ق ر پرەزيدەنتىنىڭ تەلەراديوكەشەنى مەن AlJazeera ەكىنشى بىرلەسكەن جوبانى قولعا الدى
استانا. KAZINFORM – ق ر پرەزيدەنتىنىڭ تەلەراديوكەشەنى مەن Al Jazeera Media Network ىنتىماقتاستىق تۋرالى مەموراندۋم بويىنشا جۇمىستى جالعاستىرۋدا.
2024 -جىلدىڭ اقپان ايىندا ق ر پرەزيدەنتى قاسىم-جومارت توقايەۆتىڭ قاتار ەلىنە مەملەكەتتىك ساپارى شەڭبەرىندە ءتيىستى قۇجاتقا قول قويىلدى.
بۇعان دەيىن قوس مەديا- كومپانيانىڭ العاشقى بىرلەسكەن قادامى - «Al Jazeera-مەن ءبىر اپتا» جوباسى جۇزەگە اسقان بولاتىن. 2024 -جىلى ءساۋىر ايىندا Maqsut Narikbayev University حالىقارالىق جۋرناليستيكا مەكتەبىنىڭ 100-دەن استام ستۋدەنتى الەمدىك دەڭگەيدەگى جۋرناليستەر مەن وقىتۋشىلاردان 1 اپتا ءدارىس تىڭدادى.
سونداي-اق جوبا اياسىندا Al Jazeera-نىڭ بىلىكتى ماماندارى، Al Jazeera Media Network باس ديرەكتورى موستەفا سۋاگا قازاقستاندىق جۋرناليستەر مەن مەديا سالاسىنىڭ وكىلدەرى ءۇشىن 4 كوپشىلىك ءدارىس وتكىزدى.
ىنتىماقتاستىق تۋرالى مەموراندۋمدى جۇزەگە اسىرۋداعى كەلەسى پراكتيكالىق قادام – ق ر پرەزيدەنتىنىڭ تەلەراديوكەشەنى جۋرناليستەرىن Al Jazeera مەديا- ينستيتۋتىندا وقىتۋ. جاقىن ارادا دوحاداعى Al Jazeera Media Network فيليالدارىندا قازاقستاندىق جۋرناليستەرگە ارنالعان جەكە كۇندىزگى وقىتۋ باعدارلاماسى ۇيىمداستىرىلادى.
ق ر پرەزيدەنتىنىڭ تەلەراديوكەشەنى ديرەكتورى راۋشان قاجىبايەۆا مەن Al Jazeera Media Network باس ديرەكتورى موستەفا سۋاگانىڭ كەزدەسۋى بارىسىندا وقۋ باعدارلاماسى ەگجەي-تەگجەيلى تالقىلاندى.
- Al Jazeera - الەمدەگى سالماعى باسىم ب ا ق. كومپانيالار اراسىنداعى سەرپىندى دامۋ وتاندىق مەديانىڭ وركەندەۋىنە جانە تەلەارنالاردىڭ كاسىبي ورىستەۋىنە ىقپال ەتەدى، - دەدى راۋشان قاجىبايەۆا.
- وقۋعا جىبەرىلگەن بارلىق جۋرناليست اعىلشىن ءتىلىن كاسىبي دەڭگەيدە مەڭگەرگەن، IELTS دەڭگەيى 6.5-تەن كەم ەمەس. بارلىق ارىپتەس ەلگە ورالعان سوڭ ق ر پرەزيدەنتىنىڭ تەلەراديوكەشەنىندەگى قىزمەتىن جالعاستىرادى، - دەپ قوستى قازاقستاندىق مەدياحولدينگ باسشىسى.
ايتا كەتەيىك، ق ر پرەزيدەنتىنىڭ تەلەراديوكەشەنى جۋرناليستەرىنىڭ Al Jazeera Media Institute بازاسىندا ءبىلىم الۋى - كومپانيالاردىڭ قازاقستاندىق جۋرناليستيكا سالاسىنىڭ كاسىبي قۇزىرەتىن ىلگەرىلەتۋگە باعىتتالعان ەكىنشى ماڭىزدى جوباسى.
قازاقستاندىق جۋرناليستيكانىڭ كاسىبي قۇزىرەتتىلىگىن دامىتۋعا باعىتتالعان بىرلەسكەن جوبالار سەرياسى كەلەسى جىلى دا جالعاسپاق. تاراپتار 2025 -جىلدىڭ ءساۋىر ايىندا استانادا ەكىنشى Al Jazeera اپتالىعىن وتكىزۋگە كەلىستى. قاتار مەديا- كورپوراتسياسىنىڭ ماماندارى MNU حالىقارالىق جۋرناليستيكا مەكتەبىنىڭ ستۋدەنتتەرى ءۇشىن ءبىرقاتار شەبەرلىك ساباقتارى مەن سەمينارلار وتكىزەدى.
ق ر پرەزيدەنتىنىڭ تەلەراديوكەشەنى قازاقستانداعى ەڭ اۋقىمدى مەديا- كومپانيانىڭ ءبىرى سانالادى.
قۇرامىنا Jibek Joly ،Silk Way ،Silk Way Cinema تەلەارنالارى جانە ەلدەگى ەڭ ەسكى «Kazinform» حالىقارالىق اقپارات اگەنتتىگى مەن دەرەكتى فيلمدەر ورتالىعى كىرەدى.
Al Jazeera Media Network حالىقارالىق تەلەكومپانياسى 1996 -جىلى قاتار ءامىرىنىڭ جارلىعىمەن قۇرىلعان. تەلەكومپانيا اراب، اعىلشىن تىلىندە الەمنىڭ كوپتەگەن ەلىنە حابار تاراتادى، 50-دەن استام شەتەلدىك بيۋروسى بار. كومپانيانىڭ دەرەكتى فيلمدەر كونتەنتى Al Jazeera Documentary تەلەارناسىنان تاراتىلادى.
ەرسىن شامشادين
اۆتور
