نەگە قوزعالمايدى، رەزەڭكە قولتىراۋىن شىعار: الماتى زووباعى قاۋەسەتكە جاۋاپ بەردى

زووباق قىزمەتكەرلەرىنىڭ ايتۋىنشا، شىنىندا دا، ول بىرنەشە ساعات بويى قيمىلداماي، قوزعالىسسىز جاتادى.

«فيدەل 1986-جىلى تۋعان، ول بىزگە 2001-جىلى لاتۆيا ەلىنىڭ ريگا قالاسىنداعى حايۋاناتتار باعىنان اكەلىندى. قازىر 37 جاستا جانە ۇزىندىعى شامامەن 2,5 مەترگە جەتەدى. فيدەلدىڭ راتسيونىندا سيىر ەتى، تاۋىق ەتى جانە بالىق بار. فيدەل اپتاسىنا ءبىر رەت، كەيدە ەكى اپتادا ءبىر رەت قورەكتەنەدى. سەبەبى، ءبىز تاماق ۇنەمدەيتىندىكتەن ەمەس، ول اپتا بويى قوزعالىسسىز جاتىپ، جەگەنىن قورىتادى»، - دەپ اتاپ ءوتتى زووباقتان.

تابيعاتتا قولتىراۋىندار از قوزعالاتىن ءومىر سالتىن ۇستانادى جانە كۇندەلىكتى قورەكتەنبەيدى.

«مۇنداي ساتتەرىن بىزگە كەلۋشىلەر سۋدا نەمەسە جاعالاۋدا تويىمدى تۇسكى استان كەيىن ءجيى كورەدى. قولتىراۋىندار تاماقتى كۇندەلىكتى جەپ، شامادان تىس قورەكتەنەتىن بولسا ول سەمىرىپ، جۇرەك، قان تامىرلارى مەن اسقازان-ىشەك جولدارىنىڭ اۋرۋلارى پايدا بولا باستايدى. قولتىراۋىندى ۇزاق باقىلاپ، وعان قاراپ تۇرساڭ اندا-ساندا كوزىن اشىپ-جۇمىپ، اۋزىن قاتتى اشىپ، جاۋىپ تۇراتىنىن كورۋگە بولادى»، - دەيدى ماماندار.

الماتى حايۋاناتتار باعىندا قولتىراۋىنداردىڭ ءۇش ءتۇرى بار: كۋبالىق، سيامدىق جانە كايمان قولتىراۋىنى.

ءبىراز كۇندە ولار جىلى ءارى جايلى قىسقى تۇراقتارىنا ورنالاستىرىلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى