مەملەكەتتىك ءتىل ساياساتىن ىسكە اسىرۋ جونىندەگى كوميسسيانىڭ وتىرىسى ءوتتى
استانا. KAZINFORM - ق ر پرەمەر- ءمينيسترىنىڭ ورىنباسارى تامارا دۇيسەنوۆانىڭ توراعالىعىمەن ۇكىمەت جانىنداعى مەملەكەتتىك ءتىل ساياساتىن ىسكە اسىرۋ جونىندەگى كوميسسيانىڭ وتىرىسى ءوتتى.
ۆەدومستۆونىڭ باسپا ءسوز قىزمەتى ءمالىم ەتكەندەي، ونىڭ جۇمىسىنا ق ر پارلامەنتى دەپۋتاتتارى، ورتالىق مەملەكەتتىك ورگانداردىڭ باسشىلارى، بەلگىلى قوعام قايراتكەرلەرى جانە عالىمدار قاتىستى.
كوميسسيا وتىرىسىندا قازاق ءتىلىنىڭ مەملەكەتتىك ءتىل رەتىندەگى دامۋ ماسەلەلەرى، ءتىل مادەنيەتىن ارتتىرۋ جانە تىلدىك كاپيتالدى نىعايتۋعا باعىتتالعان ۇيلەسىمدى ءارى تەڭگەرىمدى ءتىل ساياساتىن جۇرگىزۋ ماسەلەلەرى قاراستىرىلدى.
وتىرىس بارىسىندا ق ر عىلىم جانە جوعارى ءبىلىم ءمينيسترى ساياسات نۇربەك ءتىل ساياساتىن دامىتۋدىڭ 2023-2029-جىلدارعا ارنالعان تۇجىرىمداماسىنىڭ ىسكە اسىرىلۋ بارىسى جانە مەملەكەت باسشىسىنىڭ تاپسىرماسىنا وراي مەملەكەتتىك تىلدە جاساندى ينتەللەكتىنى قولدانىسقا ەنگىزۋ، قازاق ءتىلىن عىلىم ءتىلى رەتىندە دامىتۋ، تىلگە قاتىستى زاماناۋي IT جوبالاردى ازىرلەۋ باعىتىندا اتقارىلعان جۇمىستار تۋرالى باياندادى.
سونداي- اق ق ر ادىلەت ءمينيسترى ازامات ەسقارايەۆتىڭ مەملەكەتتىك تىلدە زاڭ ازىرلەۋ ماسەلەسى، حالىقارالىق «قازاق ءتىلى» قوعامىنىڭ قىزمەتى تۋرالى قوعامدىق بىرلەستىكتىڭ پرەزيدەنتى راۋان كەنجەحان ۇلىنىڭ باياندامالارى تىڭدالدى.
وتىرىس قورىتىندىسى بويىنشا كوميسسيانىڭ 2024 -جىلعا ارنالعان جۇمىس جوسپارى بەكىتىلدى. ق ر پرەمەر-ءمينيسترىنىڭ ورىنباسارى، كوميسسيا ءتوراعاسى تامارا دۇيسەنوۆا مەملەكەتتىك ءتىل ساياساتىن ءتيىمدى ىسكە اسىرۋعا باعىتتالعان ءبىرقاتار ناقتى تاپسىرما بەردى.
