى نەگىزگى ۇستانىمداردى كوپشىلىك نازارىنا ۇسىنعان ەدى.
