ميرزيەۆ قازاقستانمەن بىرلەسىپ جاسىل ەنەرگيانى ەكسپورتتاۋ كەلىسىمىن ماقۇلدادى
تاشكەنت. KAZINFORM - وزبەكستان پرەزيدەنتى شاۆكات ميرزيەۆ قازاقستان جانە ازەربايجانمەن بىرلەسىپ جاسىل ەنەرگيانى ەكسپورتتاۋ بويىنشا ستراتەگيالىق ىنتىماقتاستىق كەلىسىمىن بەكىتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ايتا كەتسەك، مەملەكەت باسشىلارى ەكولوگيالىق تازا ەنەرگيانى ەۋروپالىق وداق ەلدەرىنە ەكسپورتتاۋ كەلىسىمىنە بىلتىر قاراشادا قول قويعان بولاتىن.
قۇجاتقا ساي، اتالعان ءۇش مەملەكەت كۇن، جەل جانە سۋ ەلەكتر ستانسياسى سياقتى ەكولوگيالىق تازا كوزدەردەن وندىرىلگەن ەلەكتر ەنەرگياسىن ەكسپورتتاماق. ول ءۇشىن الدىمەن كاسپي تەڭىزىنىڭ استىمەن جوعارى ۆولتتى كابەل تارتۋ جوسپارلانىپ وتىر.
ەسكە سالايىق، بۇعان دەيىن ق ر ەنەرگەتيكا مينيسترلىگى كاسپي تۇبىمەن كابەل وتكىزۋ جوباسىن ىسكە اسىرۋ ماقساتىندا تەحنيكالىق تاپسىرما ازىرلەنگەنىن مالىمدەگەن بولاتىن.
