ەندى ەسىرتكى بيزنەسىن ۇيىمداستىرعاندار ءومىر بويىنا بوستاندىعىنان ايىرىلادى

زاڭ جوباسىن تانىستىرعان سەناتور ناۋرىزباي بايقاداموۆ بۇل قۇجات «ەسىرتكى كومۋشىلەر» مەن ولاردى قىلمىسقا يتەرمەلەيتىندەردىڭ اراسىنداعى قىلمىستىق جاۋاپكەرشىلىكتى اجىراتۋ ءۇشىن ازىرلەنگەنىن ەسكە سالدى.

- قىلمىستىق كودەكستىڭ 297-بابىندا ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ قىلمىستارىنىڭ ءبىرقاتارى ءۇشىن جازا مەرزىمدەرى 2 جىل مەرزىمگە، ال كەيبىرىنە - 3 جىل مەرزىمگە تومەندەتۋ ارقىلى وزگەرتىلەدى. اتالعان قىلمىستار ءۇشىن مۇلىكتى تاركىلەۋ جازاسى ساقتالادى. قىلمىستىق كودەكس جاڭا 297-1-باپپەن تولىقتىرىلادى. ياعني، ەسىرتكى بيزنەسىن ۇيىمداستىرۋشىلار مەن ەسىرتكى جانە ەسىرتكى تەكتەستەردى وندىرۋشىلەردىڭ جازاسىن باس بوستاندىعىنان ايىرۋ مەرزىمىن ءومىر بويىنا دەيىن ۇلعايتۋ ارقىلى كۇشەيتىلەدى، - دەدى دەپۋتات.

ال 297-1-باپتىڭ قىلمىستارىن قىزمەت بابىن پايدالانىپ جاساعان لاۋازىمدى ادامدارعا مۇلكىن تاركىلەۋ، ون بەس جىلدان جيىرما جىلعا دەيىن نەمەسە ءومىر بويىنا باس بوستاندىعىنان ايىرۋ جازاسى كوزدەلگەن.

- زاڭدا قىلمىستىق كودەكستىڭ 301-بابىن تولىقتىرۋ ارقىلى، ەلدىڭ ىشىندە كۇشتى اسەر ەتەتىن زاتتاردىڭ زاڭسىز اينالىمى مەن ءوندىرىسى ءۇشىن جاۋاپكەرشىلىك بەلگىلەۋ كوزدەلەدى. قازىرگى ۋاقىتتا ولاردىڭ كونترابانداسى ءۇشىن عانا جاۋاپكەرشىلىك قاراستىرىلىپ كەلدى. «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە كۇشتى اسەر ەتەتىن زات ۇعىمى ەنگىزىلەدى. پروفيلاكتيكالىق ماقساتتا ەسىرتكى، پسيحوتروپتىق زاتتاردى، سول تەكتەستەردى، كۇشتى اسەر ەتەتىن زاتتاردى مەديتسينالىق ەمەس ماقساتتا تۇتىنۋعا تىيىم سالۋ بەلگىلەنەدى، - دەدى سەناتور.

زاڭ جوباسىندا زاڭناماداعى «پرەپارات» جانە «ۋىتقۇمارلىق» ۇعىمدارىن ناقتىلاۋ ۇسىنىلعان.

سونداي-اق، قۇرامىندا ەسىرتكى، پسيحوتروپتىق زاتتار مەن پرەكۋرسورلار بار دارىلىك پرەپاراتتارعا رەتسەپت بەرە الاتىن لاۋازىمدار مەن ۇيىمدار تىزبەسىن ايقىندايتىن مەملەكەتتىك ورگان بەلگىلەنبەك.

بۇعان دەيىن ىشكى ىستەر ۆيتسە-ءمينيسترى سانجار ءادىلوۆ ەسىرتكىمەن بايلانىستى قىلمىس ءۇشىن قاماۋدا وتىرعان جاس وسپىرىمدەردىڭ سانىن اتادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى