نيگەريا ازىق-تۇلىك قاۋىپسىزدىگىنە تونگەن قاتەرگە بايلانىستى توتەنشە جاعداي جاريالادى

افريكا قۇرلىعىنداعى حالقى ەڭ كوپ مەملەكەت - نيگەريادا ازىق- تۇلىك قاۋىپسىزدىگىنە تونگەن قاتەرگە بايلانىستى «ۇلتتىق توتەنشە جاعداي» رەجيمى ەنگىزىلدى. بۇل تۋرالى ەل پرەزيدەنتى بولا احمەد تينۋبۋدىڭ ابۋدجادا وتكەن «سۋارۋ جانە درەناج جونىندەگى 6- افريكا ايماقتىق كونفەرەنسياسىنىڭ» اشىلۋىندا وقىلعان جولداۋىندا ايتتى.

ءوز ۇندەۋىندە تينۋبۋ ەلدەگى ازىق-تۇلىك قاۋىپسىزدىگىنە تونگەن قاۋىپكە نازار اۋدارىپ، وسىعان بايلانىستى ۇلتتىق دەڭگەيدە توتەنشە جاعداي جاريالانعانىن مالىمدەدى. سونداي- اق، بۇكىل ەل اۋماعىندا سۋارۋ ينفراقۇرىلىمىن كەڭەيتىپ، سۋ رەسۋرستارىن بىرىگە باسقارۋدىڭ ماڭىزدىلىعىن اتاپ ءوتتى.

پرەزيدەنت كونفەرەنتسيانىڭ «افريكاداعى سۋارۋ جانە سۋ رەسۋرستارىن باسقارۋ داعدارىسىن شەشۋ» دەگەن ۇرانمەن ءوتىپ جاتقانىن ەسكە سالىپ، بۇل باستاما اۋىل شارۋاشىلىعىن تۇراقتى دامىتۋعا جانە ەكونوميكالىق توزىمدىلىكتى ارتتىرۋعا شاقىرۋ ەكەنىن جەتكىزدى.

- افريكا ءالى كۇنگە دەيىن سۋارۋ سالاسىنداعى الەۋەتىن تولىق پايدالانا الماي وتىر. بۇل سالاداعى باستى كەدەرگىلەر - ينفراقۇرىلىمنىڭ جەتىسپەۋشىلىگى، قارجىلىق شەكتەۋلەر، كليماتتىڭ وزگەرۋى جانە باسقارۋ ماسەلەلەرى، - دەدى تينۋبۋ.

ول بۇل كونفەرەنسيانىڭ اتالعان تۇيتكىلدەرگە شەشىم تابۋ جولىندا ماڭىزدى مۇمكىندىك ەكەنىن باسا ايتتى. پرەزيدەنتتىڭ سوزىنشە، نيگەريادا سۋارمالى ەگىنشىلىك ءۇشىن زور الەۋەت بار.

- ءبىزدىڭ ەلىمىزدە نيگەر جانە بەنۋە وزەندەرىنىڭ ءىرى سۋ الاپتارىندا 3,1 ميلليون گەكتاردان استام سۋارمالى جەرلەر بار، - دەپ اتاپ ءوتتى ول.

سونداي-اق تينۋبۋ ەلدەگى سۋ رەسۋرستارى مەن اۋىل شارۋاشىلىعى سالاسىندا يننوۆاتسيالىق ستراتەگيالار ازىرلەۋ قاجەتتىگىن مالىمدەدى.

ەسكە سالا كەتەيىك، بۇعان دەيىن نيگەريادا جىل باسىنان بەرى لاسسا بەزگەگىنەن قايتىس بولعاندار سانى 127-گە جەتكەنىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى