نىعماتۋليندەر قايدا ءجۇر؟
اۋىل شارۋاشىلىعى ءمينيسترى ايداربەك ساپاروۆ ءماجىلىستىڭ ەكس-سپيكەرى، قۇداسى اعايىندى نىعماتۋليندەر قايدا ءجۇر دەگەن سۇراققا جاۋاپ بەردى.
جۋرناليستەر بۇگىن ۇكىمەت وتىرىسىنان كەيىن مينيستردەن «قىزىڭىز نىعماتۋليننىڭ ۇلىنا تۇرمىسقا شىققان. قۇداڭىزدىڭ قايدا جۇرگەنىن بىلەتىن شىعارسىز؟» دەپ سۇرادى.
«مەنىڭ قىزىم ونىڭ كەلىنى ەمەس. جەكە باستىڭ سۇراعىنا جاۋاپ بەرگىم كەلمەيدى. ەكىنشىدەن، ءبىزدىڭ قۇدالىق تىكەلەي ەمەس. مەنىڭ قىزىم نەمەسە ۇلىم نىعماتۋليندەردىڭ بالاسىمەن وتباسى قۇرعان جوق. اعاسىنىڭ بالاسى عوي»، - دەدى ايداربەك ساپاروۆ.
ءماجىلىستىڭ بۇرىنعى سپيكەرى نۇرلان نىعماتۋليننىڭ تۋعان اعاسى ارىستان نىعماتۋليننىڭ ۇلى ءادىلحان ارىستانوۆ اۋىل شارۋاشىلىعى ءمينيسترىنىڭ قىزىنا ۇيلەنگەن.
«مەن نىعماتۋليندەردىڭ قايدا جۇرگەنىن بىلمەيمىن. قازاقستاندا بولار»، - دەپ اشۋلانىپ جاۋاپ بەردى.
ەسكە سالايىق، بۇعان دەيىن ۇلتتىق قاۋىپسىزدىك كوميتەتىنىڭ (ۇ ق ك) بۇرىنعى ءتوراعاسى امانگەلدى شابداربايەۆ ءماجىلىستىڭ بۇرىنعى سپيكەرى نۇرلان نىعماتۋليندى «قاڭتار وقيعاسىن» ۇيىمداستىرۋشىلاردىڭ ءبىرى بولعان دەپ سانايتىنىن ايتقان.
Qaz365.kz
