ايگۇل سولوۆيەۆا: بۇل سايلاۋدا «Nur Otan» پارتياسىنىڭ كوشباسشىلىعى ايقىن كورىنىپ تۇردى
ساراپشى بۇل ناۋقاندا پارتيالاردىڭ ءبىر-بىرىنە دەگەن سىني تەكەتىرەسىن اسا بايقاي قويماعانىن ءمالىم ەتتى، دەپ حابارلايدى قازاقپارات ءتىلشىسى.
قوعام قايراتكەرى مۇرات ابەنوۆ سايلاۋدىڭ الدىن الا قورىتىندىسى بويىنشا ساراپشىلار فورۋمىن وتكىزىپ جاتىر . جيىندا ايگۇل سولوۆيەۆاعا بۇرىنعى سايلاۋلار مەن بۇگىنگى سايلاۋلاردىڭ ەرەكشەلىگى قانداي بولعانى جايلى سۇراق قويىلدى.
«ەڭ ءبىرىنشى كەزەكتە مەن حارتيا باستاماشىسى بولعانىمدى اتاپ وتكىم كەلەدى. سول سەبەپتى سايلاۋعا حالىقارالىق قۇقىق مەن زاڭناما تۇرعىسىنان قارادىم. مەنىڭ ويىمشا، بۇگىنگى كۇنى سايلاۋعا قاتىسقان بەس پارتيانىڭ باسەكەسىن ساياسي تۇرلەنۋ دەۋگە كەلمەيدى. پليۋراليزم مەنىڭشە، بەلگىلى ءبىر دەڭگەيدە شەكتەۋلى بولدى. سوندىقتان جاڭادان تاعى ءبىر ەكى-ءۇش پارتيا سايلاۋعا قاتىسقاندا، ساياسي ناۋقان بۇدان دا قىزىق بولار ما ەدى. وسى سايلاۋ ارقىلى قوعامنىڭ قانشالىقتى كەمەلدەنگەنىن كورۋگە بولادى. ءوز باعدارلامالارىن تانىستىرعان ازىرگە بەس پارتيا بار. مەنىڭ ويىمشا، ولارعا جەتكىلىكتى ۋاقىت بەرىلدى، پىكىرتالاس تا كوپ بولدى»، - دەيدى ول.
ايگۇل سولوۆيەۆا دەسە دە قالىپتاسقان جاعدايدى قانداي دا ءبىر دارەجەدە وزگەرتۋگە قاتىستى ناقتى ءبىر ۇندەۋدى بايقاماعانىن اتاپ ءوتتى.
«پارتيالاردىڭ ءبىر-بىرىنە دەگەن سىني تەكەتىرەسى كوبىرەك بولسا، قىزىقتىراق بولار ەدى. پارتيالار بۇگىنگى ناتيجەمەن كەلىستى دە قويدى. سوندىقتان، بۇل باسەكەدە «Nur Otan» پارتياسىنىڭ كوشباسشىلىعى ايقىن كورىنىپ تۇردى. بۇل مەنىڭ كوزقاراسىم»، - دەدى ول.
ەسكە سالا كەتسەك ق ر ورتالىق سايلاۋ كوميسسياسى 10- قاڭتار كۇنى وتكەن ق ر پارلامەنتى ءماجىلىسى دەپۋتاتتارىن سايلاۋدا ساياسي پارتيالار جيناعان داۋىستاردىڭ الدىن الا قورىتىندىسىن جاريا ەتكەن بولاتىن.
ورتالىق سايلاۋ كوميسسياسىنىڭ حاتشىسى ءسابيلا مۇستافينانىڭ دەرەگىنشە، «اۋىل» حالىقتىق- دەموكراتيالىق پاتريوتتىق پارتياسى 5,29، «Nur Otan» پارتياسى %71,09، «ADAL» ساياسي پارتياسى 3,57، قازاقستاننىڭ «اق جول» دەموكراتيالىق پارتياسى 10,95 جانە «قازاقستاننىڭ حالىق پارتياسى 9,10 پايىز داۋىس جينادى.
