موڭعوليا ستۋدەنتتەردى قار قۇرساۋىندا قالعان جاقىندارىنا جاردەمدەسۋ ءۇشىن وقۋدان بوساتتى

قازىر شارۋالارعا كومەك كورسەتۋ ءۇشىن ارنايى شتاب قۇرىلدى. قىزىل كرەست وكىلدەرى دە قول ۇشىن سوزىپ جاتىر. موڭعوليا اۋماعىنىڭ %80- ءى كەيىنگى 50 جىلدا بولماعان قالىڭ قار قۇرساۋىندا قالدى. اۋا رايىنىڭ قولايسىزدىعىنان ەڭ الدىمەن شارۋالار زارداپ شەگىپ وتىر. ويتكەنى ەل ەكونوميكاسى مال شارۋاشىلىعىنا تاۋەلدى. تۇرعىنداردىڭ %40- ءى وسى سالادا ەڭبەك ەتەدى. بىلتىرعى ستاتيستيكا بويىنشا حالىق سانى 3 ميلليون 400 مىڭ ادام بولسا، ءتورت تۇلىك سانى 65 ميلليونعا جۋىقتاعان. قالىڭ قاردان بولەك، ساقىلداعان سارى اياز دا ىرىق بەرەر ەمەس. سالدارىنان شارۋالار مالىن تەبىندەتىپ، جايا الماي وتىر. مالىمەتكە قاراعاندا، 3 ميلليون باس مال قىرىلىپ قالعان. جوعارعى وقۋ ورىندارى وتباسىلارى مال شارۋاشىلىعىمەن اينالىساتىن ستۋدەنتتەردى جاقىندارىنا جاردەمدەسۋ ءۇشىن ءبىر ايعا وقۋدان بوساتتى.

تەنگيس، ستۋدەنت:

- قازىر اۋىلدا اكە-شەشەم مەن اپكەم عانا. ولار مال وسىرۋمەن اينالىسادى. ۇشەۋىنە كومەك قاجەت. جىلقىلارىمىز جوعالىپ كەتىپتى. سولاردى ىزدەپ تابۋىم كەرەك.

نامنان تۋمۋرپۋريەۆ، عىلىم جانە تەحنولوگيا ۋنيۆەرسيتەتىنىڭ پرەزيدەنتى:

- جاقىن ماڭداعى 3 وڭىرگە بارىپ قايتتىم. جولداردىڭ كوبى جابىق تۇر. سوندىقتان شارۋالارعا كومەك تە دۇرىس جەتكىزىلمەي جاتىر. سوندىقتان ستۋدەنتتەرىمىزگە ءبىر ايعا ۇيلەرىنە قايتىپ، جاقىندارىنا جاردەمدەسۋگە مۇمكىندىك بەردىك.

جاھاندىق كليمات وزگەرىسىنىڭ زاردابى موڭعوليا تۇرعىندارى قالىڭ قار مەن ايازدان جاپا شەكسە، چيكاگو جۇرتى كەرىسىنشە بيىلعى اقپاننىڭ ەرەكشە جىلى بولعانىنا تاڭعالىپ جاتىر. ا ق ش- تىڭ بۇل قالاسىنىڭ قىسى ادەتتە سۋىق ءارى ۇزاققا سوزىلاتىن. ناۋرىزدىڭ سوڭىنا دەيىن ىزعار كەتپەيتىن. ءبىراق بيىل اۋا رايى وزگەشە. كەشە سىناپ باعاناسى 19+ گرادۋسقا دەيىن كوتەرىلگەن. بۇل - 70-جىلداردان بەرى بولماعان جاعداي. ساراپشىلار مۇنى: «كليماتتىڭ وزگەرۋىنىڭ سالدارى»، - دەيدى. جۇرت بولسا بۇعان مۇناي وندىرۋشىلەرىن كىنالاپ وتىر.

چيليدە دە قازىر كۇن ىستىق. جەرگىلىكتى عالىمدار دا مۇنى جاھاندىق جىلىنۋمەن بايلانىستىرىپ وتىر جانە ونىڭ ۇزاققا جالعاسىپ، سالدارى اۋىر بولاتىنىن ايتادى. اپتاپ ىستىقتان وسى ايدىڭ باسىندا چيليدىڭ ورتالىق اۋداندارىندا نۋ ورمان وتقا ورانىپ، 150-گە جۋىق ادام وپات بولدى. عالىمدار كليماتتىڭ وزگەرۋىنەن الداعى ۋاقىتتا وسىنداي تابيعات اپاتتارى جيىلەۋى مۇمكىن ەكەنىن ەسكەرتەدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى