مەردىگەر كومپانيالار ءوزى سالعان جولدى 7 جىل بويى كۇتىپ ۇستاۋعا مىندەتتەلەدى
استانا. KAZINFORM - كولىك ءمينيسترى مارات قارابايەۆ ۇكىمەت وتىرىسىندا جول جوبالارىنا تارتىلعان كومپانيالاردىڭ جاۋاپكەرشىلىگىن ارتتىرۋدىڭ جاڭا ءتاسىلى ەنگىزىلەتىنىن ايتتى.
«سوڭعى جىلدارداعى جوبالاردى ىسكە اسىرۋ تاجىريبەسىن ەسكەرە وتىرىپ، مەردىگەرلەردىڭ، جوبالاۋشىلاردىڭ جاۋاپكەرشىلىگىن ارتتىرۋ ماقساتىندا وسى جوبالاردا حالىقارالىق قارجى ۇيىمدارىنىڭ قولداۋىمەن EPCM كەلىسىمشارتى جانە FIDIC قاعيداسى ەنگىزىلۋدە. ونداعى شارتتارعا سايكەس مەردىگەر كومپانيا ءوزى جوبالاپ، ءوزى سالىپ، 7 جىلعا دەيىن كۇتىپ ۇستايدى»، - دەدى ول.
ءمينيستردىڭ سوزىنشە، بۇل ءتاسىل جوبالاۋ مەن قۇرىلىس ساپاسىنىڭ تاۋەكەلدەرىن ازايتادى.
ۆەدومستۆو جوبالارعا جەرگىلىكتى كومپانيالاردى تارتۋ ءۇشىن مىنانداي شارالاردى ۇسىنىپ وتىر:
- قازاقستاندىق كومپانيالاردىڭ قاتىسۋىمەن قۇرىلعان كونسورتسيۋمدارعا جەڭىلدىك بەرۋ؛
- تەحنيكاسى قازاقستاندا شوعىرلانعان كومپانيالارعا ۇستەمدىك بەرۋ؛
- قۇرىلىس جۇمىستارىن جۇرگىزۋگە قازاقستاندىق ليتسەنزيا بولۋ شارتى؛
- بانكتىك كەپىلدەمەلەر بەرگەندە قازاقستاندىق بانكتەردىڭ قارىمتا- كەپىلدىكتەرىنىڭ بولۋى.
«ول ۇسىنىستار حالىقارالىق قارجى ينستيتۋتتارىنىڭ قولداۋىن تاۋىپ، كونكۋرستاردىڭ نەگىزگى تالابى رەتىندە بەكىتىلۋدە. بۇل دەگەنىمىز جەرگىلىكتى كومپانيالاردىڭ الەۋەتىن، تاجىريبەسىن ارتتىرىپ، الداعى ۋاقىتتا حالىقارالىق قۇرىلىس كومپانيالارىمەن باسەكەلەس بولۋعا مۇمكىندىك بەرەدى»، - دەدى مارات قارابايەۆ.
اۆتور
ەسىمجان ناقتىباي
