چەمپيوندار ليگاسى: مباپپەنىڭ ءۇش گولى «رەال مادريدكە» جەڭىس سىيلادى

سوڭعى ءتورت جولداماعا «رەال مادريد» (يسپانيا)، «بورۋسسيا دورتمۋند» (گەرمانيا)، «پاري سەن- جەرمەن» (فرانسيا)، پسۆ (نيدەرلاند) يە بولدى.

يسپانيالىق «رەال مادريد» پلەي- وفف ساتىسىندا انگليانىڭ «مانچەستەر سيتي» كومانداسىمەن كەزدەسكەن ەدى. العاشقى ويىندا كارلو انچەلوتتي شاكىرتتەرى اعىلشىندىق ۇجىمدى 3:2 ەسەبىمەن تىزە بۇكتىردى.

كەزدەسۋ بارىسىندا «رەال مادريد» ساپىنان كيليان مباپپە 4، 33. 61-مينۋتتاردا حەت- تريكتىڭ اۆتورى اتانىپ، جارىستىڭ كەلەسى ساتىسىنا بەرىلەتىن جولداما تاعدىرىن ەرتەرەك شەشىپ قويدى. وعان «مانچەستەر سيتي» قۇرامىنان نيكو گونسالەس 90-مينۋتتا ءبىر گولمەن جاۋاپ قايىردى.
وسىلايشا يسپانيالىق كلۋب قارسىلاسىنان 3:1 ەسەبىمەن باسىم ءتۇستى.

سونداي-اق فرانسيانىڭ «پاري سەن- جەرمەنى» ءوز الاڭىندا سول ەلدىڭ «برەستىن» 7:0 (ءبىرىنشى ويىن 3:0)، نيدەرلاندتىق پسۆ يتاليانىڭ «يۋۆەنتۋسىن» 3:1 (ءبىرىنشى ويىن 1:2) جەڭسە، گەرمانيالىق «بورۋسسيا دورتمۋند» پورتۋگاليانىڭ «سپورتينگىمەن» 0:0 ەسەبىمەن (ءبىرىنشى ويىن 3:0) تەڭ ءتۇستى.

ايتا كەتسەك، پلەي- وفف ساتىسىنىڭ العاشقى ويىن كۇنىندە «فەيەنوورد» (نيدەرلاند)، «باۆاريا» (گەرمانيا)، «بەنفيكا» (پورتۋگاليا)، «بريۋگگە» (بەلگيا) كوماندالارى شيرەك فينالعا شىقتى.

ەندى ولاردىڭ قاتارىنا نەگىزگى كەزەڭدە العاشقى سەگىزدىككە بولىپ، 1/8 فينالعا بىردەن جولداما العان «ليۆەرپۋل» (انگليا)، «بارسەلونا» (يسپانيا)، «ارسەنال» (انگليا)، «ينتەر» (يتاليا)، «اتلەتيكو مادريد» (يسپانيا)، «بايەر» (گەرمانيا)، «ليلل» (فرانسيا)، «استون ۆيللا» (انگليا) كلۋبتارى قوسىلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى