گەننادي گولوۆكين ساۋد ارابياسىنىڭ بوكس فەدەراتسياسىمەن كەزدەستى

ق ر ۇ و ك مالىمەتىنشە، ەر-ريادتاعى كەزدەسۋگە ساۋد ارابياسىنىڭ بوكس فەدەراتسياسىنىڭ پرەزيدەنتى ابدۋللا الاربي، ساۋد ارابياسى ۇ و ك باس حاتشىسىنىڭ كەڭسە ديرەكتورى ناسسەر مۋنير، World Boxing ۇيىمىنىڭ باس حاتشىسىنىڭ مىندەتىن اتقارۋشى مايك ماكاتتي جانە قازاقستان ۇ و ك باس حاتشىسى ءالىمجان اقايەۆ قاتىستى.

ساۋد ارابياسىنىڭ بوكس فەدەراتسياسى World Boxing ۇيىمىنا قوسىلعانىن راستادى. كەزدەسۋ بارىسىندا تاراپتار وليمپيادالىق بوكستىڭ بولاشاعىن، ونىڭ ىشىندە 2028-جىلى لوس-اندجەلەستە وتەتىن وليمپيادا ويىندارىنداعى مارتەبەسىن، سونداي-اق، بۇل سپورت ءتۇرىن قولداۋداعى ساۋد ارابياسىنىڭ ءرولىن تالقىلادى.

سونىمەن قاتار جاقىندا بوكستىڭ باحرەين-2025 جاس وسپىرىمدەر اراسىنداعى ازيا ويىندارىنا ەنگىزىلۋى دە نەگىزگى تاقىرىپتاردىڭ ءبىرى بولدى. گەننادي گولوۆكيننىڭ بۇل باستاماسى ايماقتىق دەڭگەيدە جانە Asian Boxing كونفەدەراتسياسىندا كەڭىنەن قولداۋ تاپتى. بۇدان بولەك، بوكستى يسلام ىنتىماقتاستىعى ويىندارىنىڭ باعدارلاماسىنا قوسۋ مۇمكىندىگى قاراستىرىلدى.

كەزدەسۋ بارىسىندا World Boxing ۇيىمىنىڭ بەدەلىن ارتتىرۋ بويىنشا جوسپارلى جۇمىستار جۇرگىزىلىپ جاتقانى اتاپ ءوتىلدى. ۇيىم ايماقتىق فەدەراتسيالاردى قۇرۋ جانە جاڭا ەلدەردى تارتۋ ارقىلى ءوز اۋقىمىن كەڭەيتۋدە. نەگىزگى ماقساتتاردىڭ ءبىرى - حالىقارالىق وليمپيادالىق كوميتەتىنىڭ (ح و ك) تولىققاندى مويىنداۋىنا قول جەتكىزۋ.

World Boxing وكىلدەرى ءادىل جانە اشىق تورەلىك جۇيەسىن قامتاماسىز ەتۋ بويىنشا اتقارىلىپ جاتقان جۇمىستار جونىندە مالىمەت بەردى. ۇيىم تورەشىلەر قۇرامىن جەتىلدىرۋ، بىلىكتىلىكتى ارتتىرۋ كۋرستارىن وتكىزۋ جانە جاساندى ينتەللەكتكە نەگىزدەلگەن زاماناۋي تەحنولوگيالاردى ەنگىزۋ باعىتىندا جۇمىس ىستەپ جاتىر. بۇل سۋبەكتيۆتى قاتەلىكتەردى ازايتىپ، جەكپە-جەكتەردىڭ ءادىل باعالانۋىن قامتاماسىز ەتەدى.

سونىمەن قاتار لوس-اندجەلەس-2028 وليمپياداسىنا ىرىكتەۋ جۇيەسى دە تالقىلاندى. قازىرگى ۋاقىتتا ىرىكتەۋ جۇيەسى ازىرلەنىپ جاتىر، ال كەلەسى جىلى جولدامالاردى ءبولۋ قۇرىلىمى ناقتى بەكىتىلەدى.

ساۋد ارابياسى قازاقستانمەن ەكىجاقتى ىنتىماقتاستىقتى دامىتۋ تۋرالى باستاما كوتەردى. بۇل ىنتىماقتاستىق بىرلەسكەن وقۋ-جاتتىعۋ جيىندارىن، سپاررينگ-سەسسيالار ۇيىمداستىرۋدى، سونداي-اق مەنەدجمەنت جانە باپكەرلىك قىزمەت بويىنشا تاجىريبە الماسۋدى قامتيدى.

- World Boxing فەدەراتسياسى ءوز جۇمىسىنىڭ نەگىزگى باعىتتارى مەن باسىمدىقتارىنا ەرەكشە نازار اۋدارىپ وتىر. ماڭىزدى سەرىكتەستەرمەن ىنتىماقتاستىقتى نىعايتۋ - باستى مىندەتتەرىمىزدىڭ ءبىرى. بۇگىنگى كەزدەسۋ ءبىزدىڭ ماقساتتارىمىز بەن قۇندىلىقتارىمىز كوپتەگەن ەلدىڭ قولداۋىنا يە ەكەنىن دالەلدەيدى. كوپتەگەن مەملەكەت بوكستىڭ تۇراقتى دامۋىنا مۇددەلى جانە ساۋد ارابياسىنىڭ World Boxing قۇرامىنا قوسىلۋى - يسلام الەمىندەگى بۇل سپورتتىڭ ىلگەرىلەۋى ءۇشىن ۇلكەن قادام. World Boxing وليمپيادالىق كوميسسياسىنىڭ ءتوراعاسى رەتىندە مەنىڭ باستى ماقساتىم - بوكستى وليمپيادا ويىندارىنىڭ باعدارلاماسىندا ساقتاۋ، - دەدى گەنناديي گولوۆكين.

ساۋد ارابياسىنىڭ بوكس فەدەراتسياسى ءوز كەزەگىندە World Boxing باستامالارىنا بەلسەندى قاتىسۋعا دايىن ەكەنىن ءبىلدىردى.

گەننادي گولوۆكين ا ق ش- قا بارىپ، جاتتىعۋ زالدارىن كورگەن بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى