ق ر پرەزيدەنتى قورعانىس ءمينيسترى رۋسلان جاقسىلىقوۆتى قابىلدادى
استانا. KAZINFORM - مەملەكەت باسشىسى قورعانىس ءمينيسترى رۋسلان جاقسىلىقوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.
پرەزيدەنت -قارۋلى كۇشتەردىڭ جوعارعى باس قولباسشىسى قاسىم-جومارت توقايەۆقا ارميانىڭ جاۋىنگەرلىك دايىندىعىنىڭ جاي-كۇيى تۋرالى باياندالدى.
رۋسلان جاقسىلىقوۆ اسكەري بولىمشەلەردىڭ جەدەل ءىس-قيمىلدارعا جانە جاۋىنگەرلىك دايىندىعى، باسقارۋ ورگاندارى مەن جەكە قۇرامدى وقىتۋعا باعىتتالعان نەگىزگى كۇش-جىگەر جونىندە ايتتى.
سونىمەن قاتار قارۋلى كۇشتەردىڭ داعدارىس جاعدايىندا، ونىڭ ىشىندە قازىرگىدەي سۋ تاسقىنىنا قارسى كۇرەس كەزىندە ورتالىق جانە جەرگىلىكتى بيلىك ورگاندارىمەن ءتيىمدى بايلانىس ورناتۋى ماڭىزدى ەكەنىنە نازار اۋدارىلدى.
پرەزيدەنتكە قارۋلى كۇشتەردى زاماناۋي تەحنيكامەن جانە قارۋ-جاراقپەن جاراقتاندىرۋ، اۋماقتىق قورعانىس اسكەرلەرىن كۇشەيتۋ، اسكەري ينفراقۇرىلىمدى جەتىلدىرۋ ءىسى جونىندە مالىمەت بەرىلدى. قازاقستاننىڭ ش ى ۇ مەن ۇ ق ش ۇ-عا ءتوراعالىعى اياسىندا 2024 -جىلعا جوسپارلانعان شارالار، سونداي-اق اۋقىمدى وقۋ-جاتتىعۋ جيىندارىن، ونىڭ ىشىندە حالىقارالىق دەڭگەيدەگى ءىس-شارالار وتكىزۋ جايىندا ايتىلدى.
بۇدان بولەك، مەملەكەت باسشىسىنا ۆەدومستۆونىڭ جاۋىنگەرلىك-پاتريوتتىق تاربيە بەرۋ، كوكتەمگى مەرزىمدى اسكەري قىزمەتكە شاقىرۋ، اسكەري قىزمەتشىلەردىڭ الەۋمەتتىك مارتەبەسىن جانە اسكەري قىزمەتتىڭ بەدەلىن ارتتىرۋ جۇمىستارى تۋرالى باياندالدى.
پرەزيدەنت ب ۇ ۇ اياسىندا گولان جوتالارىنداعى قازاقستاندىق بىتىمگەرلىك كونتينگەنت قىزمەتىنىڭ ماڭىزدى ەكەنىن اتاپ ءوتتى.
كەزدەسۋ سوڭىندا قاسىم-جومارت توقايەۆ مينيسترگە قارۋلى كۇشتەردىڭ جاۋىنگەرلىك الەۋەتىن ودان ءارى ارتتىرۋ جونىندە ءبىرقاتار مىندەت جۇكتەدى.
