ناۋرىزناما: قازاقستان - ىنتىماعى جاراسقان ۇلتتار مەكەنى

 Kazinform ءتىلشىسى قازاقستانداعى ىنتىماعى جاراسقان ۇلتتارعا ورتاق دۇنيەلەرگە ءۇڭىلىپ كورگەن ەدى.

ناۋرىز مەيرامى - ەلىمىزدەگى بارلىق ۇلت وكىلىن جاڭارۋ، بىرلىك جانە ىزگىلىك سەكىلدى قۇندىلىقتار ارقىلى بىرىكتىرەدى. ىنتىماقتى نىعايتۋعا ىقپال ەتەتىن بىرنەشە نەگىزگى اسپەكت بار:

ورتاق داستۇرلەر مەن قۇندىلىقتار. ناۋرىز - كوكتەمگى جاڭارۋ مەن جاڭا ءومىردىڭ، دوستىق پەن تاتۋلىقتىڭ بەلگىسى. بۇل - قازاقستاندا ءومىر سۇرەتىن بارلىق ەتنوسقا جاقىن مەرەكە.
قوناقجايلىلىق پەن داستارقان جايۋ. مەرەكە كۇندەرى ادامدار ءبىر- ءبىرىن قوناققا شاقىرىپ، ءداستۇرلى تاعامدار ازىرلەيدى، حالىقتىڭ ىنتىماعى نىعايا تۇسەدى.
مادەني ارتۇرلىلىك. مەرەكە اياسىندا كونتسەرتتەر، جارمەڭكەلەر مەن ۇلتتىق ويىندار وتكىزىلەدى. ءارتۇرلى ەتنوس وزدەرىنىڭ داستۇرلەرىن، ۇلتتىق كيىمدەرى مەن ادەت- عۇرپىن كورسەتەدى.
بىرلىك پەن بەيبىتشىلىك يدەياسى. قازاقستان ءتۇرلى ۇلت وكىلىنىڭ ءبىر شاڭىراق استىندا بەيبىت ءومىر سۇرۋىمەن تانىمال، ال ناۋرىز - ۇلتارالىق كەلىسىمنىڭ، ءوزارا قۇرمەت پەن قوعام بىرلىگىنىڭ سيمۆولى.
جالپى حالىقتىق سەرۋەندەر. مەرەكە كۇندەرى قازاقستان حالقى كوشەگە شىعىپ، جاپپاي مەرەكەلەيدى. بۇل مادەني شەكارالاردى جويىپ، ۇلت پەن ۇلىس وكىلدەرى اراسىنداعى دوستىق قارىم- قاتىناستى نىعايتادى.
سەنات دەپۋتاتى گەنناديي شيپوۆسكيح اتاپ وتكەندەي، قازاقستان - ىنتىماعى جاراسقان ۇلتتار تۇراتىن ىستىق ۇيا.

- ناۋرىز مەيرامى - بارشا قازاقستاندىقتى جاقىنداتاتىن مەرەكە. قازاقى جاڭا جىل دەسەك ارتىق بولماس، 22-ناۋرىزدا كۇن مەن ءتۇن تەڭەسەدى. ناۋرىز مەيرامىن تويلاۋدىڭ ونكۇندىگى بەكىتىلگەن. ونىڭ اياسىندا ءان كۇن ەرەكشە اتالىپ وتەدى. ناۋرىزناماداعى ءاربىر ءىس- شارا ۇلتتاردىڭ ءوزارا سىيلاستىعى مەن قۇرمەتىن ارتتىرىپ، قازاقستانداعى تاتۋلىق پەن كەلىسىمنىڭ نىعايۋىنا سەپتىگىن تيگىزەدى.

سونداي-اق مەيىرىمدىلىك، قوناقجايلىلىق، قول ۇشىن سوزۋ - ناۋرىزدىڭ نەگىزگى قۇندىلىقتارى، سەبەبى بۇل قازاق حالقىمەن قاتار، ەلىمىزدەگى بارلىق ەتنوس ءۇشىن ورتاق ۇستانىمدار. سوندىقتان ناۋرىز مەيرامى قازاقستاندا حالىقتار دوستىعىنىڭ سيمۆولى رەتىندە اتالىپ وتەدى. ويتكەنى، ءاربىر ادام ۇلتى مەن دىنىنە قاراماستان، ءبىر- بىرىنە قۇرمەت كورسەتىپ، ىنتىماقتاستىقتى ارتتىرۋعا ۇلەس قوسادى. وسىلايشا، ناۋرىز مەيرامى قازاقستان حالقى اراسىندا دوستىق پەن بىرلىكتى نىعايتىپ، ەلدەگى بەيبىتشىلىكتىڭ ودان ءارى ساقتالۋىنا ىقپال ەتەدى. ءوز باسىم ناۋرىز مەيرامىن اسىعا كۇتەمىن، جانىما جاقىن، - دەدى دەپۋتات.

ناۋرىز مەيرامىن ءوزىنىڭ وتباسى قالاي اتاپ وتەتىنىن دە ايتتى.

- مەرەكە كۇندەرى جۇبايىم ناۋرىز كوجە پىسىرەدى، ەت اسادى. ورتالىق الاڭعا شىعىپ، حالىقپەن بىرگە مەيرامداپ، ناۋرىز كوجە ءىشىپ قايتامىز، - دەيدى.

ناۋرىز مەيرامىن اسىعا كۇتەتىن وتانداستارىمىزدىڭ ءبىرى - قازاقستان حالقى اسسامبلەياسىنىڭ وكىلى، نەمىس ەتنومادەني بىرلەستىگىنىڭ مۇشەسى، «ۆوزروجدەنيە» قوعامدىق قورى قامقورشىلىق كەڭەسى ءتوراعاسىنىڭ ورىنباسارى ۆلاديسلاۆ ۆەبەر.

- ءوزىم سولتۇستىك قازاقستان وبلىسىندا، اۋىلدا وسكەنمىن. بالا كۇنىمنەن بىلەم، ناۋرىز مەيرامىن اۋىل بولىپ تويلايتىنبىز. مەكتەپتە مەرەكەلىك كونسەرت بولاتىن، مادەنيەت ۇيىندە ءتۇرلى ءىس- شارالار وتەتىن، ودان بولەك ۇلتتىق سپورت تۇرلەرىنەن جارىس بولاتىن، اۋىل شەتىنە شىعىپ بايگە كورەتىنبىز. ناۋرىز - قازاقستانداعى بارلىق ۇلتتى بىرىكتىرەتىن مەيرام، - دەيدى ول.

اسسامبلەيا وكىلى مەرەكەلەردى ءبولىپ-جارمايتىنىن ايتا كەلە، جانىنا جاقىن ءۇش مەيرامدى اتادى.

- روجدەستۆو، ناۋرىز مەيرامى جانە پاسحا. ناۋرىز مەيرامىندا ءبىز قازاق دوستارىمىزعا قوناققا بارامىز، پاسحادا ولار بىزگە قوناققا كەلەدى. ناۋرىز مەيرامىن دوستىق كوپىرى دەسەم بولادى. بۇل كۇنى ءداستۇرلى تۇردە ەت اسامىز، باۋىرساق پىسىرىلەدى، قىمىز ىشەمىز. سونىمەن قاتار ۇلتتىق كيىممەن مادەني ءىس- شارالارعا قاتىسامىز، - دەيدى ۆلاديسلاۆ ۆەبەر.

ۇلتتار ىنتىماقتاستىعىن تەرەڭدەتۋدە قازاقستان حالقى اسسامبلەياسىنىڭ ورنى بولەك. مەملەكەت باسشىسى ايتقانداي، قازاقستان حالقى اسسامبلەياسى - مەملەكەتتىلىك پەن بىرلىكتىڭ ىرگەتاسىن نىعايتاتىن نەگىزگى ينستيتۋت. ق ح ا - مەملەكەتتىك جانە قوعامدىق قۇرىلىم جۇيەسىندەگى رولى بويىنشا، ەڭ الدىمەن مەملەكەتتىك ورگان مەن قوعامدىق ينستيتۋتتاردىڭ مۇمكىندىكتەرىن ۇيلەستىرەتىن ەتنوسارالىق كوممۋنيكاتسيالاردىڭ جالپى ۇلتتىق الاڭى.

ايتا كەتەيىك، بۇگىندە ەلىمىزدە 21 ەتنومەدياتسيا ورتالىق، 21 ەتنومەدياتسيا كەڭەسى جۇمىس ىستەپ تۇر. سول سياقتى ەتنومەدياتسيا ورتالىقتارى مەن كەڭەستەرىنىڭ كادرلىق قۇرامى قالىپتاستىرىلدى، ونىڭ قۇرامىنا كاسىبي مەدياتورلار، زاڭگەرلەر، پەداگوگتەر، پسيحولوگتەر، ءدىنتانۋشىلار، جۋرناليستەر مەن قوعامدىق پىكىر كوشباسشىلارى كىردى.

ءىرى قالالاردان بولەك، اۋىلدىق وكرۋگ اكىمدەرى، ۋچاسكەلىك ينسپەكتورلار، مەكتەپ ديرەكتورلارى مەن مەڭگەرۋشىلەرى، ءاربىر ەلدى مەكەننىڭ يمامدارى، وڭىرلىك ەتنومەدياتسيا كەڭەستەرىنىڭ مۇشەلەرى جانە اسسامبلەيا وكىلدەرى ءۇشىن ەتنومەدياتسيانىڭ بازالىق نەگىزدەرى بويىنشا سەمينار- ترەنينگتەر وتكىزىلىپ تۇرادى.

ەسكە سالساق، بىلتىردان بەرى ناۋرىز مەرەكەسى ەلىمىزدە «ناۋرىزناما» دەيتىن اتاۋمەن ون كۇن قاتارىنان تويلانا باستادى.

ادەتتەگىدەي، بيىل ەلىمىزدىڭ تۇكپىر- تۇكپىرىندە ناۋرىز مەيرامى كەڭ كولەمدە تويلانىپ، جۇزدەگەن مادەني ءىس-شارا وتەدى.

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى