مەملەكەتتىك مىندەتىن اتقارىپ ءجۇرىپ قازا تاپقانداردىڭ وتباسىنا ءبىر جىلدا باسپانا بەرىلەدى - زاڭ جوباسى

«زاڭ جوباسىندا ازاماتتاردىڭ كەيبىر ساناتتارى ءۇشىن قولدانىستاعى جەڭىلدىكتەر مەن باسىمدىقتاردى قايتا قاراۋ ەسكەرىلگەن. ماسەلەن، قولدانىستاعى زاڭناماعا سايكەس، ازاماتتاردىڭ بەلگىلى ءبىر ساناتتارىنا مەملەكەتتىك تۇرعىن ءۇي قورىنان باسپانانى مەنشىگىنە تەگىن الۋ قۇقىعى كوزدەلگەن. سونىمەن قاتار، قولدانىستاعى زاڭناما اياسىندا تۇرعىن ءۇي الۋ كەزىندە ءبىرىنشى كەزەك قۇقىعى قاراستىرىلعان. قازىر كەزەكتە 176 مىڭعا جۋىق ءبىرىنشى كەزەكتە تۇرعىن ءۇي الۋ قۇقىعى بار ازامات قامتىلعان (ۇ و س ارداگەرلەرى - 51 ادام، جەتىم بالالار جانە اتا-انا قامقورلىعىنسىز قالعان بالالار - 62,6 مىڭ ادام، كوپبالالى انالار مەن كوپبالالى وتباسىلار - 113,3 مىڭ ادام)»، - دەدى ونەركاسىپ جانە قۇرىلىس ءمينيسترى قانات شارلاپايەۆ.

ونىڭ ايتۋىنشا، قولدانىستاعى زاڭناماعا سايكەس تۇرعىن ءۇيدى ءبولۋ كەزىندە ونىڭ كوپ بولىگى ەسەپكە قويۋ كۇنىنە قاراماستان وسىنداي باسىم قۇقىعى بار ازاماتتارعا بەرىلەدى.

وسىلايشا بۇل حالىقتىڭ الەۋمەتتىك وسال توپتارىنىڭ باسقا ساناتتارى اراسىندا نارازىلىق پەن الەۋمەتتىك شيەلەنىستى تۋعىزادى.

«وسى تاۋەكەلدەردى جويۋ ماقساتىندا زاڭ جوباسىندا كورسەتىلگەن باسىمدىقتار قايتا قارالادى. ول تۇرعىن ءۇيدى ءبولۋدىڭ جاڭا تاسىلىنە بايلانىستى. بۇل پرينتسيپ حالىقتىق الەۋمەتتىك جاعىنان وسال توپتارىنىڭ بارلىق ساناتتارى اراسىندا باسپانانى ءادىل بولۋگە مۇمكىندىك بەرەدى» ، — دەدى مينيستر.

سونىمەن قاتار، زاڭ جوباسىندا ازاماتتاردىڭ تۇرعىن ءۇي جاعدايلارىن جاقسارتۋ ماقساتىندا مىناداي قوسىمشا شارالار قاراستىرىلعان.

بۇل تۇرعىدا جەتىم بالالاردىڭ؛ كوپبالالى وتباسىلاردىڭ؛ تولىق ەمەس وتباسىلاردىڭ؛ مۇگەدەكتىگى بار بالا اسىراپ وتىرعان وتباسى بالالارىنىڭ كامەلەتكە تولۋىنا نەمەسە ولاردىڭ قايتىس بولۋىنا بايلانىستى مارتەبەسى وزگەرگەن جاعدايدا ولاردىڭ كەزەكتىلىگىن ساقتاۋ ەسكەرىلگەن.

مۇنىمەن قوسا، مۇگەدەكتىگى بار بالالاردى تاربيەلەپ وتىرعان وتباسىلار ءۇشىن تۇرعىن ءۇي ءبولۋ كەزىندە قوسىمشا بولمە ءبولۋ قاراستىرىلعان.

«زاڭ جوباسىندا سونداي-اق جەرگىلىكتى اتقارۋشى ورگانداردىڭ مەملەكەتتىك نەمەسە قوعامدىق مىندەتىن اتقارۋ كەزىندە قازا تاپقان ادامداردىڭ وتباسىلارىن ءبىر جىلدان كەشىكتىرمەي تۇرعىن ۇيمەن قامتاماسىز ەتۋى ەسكەرىلگەن»، - دەدى مينيستر.

بۇل رەتتە مەملەكەتتىك مىندەتتەردى، اسكەري قىزمەتتى اتقارۋ جانە قۇقىقتىق ءتارتىپتى قورعاۋ كەزىندە، سونداي-اق ادام ءومىرىن قۇتقارۋ كەزىندە قازا تاپقان ادامداردىڭ وتباسىن ءبىر جىلدان كەشىكتىرمەي تۇرعىن ۇيمەن قامتاماسىز ەتۋ تۋرالى نورما زاڭ جوباسىنا ەنگىزىلدى.

بۇدان بۇرىن حابارلانعانداي، زاڭ جوباسى اياسىندا «وتباسى بانكى» اكسيونەرلىك قوعامى ۇلتتىق دامۋ ينستيتۋتى بولىپ قايتا قۇرىلادى.

وعان ازاماتتاردى ەسەپكە قويۋ مەن تۇرعىن ءۇي ءبولۋ جونىندەگى جەرگىلىكتى اتقارۋشى ورگانداردىڭ فۋنكتسيالارى بەرىلەدى.

باسپانا كەزەگىندە تۇرعاندارعا تۇرعىن ءۇي ەسەپكە تۇرعان كۇنىنە جانە تابىس دەڭگەيىنە بايلانىستى بەرىلەدى.

«بۇعان قوسا، ازاماتتاردى تۇرعىن ءۇي كەزەگىنە قويۋ كەزىندە نەگىزگى تالاپتاردىڭ ءبىرى - ولاردىڭ مەنشىگىندە باسپانا بولماۋى كەرەك. ءقازىر قولدانىستاعى زاڭناماعا سايكەس كەزەككە تۇرۋ ءۇشىن سوڭعى 5 جىل ىشىندە تۇرعىن ءۇيى بولماۋى قاجەت. مۇقتاج ازاماتتاردى تۇرعىن ۇيمەن قامتاماسىز ەتۋدىڭ جاڭا تاسىلدەرىنە بايلانىستى، كەزەككە جاڭادان تۇراتىن ازاماتتار ءۇشىن وسى مەرزىمدى 10 جىلعا دەيىن ۇلعايتۋ كوزدەلگەن»، - دەدى ق. شارلاپايەۆ.

ونەركاسىپ جانە قۇرىلىس ءمينيسترى باسپانا كەزەگىندەگى 646 مىڭنىڭ 232 مىڭى نەگە كەزەكتەن شىعارىلاتىنىن ءتۇسىندىردى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى