مينيستر: بەلارۋس تاراپىنىڭ جۇك تاسىمالداۋشىلاردى ەۋروپاعا وتكىزبەۋىن كەدەرگى دەپ باعالايمىن
ساۋدا جانە ينتەگراتسيا ءمينيسترى ارمان شاققاليەۆ سەنات وتىرىسىنان كەيىن وتكەن بريفينگىدە ەۋروپاعا جۇك تاسىمالداپ جۇرگەن قازاقستاندىق كولىكتەردىڭ بەلارۋس شەكاراسىندا قاڭتارىلۋىنا بايلانىستى پىكىر ءبىلدىردى، دەپ Kazinform.
«8-قاڭتاردان باستاپ وسىنداي ماسەلە بولىپ تۇر. قازىرگى تاڭدا ونى رەسەي جانە بەلارۋس تاراپىنداعى ارىپتەستەرىمىزبەن تالقىلاپ جاتىرمىز. بۇل ماسەلەنى ءبىز كەدەرگى جونىندەگى كوميسسياعا رەسمي تۇردە جىبەرەمىز. بۇگىندە ولاردان جاۋاپ كۇتىپ جاتىرمىز. مەنىڭشە، ءوز پىكىرىم، بۇل - كەدەرگى. تەحنيكالىق بارەر دەيدى عوي، بۇل - بارەر. ولاي بولماۋ كەرەك»، - دەدى مينيستر.
ۆەدومستۆو باسشىسى ماسەلە وڭ شەشىلمەسە، بەلارۋس تاراپىنىڭ بۇل ارەكەتىن رەسمي تۇردە كەدەرگى دەپ تانيتىندارىن ايتادى.
«بۇل ەۋرازيالىق ەكونوميكالىق وداقتىڭ ينتەگراتسيا شارتتارىنا سايكەس كەلمەيدى. ءبىراق ءبىزدىڭ ارىپتەستەر (بەلارۋس تاراپى - رەد.) بۇل قاۋىپسىزدىكتىڭ ماسەلەلەرى دەپ وتىر. شارتتىڭ 29-بابىندا ونداي نەگىزدەمە بار ەكەنىن ايتىپ وتىر. ءبىراق بۇل ماسەلەنى ءبىز باسقاشا قارايمىز. بۇل تاۋار قوزعالىسىن شەكتەيدى. ماسەلەنى ءتيىستى دەڭگەيدە رەتتەي الماساق، رەسمي تۇردە كوميسسيا قاراۋىنا كەدەرگى رەتىندە ەنگىزەمىز»، - دەدى ارمان شاققاليەۆ.
اۆتور
ەسىمجان ناقتىباي
