نەسىپبەك بوستاندىق جىرىنىڭ بوزجورعاسى ەدى - داۋلەتكەرەي كاپ ۇلى

اقيىق مۇقاعالي اقىن نەسىپبەكتىڭ العاشقى اياقالىسىنىڭ شالىمدى ەكەنىن تانىدى. ءتىلىنىڭ شۇرايلىلىعىنا ءسۇيسىندى. العاۋسىز اعالىق تىلەگىن ارنادى. بولاشاق اقىنعا باتا بەردى. ۇلى اقىننىڭ تىلەك باتاسى تۇڭعىش جىر جيناعى «قوزىكوشكە» تىزگىنقاعار لەپەس بولدى.

قيادان تايىپ اتان قۇلاعان،

قيامەت ءوتتى بوتاڭ جىلاعان.

تۇسىمە كىرسەڭ، عايىپتان كەلىپ،

بەرىپ كەت، بابا، باتاڭدى ماعان! - دەپ باباسى دۋلات باباتاي ۇلىنا جۇگىندى.

وسيەتىڭدى ماڭگى توزباس مۇراداي،

قارشادايدان جاتتاپ ءوستىم دۇعاداي.

ولەڭ دە ءبىر وقتان قاشقان قۇرالاي،

ساعان جىلار، تاڭىرىگە جىلاماي.

شاپانىڭنىڭ شالعايىمەن قورعاي ءجۇر،

اينالايىن، ارۋاعىڭنان ۇلى اباي! - دەپ اق قاعازدىڭ بەتىنە قارشىعاداي قاقشيىپ شۇيىلەردە اتا-بابا ارۋاعىنا سىيىندى. ۇستاز-اعا، اكادەميك رىمعالي نۇرعاليدىڭ قاسىنا ەرگەن تەلعارا تۇرسىن جۇرتباي دوسى ەكەۋى ەرتە ەسەيدى.

احمەت پەن ماعجاندى رىمعالي اعا ەكى شاكىرتكە كەشكىسىن ءۇيدىڭ بارلىق پەردەسىن جاۋىپ تاستاپ، ەسىگىن ىشتەن ءىلىپ، بەيسەنباي كەنجەبايەۆ بەرگەن «جابىق» كىتاپتاردان سۋسىنداتتى. اكادەميكتىڭ «اق بۇزاۋ» اتانعان اق جيگۋليىمەن جانىبەك كارمەنوۆ، قۇنىپيا الپىسبايەۆ، تۇرسىن جۇرتباي، نەساعاڭ قازاق دالاسىن شيىرلادى.

ۇستازدىڭ اڭگىمەسىن جاكەڭ مەن قۇنەكەڭنىڭ القوڭىر اندەرى تۇزدىقتاپ، كوڭىل مارقايدى، جۇرەك جايلاندى. نەسىپبەك اقىن تىنىسى اشىلدى، كوڭىلىنىڭ كوكجيەگى كەڭەيدى. «باسسۇيەكتەر» پوەماسىمەن ادەبي ورتانى جالت قاراتتى.

«ۇندىستەر، ۇزىلمەڭدەر» پوەماسى سول ۋاقىتتا امەريكاداعى كوشپەلى وركەنيەت يەسى ۇندىستەردىڭ قيامەتىن ارقاۋ ەتكەن جەر تاعدىرى - ەل تاعدىرىنا ارنالعان شىعارما ەدى. كەڭەستىڭ قىلىشىنان قان تامىپ تۇرعان ۋاقىتتا بۇل تاقىرىپتا ءسوز قوزعاۋى دا جيىرمادان ەندى اسقان بوزبالا اقىننىڭ ەپيكالىق تىنىسىن ءارى ەركىن ويلىلىعىن بايقاتپاي ما؟!

Egemen Qazaqstan گازەتىنە بەرگەن سۇحباتىندا نەساعام ءوزى بىلاي تولعانادى:

- «26 جاسىمدا جازىلعان، سول تۇستاعى رەسپۋبليكالىق «جالىن» جۋرنالىنىڭ بايگەسىن العان «باسسۇيەكتەر»، «ۇندىستەر، ۇزىلمەڭدەر» دەگەن پوەمالارىمدا ازاتتىقتى اڭساۋ يدەياسى ايقىن كورىندى. كەڭەس زامانىندا باسسۇيەكتەردى سويلەتۋ ارقىلى جانە ۇندىستەردىڭ اۋىر ءحالىن جازعان بوپ وتىرىپ ءوز حالقىمنىڭ بوستاندىعىن اڭسادىم. ۇندىستەر تۋرالى پوەمامدا مىناداي جولدار بار:

«قارۋ ءتىلىن مەڭگەرگەنشە،

قاپىلىستا ءوتتى ءومىر.

ءتاڭىر بىزگە جەر بەرگەنشە،

بەرسەڭ ەتتى كوكتەمىر.

ايىققاندا مۇناردان كۇن،

كوكتەپ قايتا شىعارمىز.

ورتكە كەتكەن نۋ ورماننىڭ،

ءتۇبىرىمىز مىنا ءبىز».

شىنىندا ءبىز ورتكە كەتكەن نۋ ورماننىڭ ءتۇبىرى ەدىك.

كەيىن تولىسقان شاعىندا قازاقتىڭ قاھارمان ۇلى، سولتۇستىك بەس وبلىستىڭ تاعدىرىنا باسىن تىككەن جۇمابەك تاشەنيەۆكە ارنالعان «جەر - جاننان قىمبات» پوەماسىن جازۋعا قولامتاداعى قوزداي بولعان ارمانى ارقاۋ بولدى، بوزبالا شاقتا جازعان «ۇندىستەر، ۇزىلمەڭدەر» سەكىلدى باتىل ويىنىڭ ايعاعى ەدى. كەيىن تاشەنەۆكە ارناعان پوەماسىن بىلاي تۇيىندەيدى:

باسىنان كونە تاريح تومەن قۇلداپ،

تاعدىرىن تۋعان ەلدىڭ كەلەم جىرلاپ.

وزەگىم تالىپ جەتكەن، تاۋەلسىزدىك،

ومىردە نە بار ەكەن سەنەن قىمبات!؟

ازاپتى بىرگە تارتىپ قالىڭ ەلمەن،

اھ ۇرىپ اتامەكەن تەبىرەنگەن.

كوك تۋدى كوككە بويلاپ جەلبىرەگەن،

قازاقتىڭ ارمانى جوق كورىپ ولگەن!

شارق ۇرىپ، سەرمەسە دە كوككە قۇلاش،

اجالدان قۇتىلمايدى نوقتالى باس.

بوركىمەن بۇلت ساپىرعان تالايلاردىڭ،

ومىردەن وكىنىشپەن وتكەنى راس.

قۇلاسا قىزمەتىنەن كۇنى باتىپ،

اتى وشەر تالايلاردىڭ ءتىرى جاتىپ.

ءمانساپتىڭ قۇلى بولۋ - زور قاسىرەت،

ۇلتىڭنىڭ ۇلى بولۋ - ۇلى باقىت!

نەسىپبەك اقىن دا ۇلتىنىڭ ۇلى بولدى، ۇلى باقىتتى كوردى!

كوكىرەگى كوك ساندىق شالداردىڭ اڭگىمەسىنە قانىق ەدى. شاكىر ابەنوۆتىڭ ءىنى دوسىنا اينالدى. شاكىر اتانىڭ يتجەككەننەن ورالىپ، قۇندىزدى مەن مامىرسۋدىڭ اراسىندا پوشتاباي بولا ءجۇرىپ، «قوزى كورپەش- بايان سۇلۋ» پوەماسىن قايتا قاراپ، تولىقتىرىپ جازىپ جۇرگەندەگى اڭگىمەسىن ايتقاندا نەساعاڭنىڭ كوزى شىراداي جاناتىن. ءبىر باسىندا ءبىراز ونەر توعىسقان تاعدىرلاس اعاسى قاجىتاي ىلياسوۆپەن دە اڭگىمەسى قىزىرلى ەدى.

2001-جىلى اياگوزدە بايعارا بي مەن اقتايلاق ءبيدىڭ كەسەنەسىنىڭ اشىلۋىنا نەساعاڭا شوپىر بولىپ باردىم.

قازاقتىڭ يگى- جاقسىلارى تۇگەل جينالعان. قاسىم قايسەنوۆ، ءازىلحان نۇرشايىقوۆ، تۇرسىنبەك كاكىشەۆ، تۇرسىنحان ءابدىراحمانوۆا، قابدەش ءجۇمادىلوۆ، مۇحتار ماعاۋين، ءىليا جاقانوۆ، قاجىتاي ءىلياسوۆ، تاعىسىن تاعىلار. اياگوزدىڭ اكىمى ايبەك كارىموۆ ءوزى دە ادەبيەتكە قانىق، تاريحقا جەتىك ازامات. اسقا اقشاڭقان ۇيلەر تىگىلگەن، استا-توك داستارقان. اڭگىمە اعىل-تەگىل. قاجىتاي اعا جىلقى تانيمىن، بايگە اتتاردىڭ قايسىسى الدىمەن كەلەرىن شاپپاي تۇرىپ ايتىپ بەرەم دەگەن سىڭايدا جەلپىندى.

تاڭەرتەڭ بايگەتوبەگە جينالدىق. قابدەش اعالار قاجىتاي ىنىسىنەن كەشە تۇندەگى توركىندەس اڭگىمەسىن جاڭعىرتىپ:

- ال، ايت، قاي ات كەلەدى؟ - دەپ قولقالادى. قاجەكەڭ، مەن اتتاردى ارالاپ قاراپ، مۇشەلەرىن كورىپ، كوزىنە ءۇڭىلىپ بارىپ ايتام دەدى.

شاتىردا وتىرعان يگى-جاقسىلاردىڭ الدىنان الپىس- جەتپىس مەتردەن ات وتەتىن شەڭبەر. توپ بايگەگە سورەدەن ات جىبەرىلدى. كورەرمەننىڭ الدىنان وتكەنشە بەس ءجۇز مەتردەي عانا بولادى. توپتىڭ ورتاسىندا كەتىپ بارا جاتقان التىنشى ءنومىرلى تورى اتتى نەسىپبەك اعا نۇسقادى.

اعالارىنا سول ات كەلەرىن شەگەلەپ ايتتى. الدا ءالى بەس اينالىم بار ەدى. ايتقانى ايداي كەلدى. اعالارى قۇتتىقتاپ جاتتى. ەندى الامانعا شىققان وتىزعا جۋىق اتتى باقىلاعان قوناقتار نەساعاما قارادى. ورتاڭعى توپتان جيىرما ءبىرىنشى ءنومىرلى الاياق كەر اتتى كورسەتىپ، سول بايگەنىڭ الدى بولارىن بولجادى. ءبىراق اتتار ەكىنشى اينالىپ جۇرت الدىنان وتكەندە ورتا تۇستا بوكەن شابىسپەن بارا جاتقان توعىزىنشى ءنومىرلى كۇرەڭ اتتىڭ ءبىرىنشى كەلەرىن ايتىپ، الدىڭعى ءسوزىن قايتىپ الدى. جەتى اينالىمنان كەيىن توعىزىنشى ءنومىرلى كۇرەڭ ات ءبىرىنشى، ءبىرىنشى ايتقان جيىرما ءبىرىنشى ءنومىرلى الاياق كەر ات ەكىنشى كەلگەندە، جينالعان جۇرت نەسىپبەك اقىننىڭ ات تانيتىن كۇرەڭبايكوز سىنشىلىعىنا تاڭداي قاعىسىپ، اعالارى باۋىرىنا باسىپ، قۇتتىقتاعانىن كوردىم.

الاماننان ءبىرىنشى كەلگەن اتتىڭ ەسىمى - ديانا ەكەن.

«اسىندا ءسوز ۇستاعان بي اعانىڭ، شابىسى قۇتتى بولسىن ديانانىڭ»، - دەپ مەن دە ارناۋىمدى ايتىپ ەدىم. سول ساپاردان ارى ءۇرجارعا بارىپ، كوكوزەكتە اكەم كاپ قۇمار ۇلى ەكەۋى تاڭدى تاڭعا ۇرىپ ءۇش كۇن، ءۇش ءتۇن جىلقى تۋرالى اڭگىمەلەسىپ، اكەمە «ارپاكەر» دەگەن داستان جازدىرىپ كەتىپ ەدى-اۋ. اكەم دە ارعى بەتتە جورعا، جۇيرىك باپتاعان، بايگەنىڭ قىزىعىن كورگەن، بيەنىڭ ىشىندەگى قۇلىندى ساتىپ العان جىلقىجاندى، اتبەگى ادام ەدى.

نەساعام بولسا، شۇبارتاۋدا اكەسى تۇرىسبەكتىڭ ەركەتورىسىن ءوزى باپتاپ، ءوزى شاۋىپ تالاي بايگەدەن كەلگەن، مۇحتار اعانىڭ اكەسى ماعاۋيا اقساقالدىڭ نار قىزىلىمەن دە تالاي سايىستا بايگەگە تىزگىن ۇستاتقان تاستاقىم شاباندوز بالا ەكەن عوي!

كەزىندە قازاق بالاسىنىڭ تانىمىن كەڭەيتىپ، تارازىسىن تەڭەگەن «بالدىرعان» جۋرنالىندا ۇزاق جىل قىزمەت ىستەگەن نەسىپبەك ايت ۇلى بالالارعا دا مولىنان بازارلىق ۇسىندى. بالانىڭ ءتىلىن ءبىلىپ، قازاقى تانىمدا، ۇلتتىق ناقىشتا ولەڭ ءورىپ، جاس وركەندەرگە انا ءتىلدىڭ قايماعىن ۇسىندى. مۇزافار الىمبايەۆ، تۇمانباي مولداعاليەۆ باستاعان اعا اقىنداردىڭ سوقپاعىندا تالاي سوقتالى دۇنيەلەر قالدىردى.

بىلتىر نەساعام جالعاننان وزعاندا «داريعا- اي، قارا ولەڭنەن داۋرەن كوشتى» دەپ «قازاق ادەبيەتى» گازەتىنە كوڭىل ايتۋ بەرىپ ەدىم. اقسەلەۋ سەيدىمبەك اعانىڭ بۇگىندە حالىق ءانى سەكىلدەنىپ، قازاقتىڭ جۇرەگىنە ءسىڭىپ كەتكەن «سارىارقا» ، «داۋرەن-اي» سياقتى اندەرىنىڭ ءماتىنىن اسقان شەبەرلىكپەن ورگەن دە نەساعام. «داۋرەن-اي» ءانى ءبىر شۋماقتان عانا تۇراتىن، قالعانى قايىرما ءان. سول ءبىر شۋماققا قانشاما ءمان، مازمۇن سىيدىرعان نەتكەن ۇستالىق دەپ ويلايمىن. جانىبەك دوسى جازعان «اعالار-اي» ءانىنىڭ ءماتىنى كوتەرىپ تۇرعان جۇكتى قاراڭىز!

اعالار- اي،

بارىندا از عۇمىردى باعالاماي،

وزدەرىڭ قوناقتاعان بايتەرەكتىڭ،

تامىرىن بالتالاماي، ارالاماي... - دەپ كۇيىنىشىن دە، ءسۇيىنىشىن دە ارالاستىرىپ بەرىپ وتىرادى. مۇقاعالي جىرلارىنىڭ باعىن اشىپ، ءباسىن كوتەرگەن ءانشى، كومپوزيتور دوسى تۇرسىنعازى راحيموۆپەن ءبىرقانشا ءان جازعان. سونىڭ ىشىندە «اق بوكەننىڭ» ايتارى باسقا. مەن ءۇشىن ساكەننىڭ «اقساق كيىك» ولەڭى مەن نەساعامنىڭ «اق بوكەنىنىڭ» پروتوتيۆى - قازاق سەكىلدى.

اداسىپ جۇرگەن اق بوكەن،

قاي جاققا ماڭىپ باراسىڭ،

قاي جەردەن پانا تاباسىڭ؟!

وزەگى وكسىك دۇنيە-اي،

ورتەنىپ ىشتەي جاناسىڭ؟!

وقيعاسىن ءوزى جىلاپ وتىرىپ ايتىپ بەرگەن ەدى. الپىسىنشى جىلدارى قىتايدان قابدەش، قاجىتاي اعالار باستاپ ورالعان كوشتىڭ باسىن قىرعىز ەلىنە دەيىن سوزدى. بالقاشتىڭ بەكتاۋ اتا، ۇلكەن تولاعاي، كىشى تولاعاي اتتى اۋىلدارىنا البان جۇرتىنىڭ قانشاسىن اكەلدى. ايتىسكەر اقىن ورازالى دوسبوسىنوۆتىڭ اكە-شەشەسى سول بالقاش جاققا كەلگەن ەدى.

جايىرتاۋى جۇرتتا قالعان جاركەن اقىن كوكشەتاۋدىڭ زەرەندىسىندە قوي باعىپ جۇرگەن جەرىنەن الماتىعا الدىرتقان ەركەش يبراگيموۆ بولاتىن. بۇنىڭ بارلىعى دا كەڭەستىڭ قيتۇرقى ساياساتى ەدى. ون ەكى جاسىندا شەكارا اسقان بالا نەسىپبەكتىڭ اۋىلى شۇبارتاۋ، باقاناسقا قونىستاندى. جايلاۋدا قاراشا ۇيمەن قوي باعىپ وتىرعان ءبىرۇيلى جاندى جەرگىلىكتى جىندى سۋعا تويىپ العان زيل-130 جۇك ماشيناسىنىڭ شوپىرى تاپتاپ ءوتىپ، ءجانتاسىلىم ەتكەن ەكەن.

وسى وقيعا بالا نەسىپبەكتىڭ جۇرەگىن جارالاپ، كوز الدىنان كەتپەي قويعان. «كەيىن تۇرسىنعازى دوسىم «اق بوكەننىڭ» ءان نۇسقاسىن ۇسىنعاندا سول ءبىر قاندى وقيعا ەسىمە ءتۇسىپ، اناۋ قىتايدان ۇرپاعى ءۇشىن قاشا كوشىپ كەلىپ وتىرعاندا اجال تاپقان وتباسى ەسىمە ءتۇستى.

سونى: «شەكسىز عوي مىنا قارا جەر، ءوزىڭدى ءوزىڭ پانا كور. اجالدان قاشقان تىرشىلىك، ساعىمداي زۋلاپ اعا بەر» دەپ جازىپ ەدىم»، - دەپ اقتارىلىپ ەدى-اۋ، اعام!

كۇيشى، كومپوزيتور سەكەن تۇرىسبەك ءىنى دوسىمەن جازعان اندەرىنىڭ سۇرلەۋى بولەك، سورابى سوقتالى. «ەسىل دە ەسىل، ەسىل كۇن»، «باۋىرىم، سوناۋ كۇن قايدا» اتتى ەكى شىعارما بايىرعى جىراۋلاردىڭ جۇلگەسىمەن سارىنى ساباقتاسىپ، مازمۇنى بايىپ تۇر.

الاشىنا ناسيحات جەتكىزگەن تەرمە، تولعاۋ ىسپەتتەس. تۇرسىنجان شاپاي جازعان اندەرگە تەك نەساعاڭ عانا ءسوز جازدى. ىشكى ۇندەستىك پە، جۇرەك قىلىن قوزعايتىن، جۇيكە-جۇيەڭدى شىمىرلاتىپ اكەتەتىن ءسوز بەن ساز ۇيلەسىمدىلىگى! ول اندەردى بىردە قۇمىقتىرىپ، بىردە ويناتىپ، بىردە قوڭىرلاتىپ شىرقايتىن رامازان ستامعازيەۆتىڭ قوڭىر داۋىسى ما، ايتەۋىر ءبىر تىلسىم دا جۇمباق دۇنيەگە ەنىپ كەتە بەرەسىڭ...

حالىق ريزابەك جازعان «ارمان-اي» انىندە «جەڭىلگەن ماحابباتتا مايدانگەرمىن» دەگەن جولىمەن دە كوپ سىر جەتكىزگەندەي. «مۋزارت» توبى ايتاتىن ەسترادالىق اندەردىڭ ماتىنىمەن بۇگىندە ءان ءسوزىن ارزانداتىپ العان كەيبىر اقىندارعا ەسكەرتۋ جاساعانداي، قازاق ءتىلىنىڭ يكەمىن كورسەتكەندەي، ءاننىڭ ءماتىنىن قاراپايىم سوزبەن دە ماعىنالى ەتىپ جازۋعا بولادى دەگەندەي يشارانى بەرگەن سەكىلدى نەساعام!

سوناۋ «باسسۇيەكتەردەن» باستالعان ەپيكالىق دۇنيەلەر نەساعاڭنىڭ پوەزياداعى شىققان بيىگى، العان اسۋى. بازبىرەۋلەر «بايتەرەكتى» جازدى دەپ جازعىردى، بالاعىنا جارماستى. وزدەرى ول پوەمانى وقىماي تۇرىپ، نەساعاڭا تاس لاقتىردى. بۇل پوەما ازاتتىقتى جىرلاعان، بابالار رۋحىن دارىپتەگەن شىعارما بولاتىن. اقىندى دا زامانى زار يلەتىپ، قوعامى پايدالانادى. ۋاقىتىندا كەيبىر شەنەۋنىككە، بولماسا باسشىعا كەرەك بولعان شىعار، مەن ءوز باسىم «بايتەرەكتى» قولجازباسىنان وقىعام.

جولدان قوسىلعان شۋماقتار سول ادامداردىڭ قوستىرعان «قوسپاسى» ەدى. «مۇقاعالي - جەلتوقسان»، «كوكالا ۇيرەك»، «شاقانتاي»، «تۋ»، «جەر - جاننان قىمبات»، «قانىش»، «ماعجاننىڭ جۇمباق قۇسى»، ت. ب. قىرىققا جۋىق قازاق تاريحىنان سىر تارتىپ، ۇلت رۋحىن ۇلىقتار پوەمالارى نەسىپبەك ايت ۇلىنىڭ قازاق رۋحانياتى ءۇشىن ورنىن بولەك، ورداسىن بيىك ەتتى. اقىننىڭ جۇرەگى بىلايشا الاسۇرعان:

سارعايا سارتاپ بولعان سۇيەگى ىستان.

مەن دە ءبىر دومبىرا ەدىم تيەگى ۇشقان.

بۇعاۋدا قىزىل ءتىلىم بۇلقىنعاندا.

باقسىداي الاسۇردىم يە قىسقان.

مەن-داعى ءبىر بەلگىمىن عاسىرداعى،

دۇركىرەپ داۋرەن كوشەر باسىمداعى.

ۇستامىن ەسكى ۇلگىمەن ولەڭ سوققان،

كوز جازباي كورگەنىمنەن جاسىمداعى.

ءومىرىم ولەڭىممەن بىرگە ورىلگەن،

ورنەگىن كەلتىرە الماس كىم كورىنگەن.

اقىننىڭ قۇپياسى وزىنە ايان،

ۇياسىن جۇرەگىنىڭ مۇڭ كەمىرگەن.

تۇرىكتىڭ ۇلى شايىرى ءجۇنىس ەمرەدەن قانشاما ولەڭ اۋدارىپ، ءتولتۋماعا اينالدىردى. شىعىستىڭ جارىق جۇلدىزى، تۇركى دۇنيەسىنىڭ عۇلاماسى الىشەر ناۋايدىڭ «ەسكەندىر قورعانىنان» باستاپ اۋدارۋى دا ەرەن ەرلىك. الىشەردىڭ بەس حامساسىن تۇگەل اۋدارماققا بەل بۋعان ەدى، ۇلگەرگەنىنشە اۋداردى. «بەس حامسا» شىقتى، كوزى تىرىسىندە. وزبەكستاننىڭ ناۋاي قالاسىنىڭ «قۇرمەتتى ازاماتى» اتانۋى دا ەڭبەگىنىڭ ەلەنگەنى شىعار. اتتەڭ، اباي وبلىسى مەن استانا قالاسىنىڭ دا «قۇرمەتتى ازاماتى» اتانۋىنا ەڭبەگى جەتىپ-اق تۇر ەدى، كەشىگىپ قالعان ءبىز بە، جەتپەي قالعان ۋاقىت پا؟!

2009 -جىلى «التىن تامىر» دەگەن جۋرنال اشتىق، بىرلەسىپ. ءبىرىنشى سانىنا داڭعايىر اقىن قاليحان التىنبايەۆتىڭ «ايقاس» اتتى حان باتىرى قابانبايعا ارنالعان پوەماسىن ماعان ىزدەتىپ، تاپتىرىپ باستىردى.

دارابوز قابانباي باباسىنا قۇرمەتى بولەك ەدى. اقىرى، سول قابانباي باباسى جاتقان ۇلتتىق پانتەونعا ءوزى دە بارىپ ماڭگىلىك قۇنداعىن تاپتى.

جالىقپاس قۋانىشتان، قايعىدان دا،

تىرشىلىك مىنەزىنەن اينىعان با؟

بايلىعى جولداس بولماس بۇل جالعاننىڭ،

قالامنان قايىر كۇتكەن ويلى جانعا.

جانسايا ىزدەمەدىم سالقىن بەلدەن،

قايتەمىن راحاتتى اركىم كورگەن.

ءسىمىرىپ ءسوز تۇنىعىن - ءشول قاندىرعام،

بابالار ءجۇزىپ ىشكەن التىن كولدەن.

وسىلايشا، نەسىپبەك اقىننىڭ بەس كۇندەگى تۇيگەنى ارتىنداعى الاشىنا امانات، ۇرپاعىنا مۇرا بولىپ قالعانى راس.

قازاق پوەزياسىنىڭ ءىلياس جانسۇگىروۆتەي كەڭ تىنىستى، الشاعىر ءجۇرىستى، اباي اتاسىنداي سىرشىل نەسىپبەك اقىننىڭ ەندى باستالعان شىعارماشىلىق عۇمىرىندا ءوزى جالعىزىنداي كورىپ جىرلاعان استاناسى الداعى ۋاقىتتا ەڭسەلى ەسكەرتكىشىن قويىپ، ەسىمىنە داڭعىل مەن مەكتەپ ۇسىنىپ دارىپتەيتىنىنە ەش كۇمانىم جوق! نەسىپبەك ايت ۇلىنىڭ شىعارماشىلىعىن سارالاعان عالىمدار، زيالىلار «بوستاندىق جىرىنىڭ بوزجورعاسى» اتاندىردى. لايىق باعاسى دا سول ەدى. ال نەساعاڭ ارقاسىنا ەر باتقاسىن بولعان قايقاڭ جورعا ەمەس، انا ءتىلىنىڭ ۋىزىنا جارىعان، اقىندىعى تۋا ءبىتتى تايپال جورعا بولاتىن! «قوزىكوشتەن» باستالعان جىر كەرۋەنى الىپتار كوشىنىڭ سوڭىندا توعاناعى توق كەتىپ بارا جاتقانىنا سەنىمدىمىن!

جاتقان جەرىڭ جارىق بولسىن، جانكوكەم!

داۋلەتكەرەي كاپ ۇلى،

اقىن، ق ر ەڭبەك سىڭىرگەن قايراتكەرى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى