مومىش ۇلى، قوشقاربايەۆ، نۇرماعامبەتوۆ: «ايبىن» وردەنىنە باتىرلاردىڭ ەسىمى بەرىلدى

زاڭدى تانىستىرعان ءماجىلىس دەپۋتاتى باقتىقوجا ىزمۇحامبەتوۆ اتالعان جاڭاشىلدىقتار ءۇشىنشى ۇلتتىق قۇرىلتايدىڭ شەشىمى نەگىزىندە قولعا الىنعانىن اتاپ ءوتتى.

«اتالعان زاڭ جوباسى مەملەكەتتىك ناگرادالار جۇيەسىن جەتىلدىرۋگە باعىتتالعان جانە ول ارقىلى «ايبىن» وردەنىنىڭ ءارتۇرلى دارەجەلەرىنە ساعادات نۇرماعامبەتوۆ، باۋىرجان مومىش ۇلى جانە راحىمجان قوشقاربايەۆ ەسىمدەرىن بەرۋ جونىندە وزگەرىستەر مەن تولىقتىرۋ ەنگىزىلمەك. اتاپ ايتقاندا، وردەننىڭ ءبىرىنشى دارەجەسىنە ساعادات نۇرماعامبەتوۆتىڭ، ەكىنشى دارەجەسىنە - باۋىرجان مومىش ۇلىنىڭ، ءۇشىنشى دارەجەسىنە - راحىمجان قوشقاربايەۆتىڭ ەسىمى بەرىلەدى»، - دەدى ول.

سونداي- اق، ول زاڭ جوباسى كونستيتۋتسياعا، مەملەكەت راتيفيكاتسيالاعان حالىقارالىق شارتتارعا، حالىقارالىق ۇيىمداردىڭ شەشىمدەرىنە قايشى كەلمەيتىنىن ايتتى.

«ساعادات نۇرماعامبەتوۆ - كەڭەس وداعىنىڭ باتىرى (1945)، قازاقستان رەسپۋبليكاسىنىڭ ءبىرىنشى قورعانىس ءمينيسترى (1992-1995)، حالىق قاھارمانى (1994)، قازاقستان رەسپۋبليكاسى ارمياسىنىڭ گەنەرالى (1993). باۋىرجان مومىش ۇلى - قىزىل ارميا كومانديرى، پانفيلوۆشى، پولكوۆنيك (1943)، كەڭەس وداعىنىڭ باتىرى (بۇل اتاق 1990 -جىلى، قايتىس بولعاننان كەيىن بەرىلدى). راحىمجان قوشقاربايەۆ - قىزىل ارميا وفيتسەرى، رەيحستاگ باسپالداعىندا جەڭىس تۋىن بىرىنشىلەردىڭ ءبىرى بولىپ كوتەردى، حالىق قاھارمانى (1999). ءبىزدىڭ سايىپقىران ەرلەرىمىزدىڭ، وتان قورعاۋشىلارىمىزدىڭ ەسىمىن بەرۋدەگى تاڭداپ الىنعان كەزەكتىلىك ولاردىڭ داڭقتى جاۋىنگەرلىك ەرلىگىنە بايلانىستى»، - دەدى باقتىقوجا ىزمۇحامبەتوۆ.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى