مەملەكەتتىك قىزمەتكەرلەر قاراپايىم زاڭداردى بىلمەيدى - ءاليحان بايمەنوۆ
استانا. قازاقپارات - استانا مەملەكەتتىك قىزمەت حابىنىڭ ءتوراعاسى ءاليحان بايمەنوۆ Massaget TV YouTube ارناسىنا بەرگەن سۇحباتىندا مەملەكەتتىك قىزمەتكەرلەردىڭ قاي تۇستا بىلىكتىلىگى جەتپەيتىنىن ايتتى.
ءاليحان بايمەنوۆ 2011-2014-جىلدار ارالىعىندا مەملەكەتتىك قىزمەت ىستەرى اگەنتتىگى ءتوراعاسى قىزمەتىن اتقاردى. ول اگەنتتىك ءتوراعاسى قىزمەتىندە جۇرگەن كەزىندە كەيبىر شەنەۋنىكتەر تەستتەن وتپەي قالعانىن جاسىرمادى. ماسەلەنىڭ ءبىر ۇشى بىلىكتىلىككە قاتىستى.
«اتقارۋشى بيلىك بولسىن، جالپى بيلىك تارماقتارى بولسىن ءوزىنىڭ جۇمىسىن كونستيتۋتسياعا جانە زاڭدارعا نەگىزدەپ اتقارادى. زاماناۋي مەملەكەتتەردە جازىلماعان ءبىر قاعيدات بار: ازاماتقا تىكەلەي زاڭدا تىيىم سالىنباعان بارلىق ءىس-ارەكەت رۇقسات ەتىلەدى، ال مەملەكەتكە زاڭدا بەرىلگەن وكىلەتتىلىكتەن باسقا ءىس-ارەكەت رۇقسات ەتىلمەيدى دەگەن. وسى - زاماناۋي مەملەكەتتىك باسقارۋدىڭ قاعيداسى. ەندەشە نە كەرەك؟ مىسالى ءسىز اكىم بولدىڭىز. ءسىز ازاماتتاردىڭ حاقى مەن قۇقىعىن جانە مەملەكەتتىڭ مىندەتىن ءتۇسىنۋىڭىز كەرەك، ءبىلۋىڭىز كەرەك. ونىڭ باستاۋى نەدە جاتىر؟ ونىڭ باستاۋى كونستيتۋتسيادا جاتىر. ەندەشە ءسىز كونستيتۋتسيانىڭ قاعيدالارىن ءبىلۋىڭىز كەرەك»، - دەپ ءتۇسىندىردى بايمەنوۆ.
ساياسي قايراتكەردىڭ سوزىنشە، تەستتەر كونستيتۋتسيا، جەرگىلىكتى اتقارۋشى ورگاندار، ۇكىمەت، مەملەكەتتىك باسقارۋ تۋرالى زاڭداردان قۇرالعان.
«سول كەزدە ەكى-ءۇش اۋدان اكىمىنەن ەستىدىم. «وسى كونكۋرستىڭ ارقاسىندا تۇڭعىش رەت كونستيتۋتسيانى تولىق وقىپ شىقتىم» دەگەن ەدى. ول راس، ولار كۇندەلىكتى كۇيبەڭ تىرلىكپەن ءجۇرىپ، وعان نازار اۋدارماعان شىعار. كەيبىر وبلىس اكىمدەرى «ولار شارۋاشىلىقتى جاقسى بىلەدى» دەي باستادى. ءيا، دۇرىس، شارۋاشىلىقتى ءبىلسىن. ءبىراق ول سوۆحوز ديرەكتورى ەمەس، ول زاۋىتتىڭ باسشىسى ەمەس. ونىڭ جۇمىسى - مەملەكەتتىڭ فۋنكتسياسىن اتقارۋ. ياعني ول ادامدارمەن ءتىل تابىسا ءبىلۋى كەرەك، ادامداردى ءوزىنىڭ ماڭىنا توپتاستىرا ءبىلۋى، ادامداردى ءبىر ىسكە جۇمىلدىرا ءبىلۋى كەرەك، سونىمەن قاتار، ول مەملەكەتتىڭ قولىندا بار پارمەندى پايدالانۋى كەرەك. ونىڭ قولىندا بار بيۋجەت، ونىڭ قولىندا بار وكىلەتتىلىكتەر. وسى ەكەۋىنەن جاۋاپكەرشىلىك تۋىندايدى. ەندەشە ونى پايدالانۋ ءۇشىن دە، كەز كەلگەن زاڭسىز دۇنيەگە ۇرىنىپ كەتپەۋى ءۇشىن دە زاڭدى ءبىلۋ كەرەك قوي جانە ازاماتتاردىڭ قۇقىعىن اياققا تاپتاماۋ ءۇشىن وسى ەكى ورتانى ءبىلۋى كەرەك. ول جەردە تەرەڭ سالالىق زاڭدار ەمەس، قاراپايىم زاڭدار جانە نەگىزگى قاعيدالار، ءۇش-ءتورت ۆاريانتتان تاڭداۋ بولدى، بىلاي قاراعاندا قيىن ەمەس. سونى وتە الماعان سوڭ قىسىم بولدى. ال ىرىكتەۋ تەك تەستىلەۋدەن تۇرمايدى. سەبەبى ادامنىڭ تۇلعالىق قاسيەتتەرىن، ونىڭ جۇمىستا ءوزىن قالاي كورسەتەتىنىن ءبىلۋ ءۇشىن ءتۇرلى-ءتۇرلى كوگنيتيۆتى تەستتەر دە بار، سوسىن اڭگىمەلەسۋ وتكىزىلەدى. سونىمەن قاتار، ۇسىنىم حات سۇرالادى، ونى بىلەتىن ادامدار وعان مىنەزدەمە بەرەدى جانە ەڭ باستىسى – جاريا»، - دەيدى ءاليحان بايمەنوۆ.
