قىتاي ءتوراعاسى پالەستينا ماسەلەسى بويىنشا حالىقارالىق كونفەرەنسيا شاقىرۋعا ۇندەدى
قىتاي ءتوراعاسى شي جينپيڭ الەم قاۋىمداستىعىن پالەستينا ماسەلەسىن شەشۋ ءۇشىن حالىقارالىق بەيبىتشىلىك كونفەرەنسياسىن شاقىرۋعا شاقىردى.
بۇل تۋرالى ول تاياۋ شىعىس بويىنشا ب ر ي ك س-تىڭ كەزەكتەن تىس ونلاين سامميتىندە ايتتى، دەپ حابارلايدى Kazinform مەنشىكتى ءتىلشىسى ق ح ر سىرتقى ىستەر مينيسترلىگىنە سىلتەمە جاساپ.
«پالەستينا ماسەلەسى ءادىل شەشىلمەيىنشە، تاياۋ شىعىستا تۇراقتى بەيبىتشىلىك پەن قاۋىپسىزدىك بولۋى مۇمكىن ەمەس»، - دەپ كەلتىردى ق ح ر س ءى م شي جينپيڭنىڭ ءسوزىن.
سونداي-اق شي جينپيڭ پالەستينا مەن يزرايل اراسىندا كەيىنگى شيەلەنىس باستالعاننان بەرى قىتاي بەيبىت كەلىسسوزدەر مەن اتىستى توقتاتۋعا بەلسەندى تۇردە ىقپال ەتىپ كەلە جاتقانىن ايتتى. ب ۇ ۇ قاۋىپسىزدىك كەڭەسىنىڭ وسى ايداعى ءتوراعاسى رەتىندە قىتاي گۋمانيتارلىق كومەك پەن دالىزدەر ءۇشىن جاسالاتىن ۇزىلىستەردى ۇزارتۋدى، بەيبىت تۇرعىنداردى قورعاۋدى جانە گۋمانيتارلىق كومەك كورسەتۋدى كوزدەيتىن قاراردىڭ قابىلدانۋىنا ىقپال ەتتى.
21 -قاراشادا ب ر ي ك س ەلدەرى باسشىلارىنىڭ تاياۋ شىعىستاعى جاعدايعا ارنالعان كەزەكتەن تىس ونلاين سامميتى ءوتتى. شاراعا ارگەنتينا، مىسىر، يران، بىرىككەن اراب امىرلىكتەرى، ساۋد ارابياسى جانە ەفيوپيا ەلدەرىنىڭ وكىلدەر دە كەلدى. سونداي-اق ب ۇ ۇ باس حاتشىسى انتونيۋ گۋتەرريش قاتىستى.
سامميت قورىتىندىسى بويىنشا بريكس ەلدەرىنىڭ باسشىلارى تاياۋ شىعىستاعى، اتاپ ايتقاندا، گازا سەكتورىنداعى جاعداي تۋرالى بىرلەسكەن مالىمدەمە قابىلدادى.
بۇگىن حابارلاعانىمىزداي، يزرايل مەن حاماس ءوزارا تۇتقىنداردى بوساتۋعا جانە سوعىستى 4 كۇنگە توقتاتۋعا كەلىستى.
اۆتور
ەركەجان سماعۇلوۆا
