مينيستر كيىكتەردىڭ ءمۇيىزىن قايدا ساتۋدى جوسپارلاپ وتىرعانىن ايتتى
ەلىمىزدە كيىك مۇيىزدەرىن سىرتقا ساتۋ جاعى قاراستىرىلىپ جاتىر. رۇقسات الۋ 2025 -جىلعا جوسپارلانعان، دەپ حابارلايدى Kazinform.
«كيىك مۇيىزدەرى فارماتسيەۆتيكاداعى ءداستۇرلى كومپونەنت ءارى شىعىس ەلدەرىندەگى، نەگىزىنەن قىتايدا ءدارى-دارمەكتەردىڭ قۇرامداس بولىگى سانالادى. بۇگىندە كيىك مۇيىزدەرىن ەكسپورتتاۋعا مۇمكىندىگىمىز جوق. «سيتەس» سيرەك كەزدەسەتىن جانۋارلاردى قورعاۋ جونىندەگى حالىقارالىق ۇيىمى جەكەلەگەن جانۋارلاردى قولدانۋعا (ونىڭ ىشىندە كيىك تە بار) تىيىم سالدى»، - دەدى ەكولوگيا جانە تابيعي رەسۋرستار ءمينيسترى ەرلان نىسانبايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق مينيستر بۇگىندە جەنيەۆادا كيىكتەردىڭ ءمۇيىزىن پايدالانۋعا تىيىم سالۋدى الىپ تاستاۋ تۋرالى ماسەلە تالقىلانىپ جاتقانىن ايتتى.
«رۇقسات الۋ مەرزىمى 2025 -جىلدىڭ باسى. بۇگىنگى تاڭدا كيىكتەردىڭ سانىن رەتتەۋدەن العان بارلىق ءمۇيىز تاڭبالانىپ، «وحوتزووپروم» مامانداندىرىلعان كاسىپورنىنىڭ ارنايى ءۇي-جايلارىندا ساقتالادى. قازىر كيىكتەردىڭ مۇيىزدەرىن ساتپايمىز، ءبىراق بولاشاقتا كيىكتەردىڭ مۇيىزدەرىن سىرتقى نارىققا ساتۋدى جوسپارلاپ وتىرمىز»، - دەيدى ول.
