نورما بويىنشا استانادا 1 ميلليوننان ءسال-اق ارتىق ادام تۇرا الادى - دەپۋتات
ءماجىلىس دەپۋتاتى ناۋرىز سايلاۋباي پرەمەر-ءمينيستردى اتىنا رەسپۋبليكالىق ماڭىزداعى ءۇش مەگاپوليستە حالىق سانىنىڭ شەكتەن تىس ارتىپ، اۋىلدار بوس قالىپ جاتقانى تۋرالى ساۋال جولدادى، دەپ حابارلايدى قازاقپارات ءتىلشىسى.
«قازىر ءبىز ىشكى كوشى-قوننىڭ بەيبەرەكەت ۇدەرىسىن كورىپ وتىرمىز. سالدارىنان ءىرى مەگاپوليستەر مەن قالالارعا قاپتاپ كەلىپ جاتقان جاڭا تۇرعىندارى رەتتەي الماي جاتىرمىز. بۇعان جاقىندا استانا قالاسىندا بولعان سۋ تاپشىلىعى دالەل. 30 جىلدىڭ ىشىندە قازاقستاندىقتار كوبىنە ەلىمىزدىڭ سولتۇستىك جانە سولتۇستىك-شىعىس شەكارالاس وڭىرلەرىنەن ۇدەرە كوشكەن. اسىرەسە اقمولا، شىعىس قازاقستان، قاراعاندى، پاۆلودار جانە سولتۇستىك قازاقستان وبلىستارىنان. اتالعان 6 ءوڭىر حالىقتىڭ %40-15 جوعالتىپ وتىر. سونىمەن قاتار ەلىمىزدىڭ 8 وڭىرىندە اۋىل حالقى ايتارلىقتاي ازايىپ بارا جاتقانى بايقالىپ وتىر»، - دەدى ول.
دەپۋتات وتكەن عاسىردىڭ 60 جىلدارىندا ەلدەگى ۋربانيزاتسيا يندۋستريالاندىرۋمەن بايلانىستى بولسا، قازىر ەشقانداي ەكونوميكالىق نەگىزسىز ءجۇرىپ جاتىر دەگەن وي ايتتى.
«الماتى قالاسى تۇرعىن ءۇي قۇرىلىسى قارقىندى ءجۇرىپ جاتقان ءىرى «ينۆەستيتسيالىق جوباعا» اينالدى. ونداعى كوتەرمە ساۋدا بازارلارىنىڭ اينالاسىندا مارگينالدى توپتاردىڭ قاتارى كوبەيىپ جاتىر. الماتى حالقىنىڭ تابىسى 2015-جىلدان باستاپ نەبارى %2 پايىزعا عانا وسكەن. الماتىلىق ەرەسەكتەردىڭ تورتتەن ءبىر بولىگىندە الەۋمەتتىك مەديتسينالىق ساقتاندىرۋ جوق. ءار 10 قىلمىستىڭ 9 ىن جۇمىسسىزدار جاسايدى. ەلىمىزدەگى ءاربىر بەسىنشى جۇمىسسىز جاس ازامات الماتىدا تۇرادى. سول سياقتى استاناعا دا كوشىپ كەلگەن، كوپتەگەن ازامات ءومىر سۇرۋگە لايىقتالماعان ساياجاي القاپتارىندا تۇرۋعا ءماجبۇر. ال بۇل كەيدە الەۋمەتتىك قايعىلى جاعدايلارعا اكەپ سوعىپ جاتادى»، - دەپ توقتادى ءماجىلىس دەپۋتاتى.
ونىڭ ايتۋىنشا، الماتى قالاسىنداعى ەكونوميكا ينستيتۋتىنىڭ عالىمدارى قۇرىلىس نورمالارى مەن ەرەجەلەرىندە جازىلعان نورماتيۆتەردى ەسكەرە وتىرىپ، مەگاپوليستەردىڭ دەموگرافيالىق سىيىمدىلىعىنا تالداۋ جاساعان.
«سول تالداۋدىڭ قورىتىندىسى بويىنشا، شىمكەنت قالاسىنىڭ دەموگرافيالىق سىيىمدىلىعى، تابيعي رەسۋرستاردى ەسكەرسەك، 600 مىڭ ادامنان اسپاۋى ءتيىس. ال الماتىدا سىيىمدىلىق شەگى - 1,2 ميلليون ادام. استانادا نورما بويىنشا 1 ميلليوننان ءسال-اق ارتىق ادام تۇرا الادى دەگەن قورىتىندىعا كەلدى»، - دەدى ناۋرىز سايلاۋباي.
دەپۋتات اۋىل حالقى ازايا بەرسە، اۋىل شارۋاشىلىعىمەن اينالىساتىن ادام قالمايدى دەگەن پىكىرىن جەتكىزدى.
«استانانىڭ باس جوسپارىندا قالانىڭ حالقى كوشى-قوننان سوڭ جىل سايىن 100 مىڭ جاڭا تۇرعىنعا كوبەيەتىنى ەسكەرىلە مە؟ الداعى 10 جىلدا قالادا قانشا مەكتەپ، اۋرۋحانا سالىنادى جانە قانشا ورىنعا ەسەپتەلەدى؟ الماتىعا قونىس اۋدارىپ جاتقان ازاماتتاردىڭ جىل سايىنعى سانى قانداي جانە بۇل جاعداي الەۋمەتتىك جانە ينجەنەرلىك ينفراقۇرىلىم نىساندارىن سالۋعا قاتىستى قالانىڭ باس جوسپارىندا قالاي ەسكەرىلەدى؟ الداعى بەس جىلدا استانا مەن الماتى قالالارىندا قانشا جۇمىس ورنىن قۇرۋ جوسپارلانىپ جاتىر؟» - دەپ ساۋال جولدادى ءماجىلىس وكىلى.
