مەترو ايماعىنداعى جاياۋ جۇرگىنشىلەر مەن كولىك قوزعالىسى ەرەجەسى وزگەرەدى
LRT ايماعىندا جاياۋ جۇرگىنشىلەر مەن كولىك قۇرالدارى قوزعالىسى ەرەجەلەرىنە تۇزەتۋ ەنگىزىلەدى.
بۇل تۋرالى استانا قالاسى اكىمشىلىك ىستەر باسقارماسى مالىمدەدى، دەپ حابارلايدى Kazinform.
باسقارما بەرگەن اقپاراتقا سايكەس، LRT ايماعىندا كولىك قۇرالدارى مەن جاياۋ جۇرگىنشىلەردىڭ ءجۇرىسى بويىنشا ەرەجەگە تۇزەتۋ ەنگىزىلەدى.
«ق ر زاڭناماسىنا سايكەس، استانانىڭ سىعاناق كوشەسىندە قۇرىلىس جۇمىستارى ءجۇرىپ جاتقان LRT جەرۇستى جەڭىل رەلستى كولىگىنىڭ قۇرىلىس ۋچاسكەسى جاياۋ جۇرگىنشىلەر مەن كولىك قۇرالدارىنىڭ قوزعالىسىنا تىيىم سالىناتىن قۇرىلىس وبەكتىسىنە جاتادى. بۇل وبەكتىلەردىڭ بۇكىل پەريمەترى بويىنشا قورشاۋلارى بولۋى ءتيىس. پوليتسيا دەپارتامەنتى تاپسىرىس بەرۋشى مەن مەردىگەر ۇيىم ازىرلەگەن LRT قۇرىلىسى كەزەڭىندەگى قوزعالىس سىزباسىن قاراپ، تۇرعىنداردىڭ كولىك قوزعالىسىنا قولجەتىمدىلىگىن قامتاماسىز ەتۋ ماقساتىندا وسى كوشەدە كولىك قۇرالدارى مەن جاياۋ جۇرگىنشىلەردىڭ ءجۇرۋىن شەكتەمەي، جول ءجۇرىسىنىڭ نەعۇرلىم قاۋىپسىز جاعدايلارىن جاساۋ جونىندەگى بارلىق قاجەتتى شارالاردى قامتاماسىز ەتۋدى ەسكەرە وتىرىپ، تۇزەتۋلەر ەنگىزدى. سىعاناق كوشەسىنىڭ، «ارىس» كوپىرىنىڭ ءجۇرىس بولىگىنىڭ ورتاسىندا ورنالاسقان LRT تىرەكتەرىنىڭ پەريمەترىندە، قالداياقوۆ كوشەسىندە قورشاۋلار بار. بۇل شارالار جاياۋ جۇرگىنشىلەردىڭ بەلگىلەنبەگەن جەرلەردە، ونىڭ ىشىندە تىرەك اۋدانىندا جولدان ءوتۋىن بولدىرمايدى. ال كوشەلەردىڭ قيىلىستارىندا، LRT تىرەكتەرى ورنالاسقان جەرلەردە وسى وبەكتىنىڭ جوباسى بويىنشا جۇمىستاردىڭ اياقتالماۋىنا بايلانىستى باعدارشامدىق رەتتەۋ شەكارالارىندا جولدى كەسىپ وتكەندە، قورشاۋلار مەن جول بەلگىلەرىن ورناتىپ، قاۋىپسىز قوزعالىس قامتاماسىز ەتىلدى»، - دەلىنگەن باسقارما جازباسىندا.
باسقارمانىڭ حابارلاۋىنشا، مەردىگەر ۇيىمنىڭ ۇستىنەن اكىمشىلىك ءىس قوزعالعان.
«ەنگىزىلگەن تۇزەتۋلەرگە قاراماستان، مەردىگەر ۇيىم پوليتسيا دەپارتامەنتىنىڭ قاۋىپسىزدىكتى قامتاماسىز ەتۋ، سونداي-اق اتالعان كوشەلەردەگى كولىك جۇكتەمەسىن ازايتۋ جونىندەگى ءىس-شارالارىنىڭ ءبىر بولىگىن ورىنداعان جوق. وسىعان بايلانىستى مەردىگەر ۇيىمعا قاتىستى اكىمشىلىك قۇقىق بۇزۋشىلىق تۋرالى ءىس قوزعالدى، سونداي-اق بۇرىن بەكىتىلگەن جول قوزعالىسى سحەماسىنا سايكەس جۇمىستاردىڭ ورىندالۋىن قامتاماسىز ەتۋ تۋرالى اقپارات بەرىلدى»، - دەپ مالىمدەدى باسقارمادان.
