مەنىڭ باسىم قايدا كەتكەن؟

 تۇركىستان مەن لاتەكەڭ قاتار وتىرادى. جۇرتتىڭ ءبارى ۇيقىعا كەتكەن. لاتەكەڭنىڭ يىعىنا باسىن سالىپ، تۇكەڭ دە ۇيقىعا باسادى.

ىڭعايسىزدانعان لاتەكەڭ قولىن ءوزىنىڭ باسىنان اسىراپ، تۇركىستاننىڭ باسىن قاسي باستايدى. ەشنارسەگە تۇسىنبەگەن تۇركىستان ويانىپ كەتەدى. قاراسا، لاتەكەڭ مۇنىڭ باسىن قاسىپ جاتىر: ەكى كوزى جۇمۋلى، ۇيقىدا.

- لاتەكە! نە ىستەپ جاتىرسىز؟ - دەمەي مە ول.

سوندا حاميدي:

- باسىمدى قاسىپ جاتىرمىن، - دەيدى. تۇركىستان:

- قاسىسىڭىز ءوز باسىڭىزدى، قاسىمايسىز با؟ مەنىڭ باسىمدى نەڭىز بار؟ - دەيدى.

- قالبالاقتاعان لاتەكەڭ:

- مەنىڭ باسىم قايدا كەتكەن؟.. - دەپ اينالىسىنان ىزدەي باستاپتى.

اقىن دايىندايدى

قوجبانبەت ەلىنىڭ جىگىتتەرى الجان ەركىن ءبىتانوۆتى جەزدەسىنىپ، كەزدەسە قالعان ساتتەردە ونىمەن قاتتى قالجىڭداسىپ، وينايدى ەكەن.

بىردە قوجبانبەت ەلىنىڭ ءبىر جىگىتى ەركىنگە:

- وسى رايىمبەك اۋدانىنان شىققان اقىنداردىڭ ءبارى، ماسەلەن، ءوزىڭ مۇقاعالي، شايمەرگەن، باتىق، ايتاقىن، ءمىنۋار، حاسەن، نۇرتان... ءبارى دە الجان رۋىنان بولىپ كەلەدى. ونىڭ سەبەبىن ايتشى؟ - دەپ اقىندى سوزدەن توسىلدىرماقشى بولادى.

ەركىن اقىن مۇندايدا سوزدەن توسىلعان با؟ اياق استىنان ول بىلاي دەپ جاۋاپ قايتارىپتى:

- الجاندار اقىن دايىندايدى، ال سەن سەكىلدى قوجبانبەتتەر الجاندارعا قاتىن دايىندايدى.

ويلاپ قاراعان ادامعا مۇقاعاليدىڭ دا، ەركىننىڭ دە، باتىقتىڭ دا، ايتاقىننىڭ دا، ءمىنۋاردىڭ دا ايەلدەرى قوجبانبەت ەلىنىڭ قىزدارى بولىپ كەلەدى ەكەن.

سەنىڭ دە...

جاز بولسا ورتاسىنان اۋىپ بارادى. جانادىل قاريا بالاسىنا ءشوپ دايىنداپ الۋ جايىندا ءبىر ايتادى، ەكى ايتادى. ءبىراق مۇسا ونى ەلەي قىلماي جۇرە بەرەدى. ءبىر كۇنى قاريا ايتا-ايتا شارشاسا كەرەك، تارس جارىلدى دەرسىڭ.

- ەل-جۇرت بولسا، قوراسىن شوپكە تولتىرىپ الدى. ال، سەن بولساڭ ەكى كۇندىك دەمالىسىڭدا تۇك بىتىرمەي ءالى جۇرسىڭ. ءاي اكەڭنىڭ اۋزىن ... سەنىڭ.

وسى كەزدە اكەسىنىڭ سوزىنە شىداماعان مۇسا:

- اركىمنىڭ اكەسى وزىنە. سەنىڭ اكەڭ مەنىڭ اكەمنەن ارتىق ەمەس. سەنىڭ دە اكەڭنىڭ اۋزىن...

مۇنى بالاسىنان كۇتپەگەن جانادىل قاريا بالاسىن قۋىپ بەرەدى.

نۇرعيسانىڭ تۇلا بويى تولعان دىبىس...

«... نۇرعيسا اڭگىمە بولعاندا ءبىر جولى قانابەك بايسەيىتوۆ: «وي، ول ءيتتىڭ تۇلا بويى تولعان دىبىس قوي. ونىڭ دەنەسىنەن ءبىر ءۇزىپ الىپ لاقتىرىپ تاستاساڭ، ول ەكەش وعان دەيىن بۇلكىلدەپ ولەڭ ايتىپ جاتادى» دەگەن ەدى» دەپ جازدى كورنەكتى جازۋشى ءابدىلجاميل نۇرپەيىسوۆ «ايگىلى «قۇستار-قۇستار» ءانى قالاي تۋدى؟» اتتى ەسسەسىندە.

«الاش ايناسى» گازەتى. 2014 ج

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى