مولدوۆا قازاقستاندا ەلشىلىگىن اشۋدى جوسپارلاپ وتىر
ورال. KAZINFORM - مولدوۆا رەسپۋبليكاسىنىڭ سىرتقى ىستەر مينيسترلىگى جاقىن ارادا قازاقستاندا ديپلوماتيالىق وكىلدىك اشۋ بويىنشا قارقىندى جۇمىس جۇرگىزىپ جاتىر، دەپ حابارلادى مولدوۆا پرەمەر-ءمينيسترىنىڭ ورىنباسارى جانە سىرتقى ىستەر مينيسترلىگىنىڭ باسشىسى ميحاي پوپشوي.
Moldova1 قوعامدىق تەلەارناسىندا ميحاي پوپشوي جاڭا ەلشىلىكتىڭ اشىلۋى مولدوۆاعا ورتالىق ازيا ەلدەرىمەن جانە مولدوۆامەن جاقسى سەرىكتەستىك قارىم-قاتىناس ورناتقان قازاقستانمەن مادەني جانە ەكونوميكالىق بايلانىستاردى كەڭەيتۋگە مۇمكىندىك بەرەتىنىن ايتتى.
«ءبىز قازىر قازاقستاندا ەلشىلىك اشۋ جۇمىستارىن جۇرگىزىپ جاتىرمىز. وندا مولدوۆا رەسپۋبليكاسىنىڭ ورتالىق ازيا ەلدەرى ءۇشىن ءوزىنىڭ ديپلوماتيالىق وكىلدىگى بولادى. ءبىزدىڭ قازاقستانمەن ەجەلدەن كەلە جاتقان تاريحي بايلانىسىمىز بار. مۇندا مولداۆان دياسپوراسى بار، مولدوۆاندار رۋمىن تىلىندە سويلەيدى»، - دەدى مولدوۆا پرەمەر-ءمينيسترىنىڭ ورىنباسارى جانە سىرتقى ىستەر مينيسترلىگىنىڭ باسشىسى.
ول مولدوۆانىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن ماڭىزدى سانالاتىن قازاقستان رەسپۋبليكاسىندا ەنەرگەتيكالىق رەسۋرستاردىڭ ۇلكەن قورى بار ەكەنىنە نازار اۋداردى.
«قازاقستان رەسپۋبليكاسىنىڭ مولدوۆا ەكونوميكاسىنا - مۇناي ونىمدەرى نارىعىنىڭ وپەراتورى Rompetrol جانە ءبىزدىڭ ەلىمىزدە ءبىرقاتار قۇرىلىمدىق جوبالاردى جۇزەگە اسىرۋعا قاتىساتىن باسقا دا كومپانيالارعا تىكەلەي ينۆەستيتسيالارى بار»، - دەپ اتاپ ءوتتى ميحاي پوپشوي.
مولدوۆا سىرتقى ىستەر ءمينيسترى مولدوۆانىڭ شەتەلدەگى ديپلوماتيالىق وكىلدىكتەرىن كەڭەيتۋ پەرسپەكتيۆاسى تۋرالى ايتا كەلە، 2025-جىلى مىسىردا ەلشىلىك اشۋ ءىسىن باستاۋعا نيەتتى ەكەنىن ايتتى.
