نۇرتاي سابيليانوۆ اۋە كولىگى سالاسىنداعى ماسەلەلەردى اتادى

- اۋە كولىگى سالاسىندا مىناداي ماسەلەلەر بار: اۋەجاي جابدىقتارىنىڭ، تەحنيكالىق قۇرالدارى مەن ينفراقۇرىلىمىنىڭ ەسكىرۋى؛ اۆياوتىن قۇنىنىڭ جوعارى بولۋى؛ ءتيىمسىز جوسپارلاۋ؛ ۇشاقتاردىڭ جەتىسپەۋشىلىگى. بۇل ماسەلەلەردى دەپۋتاتتار ءجيى كوتەرۋدە. اسىرەسە، Air Astana مەن FlyArystan-نىڭ ءجيى كەشىگۋى، بيلەت قۇنىن قايتارۋدا تۇتىنۋشىلار قۇقىعىنىڭ بۇزىلۋى ۇنەمى بولىپ جاتىر. سوندىقتان وسىنداي ماسەلەلەرگە مينيسترلىك تاراپىنان شارا قولدانىلۋى كەرەك، - دەدى نۇرتاي سابيليانوۆ.

ونىڭ اتاپ وتۋىنشە، دەپۋتاتتار ەلىمىزدىڭ كولىك-لوگيستيكا الەۋەتىن دامىتۋ ماسەلەلەرىن بىرنەشە مارتە كوتەرگەن.

- ۇكىمەت پەن جەرگىلىكتى اتقارۋشى ورگانداردىڭ اتقارىپ وتىرعان شارۋاسىن كورىپ وتىرمىز. الايدا قازىرگى جاعدايدا بۇل جەتكىلىكسىز بولىپ تۇر. كەشەندى ءتاسىل جانە سىندارلى ۆەدومستۆوارالىق ءوزارا ءىس-قيمىل قاجەت. تەك جۇمىلا جۇمىس ىستەگەن كەزدە عانا ساپالى ينفراقۇرىلىم قۇرىپ، وسى باعىتقا سالىنعان ينۆەستيتسيانىڭ تيىمدىلىگىن قامتاماسىز ەتە الامىز، - دەدى ءماجىلىس دەپۋتاتى.

بۇعان دەيىن ءارتۇرلى كولىك تۇرلەرىنىڭ تەحنولوگيالىق ءبىرتۇتاستىعىن قامتاماسىز ەتەتىن كولىك-لوگيستيكا ورتالىقتارىن قۇرۋ قاجەتتىگىن جازعان ەدىك.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى