نازاربايەۆ كىتاپحاناسىنىڭ ورنىنان پرەزيدەنت ورتالىعى اشىلدى

«مەملەكەتتىڭ العاشقى تۇلعالارىنىڭ تاريحي مۇراسىن ساقتاۋ — الەمدىك تاجىريبە. اتالعان ءداستۇر پرەزيدەنت ورتالىقتارى مەن كىتاپحانالاردىڭ قىزمەتىندە كورىنىس تاپتى. تاريحي- مەموريالدى مەكەمەلەر ا ق ش، فرانسيا، تۇركيا، قىتاي، مالايزيا، ازەربايجان جانە الەمنىڭ باسقا ەلدەرىندە بار. ولار مۇراعات، كىتاپحانا جانە مۇراجاي فۋنكسياسىن بىرىكتىرە وتىرىپ، ۇلت كوشباسشىلارىنىڭ قىزمەتىنە قاتىستى قۇندى دەرەكتەردى، كىتاپ، كيىم ارتەفاكتىلەرىن ساقتايدى»دەلىنگەن حابارلامادا.

سونداي- اق ق ر پرەزيدەنتى ءىس باسقارماسى ا ق ش- تىڭ تاجىريبەسىن كەلتىرگەن. 1955 -جىلعى پرەزيدەنتتىك كىتاپحانالار تۋرالى زاڭعا سايكەس امەريكالىق پرەزيدەنتتەردىڭ مۇراسىن ساقتاۋ ميسسياسىن جۇزەگە اسىراتىن 15 مەكەمە جۇمىس ىستەيدى ەكەن.

ەڭ تانىمالى — نيۋ- يوركتەگى فرانكلين رۋزۆەلت، بوستونداعى دجون كەننەدي، كاليفورنياداعى رونالد رەيگان كىتاپحانالارى.

«جالپى الەمدىك داستۇرگە سۇيەنە وتىرىپ ەلىمىزدە ق ر تۇڭعىش پرەزيدەنتى كىتاپحاناسىنىڭ بازاسىندا تاۋەلسىز قازاقستان كوشباسشىلارىنىڭ تاريحي مۇراسىن ساقتاۋمەن، زەردەلەۋمەن جانە ىلگەرىلەتۋمەن اينالىسۋعا ارنالعان پرەزيدەنتتىك ورتالىق قۇرىلدى. وندا قازاقستان پرەزيدەنتتىگى ينستيتۋتىنا قاتىسى بار جادىگەرلەر ورتالىقتاندىرىلعان تۇردە ساقتالادى. جاڭادان قۇرىلعان ورتالىققا ەكس- پرەزيدەنت نۇرسۇلتان نازاربايەۆتىڭ جەكە مۇراعاتى مەن جەكە كىتاپحاناسىنىڭ ماتەريالدارى، سونداي- اق بۇرىن تۇڭعىش پرەزيدەنت كىتاپحاناسىندا ساقتالعان مۇراجاي ەكسپوناتتارىنىڭ جيناعى بەرىلدى. بۇگىنگى تاڭدا قوردا 150 مىڭنان استام مۇراعات قۇجاتتارى، 40 مىڭ كىتاپ جانە 12 مىڭ مۇراجاي زاتتارى بار»، — دەيدى باسقارمادان.

رەسمي اقپاراتتا ايتىلعانداي، بولاشاقتا جاڭا ورتالىققا تاريحي- مادەني قۇندىلىعى بار جەكە قۇجاتتار مەن قازىرگى پرەزيدەنتتىڭ كەرەك- جاراقتارى دا بەرىلەدى. الداعى ۋاقىتتا قازاقستاننىڭ كەلەسى پرەزيدەنتتەرىنىڭ قىزمەتى تۋرالى ءتيىستى ماتەريالدار جيناقتالادى.

«ورتالىقتا قازاقستان كوشباسشىلارىنىڭ قۇجاتتارىمەن قاتار تاۋەلسىزدىك تاريحىنا قاتىستى ماتەريالداردى جيناۋ، جۇيەلەۋ جانە زەردەلەۋ جوسپارلانىپ وتىر. وسىلايشا پرەزيدەنت ورتالىعى قازاقستاننىڭ قازىرگى ساياسي تاريحىنا ارنالعان ءىرى تاريحي- مەموريالدى، عىلىمي جانە مادەني- اعارتۋ ورتالىعىنا اينالۋدى ماقسات ەتىپ وتىر» دەپ تۇسىندىرىلگەن حابارلامادا.

باسقارمانىڭ مالىمەتىنە سۇيەنسەك، پرەزيدەنت ورتالىعىنىڭ كىتاپحاناسى دا قىزىعۋشىلىق تۋعىزادى، وندا پرەزيدەنتتىك ينستيتۋت، مەملەكەتتىك قۇرىلىستىڭ تەورياسى مەن پراكتيكاسى، قازاقستان مەن ورتالىق ازيا ەلدەرىنىڭ مەملەكەتتىلىك تاريحى بويىنشا عىلىمي جانە مەرزىمدى باسىلىمدار شوعىرلانادى.

سونىمەن قاتار الەمنىڭ جەتەكشى كىتاپحانالارىنىڭ نىسانالى قورىنا قاشىقتان قول جەتكىزۋگە بولادى.

عالىمدار مەن ستۋدەنتتەر پرەزيدەنت ورتالىعىنان ديسسەرتاتسياسى مەن عىلىمي زەرتتەۋلەرى ءۇشىن وسى تاقىرىپتا سيرەك كەزدەسەتىن جانە بىرەگەي ماتەريالداردى تابا الادى.

«بۇل رەتتە ورتالىقتىڭ قىزمەتى كورسەتىلگەن باعىتتارمەن شەكتەلمەيدى. ول ءبىزدىڭ قوعامدى تولعاندىراتىن وزەكتى ماسەلەلەردى تالقىلاۋ ءۇشىن جەتەكشى ساراپتامالىق الاڭعا اينالۋعا ءتيىس. وسكەلەڭ ۇرپاققا ءبىلىم بەرۋ جانە تاربيە جۇمىسىنا كوپ كوڭىل بولىنەدى. ورتالىق رەسپۋبليكالىق بيۋدجەتتەن قارجىلاندىرىلادى. بۇگىندە شتات سانى مەن قارجىلاندىرۋ سوماسى قارالىپ جاتىر» دەيدى باسقارمادان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى