مەتا مەن «قازاقستاننىڭ اۆتورلىق قوعامى» شارتقا قول قويدى

- وزدەرىڭىز بىلەتىندەي، وتكەن قاراشادا كوپتەگەن الەۋمەتتىك جەلى قولدانۋشىلارى وتاندىق اۆتورلاردىڭ مۋزىكاسى وسى پلاتفورمالاردان جوعالىپ كەتكەنىن بايقادى. شەكتەۋلەر اۆتورلىق قۇقىقتى ساقتاۋ قاجەتتىلىگىنەن تۋىنداعان ەدى. حالىقارالىق جانە ۇلتتىق زاڭناما اۆتورلارمەن تىكەلەي نەمەسە ولاردىڭ مۇددەلەرىن بىلدىرەتىن ۇيىمدارمەن شارتتاردىڭ بولۋىن تالاپ ەتەدى. مۇنداي كەلىسىمسىز مۋزىكانى سيفرلىق پلاتفورمالاردا پايدالانۋ مۇمكىن ەمەس جانە قازاقستان رەسپۋبليكاسىنىڭ زاڭناماسىندا كوزدەلگەن جاۋاپكەرشىلىككە اكەپ سوعادى. وسىلايشا، ليتسەنزيالىق كەلىسىمدەردىڭ قولدانىلۋ مەرزىمىنىڭ اياقتالۋى قازاقستاندىق مۋزىكالىق شىعارمالاردىڭ قولجەتىمدىلىگىن ۋاقىتشا شەكتەۋگە الىپ كەلدى، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، مادەنيەت جانە اقپارات مينيسترلىگىنىڭ قاتىسۋىمەن شەتەلدىك سەرىكتەستەرمەن جانە قازاقستاندىق ۇجىمدىق ۇيىمدارمەن مۋزىكانى قايتارۋ بويىنشا كەلىسسوزدەر جۇرگىزىلدى. ادىلەت مينيسترلىگى مەتا پلاتفورماسى مەن ۇجىمدىق قۇقىقتاردى باسقارۋ ۇيىمى اراسىنداعى بايلانىس قىزمەتىن اتقاردى.

- اتاپ ايتقاندا، ءبىز كەلىسسوزدەر جۇرگىزدىك، زاڭناما نورمالارىن تۇسىندىردىك، تەڭگەرىمدى قۇقىقتىق شەشىمگە قول جەتكىزدىك. مەتامەن بىرنەشە ونلاين كەزدەسۋ وتكىزدىك. وسى كەزدەسۋلەر بارىسىندا مەتا ديالوگقا اشىقتىق تانىتىپ، ءبىزدىڭ ۇسىنىستارىمىزعا جەدەل دەن قويدى. بۇگىن ءبىز كەلىسىمگە قول قويىلعانىن حابارلاۋعا قۋانىشتىمىز. كەلىسىمنىڭ قولدانىلۋ مەرزىمى 2 جىلدى قۇرايدى.

Instagram جانە Facebook-تە قازاقستاندىق مۋزىكانى پايدالانۋدى رەتتەيتىن مەتا جانە «قازاقستاننىڭ اۆتورلىق قوعامى» ر ق ب ۋاعدالاستىققا قول جەتكىزدى. وتكەن اپتادان باستاپ كونتەنت قايتا ورالا باستادى. مەتا كاسىبيلىك جانە سىندارلى كوزقاراس تانىتتى. كومپانيا اۆتورلىق قۇقىقتى ساقتاۋعا جانە قازاقستاندىق قۇقىق يەلەنۋشىلەردىڭ مۇددەلەرىن قۇرمەتتەۋگە دايىن ەكەندىگىن راستادى. سونىمەن قاتار، ول مەملەكەتتىك جانە كاسىبي ينستيتۋتتارمەن سەرىكتەستىك ورناتۋعا دەگەن ۇمتىلىسىن كورسەتتى، - دەدى شولپان ابدىرەيەۆا.

وسىعان دەيىن Facebook جەلىسىنىڭ اقپارات يندۋسترياسىن قولداۋعا 1 ميلليارد دوللار ينۆەستيتسيالايتىنىن جازدىق.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى