مەملەكەتتىك كەڭەسشى سىبايلاس جەمقورلىقپەن كۇرەس جونىندەگى كوميسسيانىڭ وتىرىسىن وتكىزدى
استانا. KAZINFORM - مەملەكەتتىك كەڭەسشى ەرلان قاريننىڭ توراعالىعىمەن قازاقستان رەسپۋبليكاسى پرەزيدەنتى جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ وتىرىسى ءوتتى، دەپ حابارلايدى اقوردانىڭ باسپا ءسوز قىزمەتى.
جيىندا كولەڭكەلى ەكونوميكاعا قارسى ءىس-قيمىل جونىندەگى ءىس-شارالاردىڭ 2023-2025 -جىلدارعا ارنالعان كەشەندى جوسپارىن جۇزەگە اسىرۋ بارىسى قارالدى.
وتىرىستا كەشەندى جوسپاردى جۇزەگە اسىرۋعا قاتىستى قابىلدانعان شارالار تۋرالى قارجىلىق مونيتورينگ اگەنتتىگى، جوعارى اۋديتورلىق پالاتا، ستراتەگيالىق جوسپارلاۋ جانە رەفورمالار اگەنتتىگى، قارجى مينيسترلىگى باسشىلىعىنىڭ باياندامالارى تىڭدالدى.
مەملەكەتتىك كەڭەسشى كەشەندى جوسپاردىڭ ءتيىستى تارماقتارىن ساپالى ورىنداۋدىڭ ماڭىزدىلىعىنا نازار اۋداردى. سونداي-اق كولەڭكەلى ەكونوميكاعا قارسى ءىس-قيمىل سالاسىنداعى جاڭا باعدارلامالىق قۇجاتتاردى دايىنداۋ كەزىندە تالدامالىق جۇمىستى كۇشەيتۋدىڭ وزەكتىلىگىنە توقتالدى.
كوميسسيا تالقىلاۋ قورىتىندىسىن ەسكەرە وتىرىپ، ناقتى ۇسىنىستار ازىرلەدى. مەملەكەتتىك كەڭەسشى ەرلان قارين ءبىرقاتار ناقتى تاپسىرما بەردى. تاپسىرمالاردىڭ ورىندالۋ بارىسى باقىلاۋعا الىندى.
وسىعان دەيىن جەمقورلىققا قارسى ءىس-قيمىل اگەنتتىگى 60 ادامدى ىزدەستىرىپ جاتقانى تۋرالى جازدىق.
