موڭعوليادا بوراندا ءىز-ءتۇزسىز جوعالعان 294 ادام قۇتقارىلدى
موڭعوليادا الاپات قارلى بوران كەزىندە جوعالعان 294 ادام امان تابىلىپ، قۇتقارىلدى. بۇل تۋرالى بەيسەنبىدە موڭعوليانىڭ توتەنشە جاعدايلار جونىندەگى باس باسقارماسىنان حابارلادى. Kazinform اگەنتتىگى بۇل تۋرالى شينحۋا اقپارات اگەنتتىگىنە سىلتەمە جاساپ حابارلايدى.
«قازىرگى كەزدە وتكەن ءتۇنى كۇشتى قارلى بوران بولعان ەلدىڭ سۋحبااتار، دورنود، حەنتيي جانە دورنوگوۆ ايماقتارىندا جوعالعان 14 ادامدى ىزدەۋ جۇمىستارى جۇرگىزىلۋدە»، - دەلىنگەن رەسمي حابارلامادا.
موڭعوليانىڭ مەتەورولوگيا جانە قورشاعان ورتاعا مونيتورينگ جۇرگىزۋ ينستيتۋتىنىڭ حابارلاۋىنشا، سارسەنبىدە ەلدىڭ شىعىس ايماقتارىندا قاتتى بوران باستالدى. جەل ەكپىنى كەي جەرلەردە 25-30 م/س دەيىن جەتكەن.
سينوپتيكتەردىڭ بولجامىنشا، الداعى كۇندەرى ەلدىڭ باسىم بولىگىندە كۇن قۇبىلمالى جانە سالقىن بولادى قار ارالاس جاڭبىر جاۋىپ، جەل ەكپىنى كۇشەيەدى.
ەسكە سالا كەتسەك، بۇعان دەيىن 6-قاراشادا موڭعوليانىڭ تۋۆ جانە ۋۆۋرگانحاي ايماقتارىندا قارلى بوران سالدارىنان سەگىز كوشپەلى مالشى قازا بولعانى تۋرالى حابارلاعان بولاتىنبىز. ولاردىڭ اراسىندا 11 جاسار بالا بار.
