نيۋ- يوركتە العاش رەت كوز ترانسپلانتاتسياسى جاسالدى
NYU Langone Health كلينيكاسىنىڭ حيرۋرگتەرى الەم بويىنشا العاشقى ادامنىڭ كوز الماسىن اۋىستىرۋ وپەراتسياسىن جاسادى.
ناۋقاستىڭ كورۋ قابىلەتى قالپىنا كەلمەسە دە، بۇل وپەراتسيا مەديتسيناداعى جاڭالىقتاردىڭ ءبىرى رەتىندە تىركەلدى، دەپ حابارلايدى Kazinform بۇل تۋرالى Reuters اگەنتتىگىنە سىلتەمە جاساپ.
بەتتى ترانسپلانتاتسيالاۋ وپەراتسياسىنان كەيىن التى اي وتكەن سوڭ، كوزىنىڭ سول جاق بولىگىندەگى قان تامىرلار جۇيەسى جۇمىس ىستەي باستاعان جانە كوز تورى قالىپقا كەلگەن.
«كوز ترانسپلانتاتسياسىنىڭ ءوزى — العا جاسالعان ۇلكەن قادام. بۇل عاسىرلار بويى ادامزات ويىندا بولعانىمەن، وسى ۋاقىتقا دەيىن ورىندالماي كەلگەن قادام ەدى»، - دەيدى حيرۋرگتەر توبىن باسقارعان ەدۋاردو رودريگەس.
وسى ۋاقىتقا دەيىن دارىگەرلەر كوزدىڭ الدىڭعى ءمولدىر قاباتىن عانا اۋىستىرا العان.
رەتسيپيەنت اارون دجەيمس — اركانزاس شتاتىنان كەلگەن 46 جاستاعى اسكەري قىزمەتكەر، ول جوعارى ۆولتتى ەلەكتر جەلىسىن تارتۋشى بولىپ جۇمىس ىستەگەن. 2021 -جىلى ونىڭ بەتى توك وتكىزەتىن سىمعا ءتيىپ، دەنەسى ارقىلى 7200 ۆولتتىق توك سوققان. سالدارىنان بەتىنىڭ سول جاعى، مۇرنى، اۋزى جانە سول كوزى مەن سول قولى قاتتى جاراقاتتانعان.
مامىر ايىنىڭ سوڭىندا 140 تان استام حيرۋرگتەن تۇراتىن توپ اارون دجەيمستىڭ سول كوزى مەن بەتىنىڭ ءبىر بولىگىن ترانسپلانتاتسيالادى. وپەراتسيا شامامەن 21 ساعاتقا سوزىلدى، دەپ حابارلايدى CNN.
«كوز الماسىن ترانسپلانتاتسيالاۋ - كورۋ قابىلەتى قالپىنا كەلمەسە دە جاڭا مۇمكىندىكتەرگە جول اشادى»، - دەيدى رودريگەس.
