نەگىزسىز ۇستەمەاقى، قاتە دەرەكتەر كورسەتۋ، «ءولى جاندارعا» جالاقى اۋدارۋ - ءبىلىم بەرۋ ۇيىمدارىنداعى بىلىقتار

«قازىرگى ۋاقىتتا مينيسترلىك سىبايلاس جەمقورلىق تاۋەكەلدەرىنە جول بەرمەۋ ماقساتىندا ءبىرقاتار ءىس-شارالاردى ىسكە اسىرۋدا. 2023 -جىلى سىبايلاس جەمقورلىققا قارسى اگەنتتىگى (بۇدان ءارى - اگەنتتىك) ءبىلىم بەرۋ سالاسىنداعى سىبايلاس جەمقورلىق تاۋەكەلدەرىنە سىرتقى تالداۋ جۇرگىزدى. ناتيجەسىندە مينيسترلىك اگەنتتىكپەن بىرلەسىپ، ءبىلىم بەرۋ سالاسىنداعى بيۋدجەت قاراجاتىن جوسپارلاۋ مەن يگەرۋ كەزىندە سىبايلاس جەمقورلىق تاۋەكەلدەرىنە جول بەرمەۋ تەتىكتەرىن ازىرلەۋ بويىنشا ۇيىمداستىرۋ ءىس-شارالارىنىڭ جوسپارىن (جول كارتاسى) بەكىتتى. سىرتقى تالداۋدىڭ قورىتىندىسى بويىنشا ءبىلىم بەرۋ ۇيىمدارىندا مۇعالىمدەردىڭ ەڭبەكاقى قورىنان بيۋدجەت قاراجاتىن جىمقىرۋ سحەماسى اشىلدى. اتاپ ايتقاندا، ءبىلىم بەرۋ ۇيىمدارى قىزمەتكەرلەرىنە ەڭبەكاقى جوسپارلاۋ كەزىندە نەگىزسىز ۇستەمەاقىلار بەلگىلەۋ ارقىلى نورمادان ارتىق قارجى جوسپارلاۋ، سونداي-اق دۇرىس ەمەس دەرەكتەمەلەر كورسەتۋ، ونىڭ ىشىندە باسقا تۇلعانىڭ كارت-شوتى كورسەتىلىپ ءۇشىنشى تۇلعالارعا قاراجات ەسەپتەۋ ارقىلى بيۋدجەت قاراجاتىن جىمقىرۋ فاكتىلەرىنە جول بەرىلگەندىگى بەلگىلى بولدى. وسىلايشا، بيۋدجەتتەن بولىنگەن قاراجاتتى ۇرلاۋ جالعان دەرەكتەمەلەر بويىنشا (ءبىر تۇلعانىڭ ت. ا. ءا.، تولەم شوتتارىنداعى باسقا تۇلعانىڭ كارت- شوتى كورسەتىلە وتىرىپ) نەمەسە ءۇشىنشى تۇلعالارعا جانە «ءولى جاندارعا» ارتىق ەسەپتەلگەنى انىقتالدى»، - دەپ اتاپ وتەدى وقۋ-اعارتۋ ۆيتسە-ءمينيسترى ەدىل وسپان ءماجىلىس دەپۋتاتتارىنىڭ ساۋالىنا بەرگەن جاۋابىندا.

ونىڭ اتاپ وتۋىنشە، وسىنداي زاڭ بۇزۋ سحەمالارىن جويۋ ماقساتىندا مينيسترلىك قارجى مينيسترىلىگىمەن جانە اكىمدىكتەرمەن بىرلەسىپ مىناداي جۇمىستار جۇرگىزىپ جاتىر:

1) «قازىناشىلىق- كليەنت» اقپاراتتىق جۇيەسىن جەكە تۇلعالاردىڭ مەملەكەتتىك دەرەكتەر بازاسىمەن ينتەگراتسيالاۋ ارقىلى ءاربىر قىزمەتكەردىڭ جەكە سايكەستەندىرۋ نومەرىن ەڭبەكاقى تولەۋ ۆەدوموستارىندا كورسەتىلگەن دەرەكتەرمەن سايكەستىگىن اۆتوماتتى تۇردە تەكسەرۋ ءتاسىلىن ەنگىزۋ؛

2) بيۋدجەتتىك وتىنىمدەردى قالىپتاستىرۋ جانە بەكىتۋ پروتسەسىن اۆتوماتتاندىرۋ، ياعني ءبىلىم الۋشىلار كونتينگەنتى بويىنشا مالىمەتتەردى اۆتوماتتى تۇردە سالىستىرۋ ءۇشىن قازىناشىلىق اقپاراتتىق جۇيلەرىن «ۇلتتىق ءبىلىم بەرۋ دەرەكتەر بازاسى» اقپاراتتىق جۇيەسىمەن (بۇدان ءارى - «ۇ ب ب د ب» ا ج) ينتەگراتسيالاۋ؛

3) ءبىلىم بەرۋ سالاسىنىڭ قىزمەتكەرلەرى بولىپ تابىلمايتىن ءۇشىنشى تۇلعالارعا قاراجات ەسەپتەۋ تاۋەكەلدەرىن بولدىرماۋ ماقساتىندا «ۇ ب ب د ب» ا ج بازاسىندا ءبىلىم بەرۋ سالاسىندا پەرسونالدى باسقارۋدىڭ ءبىرىڭعاي اۆتوماتتاندىرىلعان ەلەكتروندىق جۇيەسىن قالىپتاستىرۋ.

«پەداگوگ مارتەبەسى تۋرالى» قازاقستان رەسپۋبليكاسى زاڭىنىڭ 6-بابىنىڭ 2-تارماعىنىڭ 4-تارماقشاسىنا سايكەس پەداگوگ كاسىپتىك قىزمەتىن جۇزەگە اسىرۋ كەزىندە، وعان تاۋارلار مەن كورسەتىلەتىن قىزمەتتەردى ساتىپ الۋ بويىنشا مىندەتتى جۇكتەۋگە جول بەرىلمەيدى. وسىلايشا، مەكتەپتەردەگى مۇعالىمدەردەن قاراجات جيناۋ - بۇل زاڭسىز ارەكەتتەر. مۇنداي فاكتىلەر تۋىنداعان كەزدە مۇعالىمدەر ءبىلىم بەرۋ سالاسىنداعى ۋاكىلەتتى ورگاندارعا جۇگىنۋگە قۇقىلى»، - دەدى ۆيتسە-مينيستر.

اۆتور
مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى