نەپالدا ءزىلزالادان 120 دان استام ادام قازا تاپتى
نەپالدا بولعان ءزىلزالادان 120 دان استام ادام مەرت بولدى، ونداعان تۇرعىن جاراقات الدى. Kazinform بۇل تۋرالى DW باسىلىمىنا سىلتەمە جاساپ حابارلايدى.
4-قاراشادا، سەنبىگە قاراعان ءتۇنى نەپالدىڭ باتىسىندا جويقىن ءزىلزالا بولىپ، 128 ادام قازا تاپتى، ونداعان تۇرعىن جارالاندى، دەپ حابارلادى جەرگىلىكتى بيلىك.
نەپالدىڭ جەر سىلكىنىسىنە مونيتورينگ جاساۋ جانە زەرتتەۋ ۇلتتىق ورتالىعى 6,4 بالدىق ءزىلزالانى تىركەدى.
ولاردىڭ دەرەگى بويىنشا، ءزىلزالا ەپيتسەنترى نەپال استاناسى كاتماندۋدان 400 شاقىرىم جەردە ورنالاسقان دجاياركوت اۋدانىندا بولعان. ا ق ش گەولوگيا قىزمەتى ءزىلزالا ماگنيتۋداسىن 5,6 دەپ، ءۇندىستان سەيسمولوگيا ورتالىعى - 6,4, پوتسدامداعى نەمىستىڭ گەوفيزيكانى زەرتتەۋ ورتالىعى (Geoforschungszentrum, GFZ) 6,2 دەپ باعالادى.
ءۇيىندى استىندا ءالى دە ادامدار بار ەكەنىن ەسكەرسەك، قۇرباندار سانى ارتۋى مۇمكىن.
باق حابارلاۋىنشا، نەپالداعى جەراستى ءدۇمپۋىن ءتىپتى ءۇندىستان استاناسى نيۋ- دەلي تۇرعىندارى دا سەزگەن.
ۇكىمەت ىزدەۋ- قۇتقارۋ جۇمىستارىنا كومەكتەسۋ ءۇشىن قاۋىپسىزدىك كۇشتەرىن جىبەردى.
نەپالدا ءزىلزالا ءجيى بولادى. 2015 -جىلى 7,8 بالدىق جەر سىلكىنىسىنەن 9000 عا جۋىق ادام قازا تاۋىپ، ميلليونداعان عيمارات زاقىمدالعان بولاتىن.
