مەملەكەتتىك كەڭەسشى ەرلان قارين يۋنەسكونىڭ باس ديرەكتورى ودرە ازۋلەمەن كەزدەستى
قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين يۋنەسكو باس كونفەرەنسياسىنىڭ 42-سەسسياسى اياسىندا يۋنەسكونىڭ باس ديرەكتورى ودرە ازۋلەمەن كەزدەستى، دەپ حابارلايدى Kazinform اقوردانىڭ رەسمي سايتىنا سىلتەمە جاساپ.
ەرلان قارين يۋنەسكو باسشىسىنىڭ بيىلعى ماۋسىم ايىندا ەلىمىزگە رەسمي ساپارمەن كەلىپ، مەملەكەت باسشىسى قاسىم-جومارت توقايەۆپەن كەزدەسۋى ءوزارا ءتيىمدى ەكىجاقتى ىنتىماقتاستىقتى دامىتۋعا تىڭ سەرپىن بەرگەنىن اتاپ ءوتتى.
مەملەكەتتىك كەڭەسشى قازاقستاننىڭ وسى ۇيىممەن مادەني جانە تابيعي مۇرالاردى قورعاۋ سالاسىندا ىقپالداستىقتى تەرەڭدەتۋگە مۇددەلى ەكەنىن جەتكىزدى. جەر جۇزىندە كليمات وزگەرىپ جاتقان كەزەڭدە يۋنەسكونىڭ قولداۋىمەن الماتىداعى ورتالىق ازيا ايماقتىق گلياتسيولوگيالىق ورتالىعىنىڭ دايەكتى تۇردە جۇرگىزىپ وتىرعان زەرتتەۋلەرىنىڭ ءمان-ماعىناسى زور.
ەرلان قارين يۋنەسكو باسشىسىنا ۇيىمنىڭ الماتى قالاسىنداعى كلاستەرلىك كەڭسەسىنە كوپسالالى ايماقتىق كەڭسە (بيۋرو) مارتەبەسىن بەرۋ تۋرالى شەشىم قابىلداعانى ءۇشىن العىس ايتتى.
ودرە ازۋلە قازاقستانعا جاساعان ساپارىن ەرەكشە ىقىلاسپەن ەسكە الىپ، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ باستاماسىمەن ەلىمىزدە جۇرگىزىلىپ جاتقان جۇيەلى رەفورمالارعا، سونىڭ ىشىندە ءبىلىم، عىلىم جانە مادەنيەت سالاسىن دامىتۋعا باعىتتالعان ءىس-شارالارعا جوعارى باعا بەردى.
