مەملەكەت شىعىندى تۇگەل وتەيدى - پرەزيدەنت سۋ تاسقىنىنان كەلگەن زارداپ جايىندا

«كەزىندە ءبىر عانا بوگەننىڭ بۇزىلۋى ۇلكەن قايعىلى وقيعاعا اكەپ سوقتىرعانىن بىلەسىزدەر. مەن جاعدايدى باقىلاۋدا ۇستاۋ ءۇشىن ءبىرقاتار ايماقتا بولدىم. تۇرعىندارمەن ارنايى كەزدەستىم. ورتالىق جانە جەرگىلىكتى مەملەكەتتىك ورگاندار اپات سالدارىن جويۋعا بار كۇشىن جۇمساپ جاتىر. جاعدايدىڭ ودان ءارى ۋشىعىپ كەتپەۋى - باستى نازاردا. قۇتقارۋشىلار كۇندىز-ءتۇنى جۇمىس ىستەپ ءجۇر. ۇلتتىق ۇلان، ىشكى ىستەر مينيسترلىگى، قارۋلى كۇشتەر، ۇلتتىق قاۋىپسىزدىك كوميتەتى، مەملەكەتتىك كۇزەت قىزمەتىنىڭ جەكە قۇرامى دا بەلسەنە اتسالىسىپ جاتىر»، - دەدى پرەزيدەنت.

مەملەكەت باسشىسى ءوزىنىڭ تاپسىرماسىمەن مەملەكەتتىك ماتەريالدىق رەزەرۆتى پايدالانۋعا رۇقسات بەرىلگەنىن اتاپ ءوتتى. رەسپۋبليكالىق جانە وبلىستىق جەدەل شتابتار جۇمىس ىستەپ جاتقانىن، قوعام بەلسەندىلەرى جانە ۆولونتەرلەر گۋمانيتارلىق كومەك جيناۋدى قولعا العانىن اتاپ ءوتتى.

«حالقىمىزدىڭ ىنتىماعى مەن جوعارى ازاماتتىق جاۋاپكەرشىلىگى وسى كەزدە ايقىن كورىندى. ءبىرقاتار ايماقتار ينفراقۇرىلىمدى جانە بۇلىنگەن ۇيلەردى قالپىنا كەلتىرۋگە كىرىسىپ كەتتى. بۇل شارۋاعا ءىرى بيزنەس وكىلدەرى قوسىلدى. قوعام بەلسەندىلەرى دە زور ۇلەس قوسۋدا. ەلىمىزدەگى كومپانيالار، جەكە كاسىپكەرلەر ءتۇرلى كومەك قورلارىنا قوماقتى قارجى اۋداردى. قاراجات كۇن سايىن ءتۇسىپ جاتىر، كومەك قورى ۇلعايادى دەپ سەنەمىن. كاسىپكەرلەرگە زور العىس ايتامىن. بولاشاقتا دا حالقىمىزدىڭ يگىلىگى ءۇشىن بىرگە جۇمىس ىستەيمىز دەپ سەنەمىن»، - دەدى قاسىم-جومارت توقايەۆ.

پرەزيدەنت جينالعان قاراجات ەلدى مەكەندەردى قالپىنا كەلتىرۋگە جۇمسالاتىندىعىن ايتتى.

«سونداي-اق اپاتتىڭ كەسىرىنەن قيىن جاعدايعا تاپ بولعان ازاماتتارعا كومەك رەتىندە بەرىلەدى. ەشكىم ەلەۋسىز قالمايدى. مەملەكەت شىعىندى تۇگەل وتەيدى. تاسقىننىڭ زاردابىن جويۋ ءۇشىن بيۋدجەت شىعىستارى قىسقارتىلاتىن بولدى. مەملەكەت قارجىسىن قاتاڭ ۇنەمدەۋ رەجيمى ەنگىزىلەدى. ارينە، ماڭداي تەرمەن تىرنەكتەپ تاپقان دۇنيە-مۇلىكتى ءبىر ساتتە جوعالتۋ وڭاي ەمەس. مەن مۇنى تۇسىنەمىن. زارداپ شەككەن ازاماتتارعا تاعى دا ايتامىن: بۇكىل حالىق - سىزدەرمەن بىرگە. كوپ ۇزاماي بارشاڭىز قالىپتى ومىرگە قايتا ورالاسىزدار. ول ءۇشىن مەملەكەت ءبارىن جاسايدى»، - دەدى مەملەكەت باسشىسى.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى