One Water سامميتى: قاسىم-جومارت توقايەۆ ورتاق سۋرەتكە ءتۇسۋ راسىمىنە قاتىستى
استانا. KAZINFORM - مەملەكەت باسشىسى قاسىم-جومارت توقايەۆ One Water سامميتىنە قاتىسۋشىلارمەن بىرگە سۋرەتكە ءتۇسۋ راسىمىنە قاتىستى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
مەملەكەت باسشىسى قاسىم-جومارت توقايەۆ One Water سامميتىنە قاتىسۋ ءۇشىن ساۋد ارابياسىنا جۇمىس ساپارىمەن باردى.
حالىقارالىق فورۋم قازاقستان مەن فرانسيانىڭ توراعالىعىمەن، ساۋد ارابياسى جانە دۇنيەجۇزىلىك بانك توبىنىڭ قولداۋىمەن وتەدى.
مەملەكەت باسشىسى قاسىم-جومارت توقايەۆ One Water سامميتى اياسىندا دۇنيەجۇزىلىك بانك توبىنىڭ پرەزيدەنتى ادجاي بانگامەن كەزدەستى.
مەملەكەت باسشىسى ەلىمىزدىڭ دۇنيەجۇزىلىك بانكپەن ستراتەگيالىق سەرىكتەستىگىنىڭ ءمانىن ەرەكشە اتاپ ءوتتى. پرەزيدەنتتىڭ ايتۋىنشا، بۇگىندە قارجى ينستيتۋتىمەن بىرلەسە سۋ رەسۋرستارى، كولىك جانە ءبىلىم بەرۋ سالالارىندا جالپى قۇنى 3,5 ميلليارد دوللار بولاتىن بەس ءىرى جوبا جۇزەگە اسىرىلىپ جاتىر.
مەملەكەت باسشىسى دۇنيەجۇزىلىك بانكتىڭ كولىك جولدارىنىڭ ورنىقتىلىعى مەن بايلانىسىن جەتىلدىرۋ باعدارلاماسى (TRACE) شەڭبەرىندە اتقارىلاتىن قازاقستاندىق جوباعا 650 ميلليون دوللار كولەمىندە قارجى ءبولۋ تۋرالى شەشىمىن قۇپتادى. بۇل رەتتە قاسىم-جومارت توقايەۆ ورتا ءدالىزدى دامىتۋعا، اتاپ ايتقاندا، جەزقازعان - قاراعاندى اۆتوماگيسترالىنىڭ قۇرىلىسىنا سالىناتىن ينۆەستيتسيانىڭ ستراتەگيالىق ماڭىزىنا نازار اۋداردى.
