موپەد ايداۋ ءۇشىن دە جۇرگىزۋشى كۋالىگى كەرەك - ءى ءى م
استانا. KAZINFORM – ق ر ىشكى ىستەر ءمينيسترىنىڭ ورىنباسارى يگور لەپەحا ەلىمىزدە موپەدتەر مەن ەلەكتروساموكاتتاردىڭ قوزعالىسىن رەتتەۋ پروتسەسىن جەتىلدىرۋ جوسپارىنا تۇسىنىك بەردى.
«قازىر تۇزەتۋلەردىڭ ەكىنشى پاكەتى پىسىقتالىپ جاتىر. ولار قابىلدانعاننان كەيىن، شىن مانىندە تۇبەگەيلى وزگەرىستەر بولادى. بىرىنشىدەن، قوزعالتقىش كولەمىنە قاراماستان موپەدتەردىڭ بارلىعى كولىك قۇرالى ساناتىنا جاتقىزىلىپ، ولاردى جۇرگىزۋ ءۇشىن 16 جاستان اسقاندارعا «А1» نۇسقاسىنداعى جۇرگىزۋشى كۋالىگى قاجەت بولادى. سوندىقتان وسى موپەدتەردىڭ بارلىعىن تىركەپ، ەسەپكە قويامىز. قازىر وسى كولىك تۇرلەرىن باسقاراتىندارعا ءىس جۇزىندە ەشقانداي جاۋاپكەرشىلىك جۇكتەلمەگەن»، - دەدى ي. لەپەحا سەناتتا تىلشىلەر سۇراعىنا جاۋاپ بەرە وتىرىپ.
سونىمەن قاتار، بۇل باعىتتا ەلدى مەكەن اكىمدەرىنە قوسىمشا وكىلەتتىكتەر بەرىلۋى مۇمكىن.
«بۇل تۇزەتۋلەر پاكەتىندە تاعى ءبىر وتە ماڭىزدى نورما بار. ەندى اكىمدەردە ساموكاتتارعا قاتىستى رەتتەۋ وكىلەتتىگى بولادى. ياعني ولار وزدەرىنىڭ قوسىمشا ەرەجەلەرىن بەلگىلەي الادى. بۇل تۇرعىدا اتالعان كولىكپەن قايدا وتۋگە بولاتىنىن، ولاردىڭ قوزعالىسىنا قاي ۋاقىتتا تىيىم سالۋ كەرەك ەكەنىن بەلگىلەيدى. ماسەلەن، جەكسەنبى كۇنى ساياباقتاردا سەرۋەندەپ جۇرگەن ادامدار كوبەيگەن كەزدە، پارك اۋماعىندا ساموكاتتاردىڭ قوزعالىسىنا شەكتەۋ جاساۋى مۇمكىن»، - دەدى ءمينيستردىڭ ورىنباسارى.
اۆتور
رۋسلان عابباسوۆ
