ناپولەوننىڭ قالپاعى اۋكسيوندا 2 ميلليون ەۋروعا ساتىلدى
فرانسۋز يمپەراتورى 1-ناپولەون بوناپارتتىڭ قالپاعى فرانسيا استاناسى اۋماعىنداعى فونتەنبلو كوممۋناسىندا وتكەن اۋكسيوندا 1,9 ميلليون ەۋرودان استام اقشاعا ساتىلدى.
بۇل تۋرالى Osenat اۋكسيون ءۇيى ءمالىم ەتتى، دەپ حابارلايدى Kazinform اگەنتتىگى Euronews باسىلىمىنا سىلتەمە جاساپ.
فرانسۋز يمپەراتورى ناپولەون بوناپارت كيگەن تانىمال قالپاقتاردىڭ ءبىرى فرانسيا استاناسى اۋماعىنداعى فورتەنبلو كوممۋناسىندا جەكسەنبى كۇنى بولعان اۋكسيوندا 1932000 ەۋروعا ساتىلىپ رەكورد ورناتتى.
قالپاق شامامەن 1810-جىلدان بەرى ساقتالىپ كەلەدى.
اۋكسيون ءۇيى سايتىنداعى اقپارات بويىنشا، اۋەلدە لوت 600-800 ەۋروعا باعالانعان.
اق-كوك-قىزىل كوكاردامەن بەزەندىرىلگەن، كيىزدەن جاسالعان باس كيىم جان لۋي نۋازە توپتاماسىنداعى ناپولەون زاتتارىنىڭ ىشىندە ەڭ قىمباتقا ساتىلدى.
بىلتىر قايتىس بولعان فرانسۋز ونەركاسىپ يەسى توپتامانى جارتى عاسىردان استام ۋاقىت جيناعان.
اۋكسيونعا قويىلعان باسقا زاتتاردىڭ قاتارىندا 1815-جىلى ۆاتەرلوو تۇبىندەگى ايقاستا جەڭىلگەننەن كەيىن ونىڭ كۇيمەسىنەن ۇرلاپ اكەتىلگەن كۇمىس تارەلكە مەن ۇستارا، كۇمىس ءتىس شەتكاسى، قايشى مەن باسقا دا جەكە زاتتارى سالىنعان ۇستەل بولدى.
اۆتور
بالنۇر قوجاگەلدى
