ەندى قۇمار ويىنعا اۋەس مەملەكەتتىك قىزمەتكەرلەردى اۆتوماتتى تۇردە انىقتايدى
استانا. KAZINFORM - قازاقستاندا ءباس تىگەتىن، ويىنقۇمار مەملەكەتتىك قىزمەتكەرلەردى ارنايى جۇيە ارقىلى انىقتايدى. بۇل تۋرالى تۋريزم جانە سپورت ۆيتسە-ءمينيسترى ەرجان ەركىنبايەۆ ءمالىم ەتتى.
- ارنايى جۇيە قۇراستىرىلادى، ويتكەنى قولمەن تەرىپ انىقتاۋ مۇمكىن ەمەس، سەبەبى تاۋلىك ىشىندە 50 مىڭعا جۋىق ءوتىنىم تۇسەدى. ونىڭ ىشىندە مەملەكەتتىك قىزمەتكەر مە، بورىشكەر مە نەمەسە اسكەري قىزمەتكەر مە ءبىر ساعاتتىڭ نەمەسە ءبىر كۇننىڭ ىشىندە انىقتاۋ مۇمكىن ەمەس. سوندىقتان ءبىزدىڭ مينيسترلىك اۆتوماتتاندىرىلعان جۇيە ازىرلەپ جاتىر، - دەدى ەرجان ەركىنبايەۆ سەناتتا وتكەن باسپا ءسوز ءماسليحاتىندا.
ۆيتسە-ءمينيستردىڭ مالىمدەۋىنشە، اتالعان جۇيە 3-4 ايدىڭ ىشىندە ىسكە قوسىلادى جانە ونىڭ كومەگىمەن ءباس تىككەن نەمەسە ويىنقۇمار ادامنىڭ كىم ەكەنىن جەدەل انىقتاۋعا بولادى.
- ال ازىرگە ءار ويىن سۋبەكتىلەرى قولمەن تەكسەرىپ جاتىر، - دەيدى ول.
سونداي-اق، ءمينيستردىڭ ورىنباسارى ءباس تىگەتىنى انىقتالعان مەملەكەتتىك قىزمەتكەردىڭ جۇمىستان قۋىلاتىنىن تىلگە تيەك ەتتى.
ايتا كەتەيىك، بۇگىن سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى ويىن بيزنەسى جانە ەلىمىزدە لوتەرەياعا قاتىستى قابىلدانعان زاڭناماعا ەنگىزىلگەن وزگەرىستەردى ىسكە اسىرۋ بارىسىن تالقىلادى.
ەسكە سالا كەتسەك، قازاقستاندىقتار ءوزىن 10 جىلعا دەيىن قۇمار ويىنداردان شەكتەي الادى.
