نەگىزگى 3 مۇناي كومپانياسى جىلدىق جوسپاردى نەلىكتەن ورىنداي المادى
استانا. KAZINFORM - جىل قورىتىندىسى بويىنشا مۇناي ءوندىرۋ 87,8 ميلليون توننا دەڭگەيىندە جوسپارلانعان. بۇل تۋرالى بۇگىن ۇكىمەت وتىرىسىندا ەنەرگەتيكا ءمينيسترى الماسادام ساتقاليەۆ ايتتى.
- 2024 -جىلعى قاڭتار-قاراشا ايىندا مۇناي مەن كوندەنسات ءوندىرۋ كولەمى 80,5 ميلليون توننانى نەمەسە وتكەن جىلدىڭ سايكەس كەزەڭىمەن سالىستىرعاندا 98 پايىزدى قۇرادى، - دەدى مينيستر.
ءمينيستردىڭ دەرەگىنشە، مۇناي-گاز سالاسىنىڭ ءىرى كومپانيالارى وندىرگەن ءونىم كولەمى مىناداي:
• تەڭىز كەن ورنىندا اتالعان كەزەڭدە 25,9 ميلليون توننا؛
• قاشاعاندا 15,8 ميلليون توننا؛
• قاراشىعاناقتا 11,1 ميلليون توننا مۇناي ءوندىرىلدى.
- وتكەن جىلمەن سالىستىرعاندا ءوندىرۋ دەڭگەيىنىڭ تومەندەۋىنە 2024 -جىلى ءىرى كەن ورىندارىندا كۇردەلى جوندەۋلەر جۇرگىزۋ اسەر ەتتى: تەڭىزدە كەلەشەكتە كەڭەيتۋ جوباسىنىڭ جوسپارلانىپ وتىرعان ىسكە قوسىلۋىنا بايلانىستى مامىر جانە تامىز ايلارىندا جالپى ۇزاقتىعى 50 كۇن، قاشاعاندا 21 كۇنگە تولىق توقتاي وتىرىپ، سلاگ- كەتچەردى اۋىستىرۋ بويىنشا جوندەۋ جۇرگىزىلدى. بۇدان باسقا، قاراشىعاناق كەن ورنىنداعى ءوندىرىستىڭ تومەندەۋىنە جوسپاردان تىس توقتاتۋلار مەن ورىنبور گاز وڭدەۋ زاۋىتىنىڭ گازدى قابىلداۋدى شەكتەۋى، كاسپي قۇبىر كونسورتسيۋمىنىڭ جوسپارلى- پروفيلاكتيكالىق جۇمىستارعا توقتاۋى اسەر ەتتى، - دەدى الماسادام ساتقاليەۆ.
ونىڭ دەرەگىنشە، اتالعان جايتتارعا بايلانىستى جىل قورىتىندىسى بويىنشا مۇناي ءوندىرۋ 87,8 ميلليون توننا دەڭگەيىندە كۇتىلەدى.
- جوسپارلى ءوندىرۋ كورسەتكىشىنە قول جەتكىزبەۋ مۇناي ەكسپورتتاۋعا دا اسەر ەتتى. ماسەلەن، ەسەپتى كەزەڭدە 63,2 ميلليون توننا مۇناي ەكسپورتتالدى نەمەسە وتكەن جىلدىڭ سايكەس كەزەڭىمەن سالىستىرعاندا 98,3 پايىز، - دەدى ول.
مارلان جيەمباي
اۆتور
