قابىلدانعان زاڭ اياسىندا حالىقتىڭ قارىزى ەداۋىر ازايادى - ءماجىلىس ءتوراعاسى
استانا. KAZINFORM - ءماجىلىس ءتوراعاسى ەرلان قوشانوۆ پالاتا وتىرىسىندا قابىلدانعان قارىز الۋشىلاردىڭ قۇقىقتارىن قورعاۋ ماسەلەسىنە ارنالعان زاڭعا قاتىستى تۇسىنىك بەردى.
«بۇگىن وتە ماڭىزدى ءارى قاجەت زاڭدى قابىلدادىق. شىنىمەن دە كەيىنگى كەزدەرى شامادان تىس كرەديت الۋ حالىقتىڭ ىشىندە ۇلكەن پروبلەماعا اينالىپ وتىر. مەملەكەت باسشىسى بۇل ماسەلەگە الاڭدايتىنىن بىرنەشە مارتە ايتقان ەدى. پرەزيدەنت جولداۋىندا ناقتى تاپسىرما دا بەرىلدى. بۇل تۇرعىدا دەپۋتاتتار وسى زاڭدى ازىرلەدى»، - دەدى ە. قوشانوۆ ءماجىلىستىڭ جالپى وتىرىسىندا.
ونىڭ ايتۋىنشا، اتالعان قۇجاتتا ازاماتتاردىڭ قارجىلىق پروبلەمالارى تۋرالى كوتەرگەن ۇسىنىستارى ەنگىزىلگەن.
«وسى زاڭدا قاراستىرىلعان جاڭا نورمالار قازاقستاندىقتاردىڭ قارىزعا باتۋىنىڭ الدىن الۋعا جاعداي جاسايدى. سونىمەن قاتار، ادامداردى كوللەكتورلاردىڭ دورەكى ءىس- ارەكەتتەرىنەن قورعايدى. جالپى العاندا، قابىلدانعان زاڭ حالىق اراسىندا قارىز كولەمىنىڭ ەداۋىر ازايۋىنا سەپتىگىن تيگىزەتىنىنە سەنىمدىمىز. ازاماتتارىمىزدىڭ الەۋمەتتىك جاعدايىن جاقسارتىپ، ولارعا قارجىلىق ەركىندىك پەن سەنىمدىلىك بەرەتىنى ءسوزسىز»،- دەدى ءماجىلىس ءتوراعاسى.
بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالىپ، قابىلداندى.
