مەملەكەت باسشىسىنىڭ ساپارى: قازاقستان مەن يتاليا قانداي قۇجاتتارعا قول قويدى

قول قويىلعان قۇجاتتار ءتىزىمى:

قازاقستان رەسپۋبليكاسىنىڭ ۇكىمەتى مەن يتاليا رەسپۋبليكاسىنىڭ ۇكىمەتى اراسىنداعى ەكىنشى دۇنيەجۇزىلىك سوعىس كەزىندە قازا تاپقان اسكەري قىزمەتشىلەر جەرلەنگەن ورىنداردىڭ مارتەبەسىنە قاتىستى كەلىسىم؛

قازاقستان رەسپۋبليكاسىنىڭ ادىلەت مينيسترلىگى مەن يتاليا رەسپۋبليكاسىنىڭ ادىلەت مينيسترلىگى اراسىنداعى ءوزارا تۇسىنىستىك جانە ىنتىماقتاستىق تۋرالى مەموراندۋم؛

قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن يتاليا رەسپۋبليكاسىنىڭ مادەنيەت مينيسترلىگى اراسىنداعى ءوزارا تۇسىنىستىك تۋرالى مەموراندۋم؛

قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى مەن يتاليا رەسپۋبليكاسىنىڭ ۋنيۆەرسيتەتتەر جانە زەرتتەۋلەر مينيسترلىگى اراسىنداعى ءوزارا تۇسىنىستىك تۋرالى مەموراندۋم؛

قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى مەن يتاليا رەسپۋبليكاسىنىڭ ۇلتتىق مەملەكەتتىك باسقارۋ مەكتەبى اراسىنداعى ءوزارا تۇسىنىستىك تۋرالى مەموراندۋم؛

قازاقستاننىڭ «سامۇرىق- قازىنا» قورى مەن يتاليانىڭ «Cassa Depositi i Prestiti» كومپانيالار توبى اراسىندا بىرلەسكەن ينۆەستيتسيالىق قور قۇرۋ جانە وڭدەۋ ونەركاسىبى، ەنەرگەتيكا، لوگيستيكا سالالارىنا ينۆەستيتسيا سالۋ تۋرالى كەلىسىم؛

قازاقستاننىڭ «قازمۇنايگاز» ۇلتتىق كومپانياسى مەن يتاليانىڭ «ENI» كومپانياسى اراسىنداعى جالپى قۋاتى 247 MBт بولاتىن گيبريدتى ەلەكتر ستانسياسىن (جەل ەلەكتر ستانسياسى، كۇن ەلەكتر ستانسياسى) سالۋ جونىندەگى بىرلەسكەن جوبانى جۇزەگە اسىرۋ تۋرالى بىرلەسكەن تۇپكىلىكتى ينۆەستيتسيالىق شەشىم.

ق. توقايەۆ پەن يتاليا مينيسترلەر كەڭەسىنىڭ ءتوراعاسى دجوردجا مەلوني بىرلەسكەن مالىمدەمە جاسادى.

مالىمدەمەدە كەلەسىلەر تۋرالى ايتىلعان:

2009 -جىلعى 5 -قاراشاداعى قازاقستان رەسپۋبليكاسى مەن يتاليا رەسپۋبليكاسى اراسىنداعى ستراتەگيالىق ارىپتەستىك تۋرالى كەلىسىمنىڭ ارەكەت ەتۋىن اتاپ كورسەتە وتىرىپ، ءبىز ەكى ەل اراسىنداعى بارلىق دەڭگەيدەگى سەنىمدى جانە تۇراقتى ديالوگقا كوڭىلىمىز تولاتىنىن بىلدىرەمىز. قازاقستان يتاليانىڭ ورتالىق ازياداعى نەگىزگى ەكونوميكالىق سەرىكتەسى، ال يتاليا-قازاقستاننىڭ ەۋروپالىق وداقتاعى ەڭ ءىرى ساۋدا سەرىكتەسى جانە قازاقستان ەكونوميكاسىنىڭ جەتەكشى ينۆەستورلارىنىڭ ءبىرى.

ديپلوماتيالىق قاتىناستار ورناعاننان بەرى وتىز جىلدان استام ۋاقىت ىشىندە قازاقستان مەن يتاليا بايلانىستارىن ءوزارا سەنىمگە، ورتاق قۇندىلىقتارعا جانە ءتيىمدى ىنتىماقتاستىققا نەگىزدەلگەن بەرىك سەرىكتەستىككە اينالدىرعانىن اتاپ وتەمىز.

ءبىز قازاقستان-يتاليا ىنتىماقتاستىعىنىڭ قارقىندى دامىپ كەلە جاتقانىن اتاپ وتتىك جانە ستراتەگيالىق ارىپتەستىك رۋحىندا ءوزارا مۇددەنى كوزدەيتىن بارلىق سالاداعى بايلانىستاردى ءارتاراپتاندىرۋدى جانە تەرەڭدەتۋدى جالعاستىرۋعا نيەتتىمىز.

ءبىز ەكونوميكا سالاسىندا 2023 -جىلعى 5-قىركۇيەكتە استانادا قازاقستان مەن يتاليا پرەمەر-مينيسترلەرىنىڭ ورىنباسارلارى - سىرتقى ىستەر مينيسترلەرى قول قويعان بىرلەسكەن مالىمدەمەگە سۇيەنە وتىرىپ، ساۋدا- ينۆەستيتسيالىق بايلانىستاردى ودان ءارى دامىتۋ ءۇشىن مول الەۋەت بار ەكەنىن اتاپ وتەمىز. ەنەرگەتيكا، تابيعي رەسۋرستاردى بارلاۋ جانە ءوندىرۋ، جاسىل ەكونوميكا، قۇرىلىس، ينفراقۇرىلىم، كولىك جانە لوگيستيكا، اۋىل شارۋاشىلىعى، عىلىمي- تەحنولوگيالىق قىزمەت جانە كونسالتينگتىك قىزمەت - ىنتىماقتاستىقتىڭ نەگىزگى باعىتتارى. ەكى مەملەكەت اراسىنداعى ءوزارا ءتيىمدى ىنتىماقتاستىقتى تەرەڭدەتۋدىڭ ماڭىزدىلىعىنا باسا نازار اۋدارا وتىرىپ، ءبىز ىسكەرلىك كەڭەستىڭ قۇرىلۋىن قۇپتايمىز.

قازاقستان مەن يتاليا اراسىنداعى ينۆەستيتسيالىق كليماتتى جاقسارتۋعا جانە ءوزارا ءتيىمدى ساۋدا- ەكونوميكالىق ىنتىماقتاستىقتى ودان ءارى دامىتۋعا ىقپال ەتەتىن قازاقستان رەسپۋبليكاسىنىڭ ۇكىمەتى مەن يتاليا رەسپۋبليكاسىنىڭ ۇكىمەتى اراسىنداعى ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىم جونىندەگى كەلىسسوزدەردىڭ ماڭىزدىلىعىن اتاپ وتەمىز.

سونداي- اق ءبىز قازاقستاندىق جانە يتاليالىق جەتەكشى ۋنيۆەرسيتەتتەر، اتاپ ايتقاندا، عىلىم جانە تەحنولوگيا باعىتىنا ماماندانعان ۋنيۆەرسيتەتتەر اراسىندا جوعارى ءبىلىم بەرۋ سالاسىنداعى ىنتىماقتاستىق اياسىن كەڭەيتۋدىڭ ماڭىزدىلىعىن اتاپ وتەمىز.

ءبىز مادەنيەت سالاسىنداعى ىنتىماقتاستىقتى ارتتىرۋعا نيەت بىلدىرەمىز.

2023 -جىلعى 30-قاراشادا الماتى قالاسىنداعى ورتالىق ازياداعى العاشقى يتاليا مادەني ورتالىعىنىڭ رەسمي اشىلۋىن قۇپتايمىز. بۇل ەكى ەل حالقىن جانە مادەني بايلانىستارىن جاقىنداستىرۋدىڭ تاعى ءبىر قادامى بولدى.

تاراپتار قازاقستاننىڭ ۆەنەتسيادا وتەتىن زاماناۋي ونەردىڭ 60- حالىقارالىق بيەننالەسىنە قاتىسۋى قازاقستاننىڭ مادەنيەتى مەن ونەرىن يتاليادا دا، شەتەلدە دە تانىمال ەتۋگە ىقپال ەتەتىنىن اتاپ ءوتتى.

ءبىز ەكى مەملەكەتتىڭ 2015 -جىلعى 21-جەلتوقساندا استانادا ءبىر جاقتان قازاقستان رەسپۋبليكاسى، ەكىنشى جاقتان ەۋروپالىق وداق پەن وعان مۇشە مەملەكەتتەر اراسىندا قول قويىلعان كەڭەيتىلگەن ارىپتەستىك جانە ىنتىماقتاستىق تۋرالى كەلىسىم اياسىنداعى تىعىز ىقپالداستىقتى جالعاستىرۋعا دايىن ەكەندىكتەرىن بىلدىرەمىز. وسى ورايدا ءبىز 2022 -جىلعى 27-قازاندا استانادا «ورتالىق ازيا - ەۋروپالىق وداق» ءبىرىنشى سامميتىنىڭ وتكىزىلگەنىن قۇپتايمىز.

ورتالىق ازياداعى كولىك جانە كوممۋنيكاتسيا سالاسىندا، اتاپ ايتقاندا ترانسكاسپي حالىقارالىق كولىك باعىتىن دامىتۋعا قاتىستى ءىرى باستامالاردىڭ ىسكە قوسىلۋىنا ءبىزدىڭ كوڭىلىمىز تولاتىنىن اتاپ وتەمىز. ەۋروپالىق وداقتىڭ «Global Gateway» جوباسىن ىسكە اسىرۋعا قولداۋ بىلدىرەمىز.

ەكى ەلدىڭ ەۋروپالىق وداق پەن ورتالىق ازيا اراسىنداعى ىنتىماقتاستىق ءۇشىن بەرىك جانە پەرسپەكتيۆالىق نەگىز قۇرۋعا، ورتالىق ازياداعى وڭىرلىك ديالوگتى نىعايتۋعا دەگەن ۇمتىلىسىن قۋاتتايمىز. بۇل - وركەندەۋگە، تۇراقتىلىق پەن ورنىقتى دامۋعا قول جەتكىزۋدىڭ باستى شارتى. ءبىز «و ا+يتاليا» فورماتىنداعى كەزدەسۋدى 2024 -جىلى ريمدە، ال 2025 -جىلى قازاقستاندا وتكىزۋدىڭ ماڭىزدىلىعىن اتاپ وتەمىز.

يتاليا رەسپۋبليكاسى مينيسترلەر كەڭەسىنىڭ ءتوراعاسى ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋلەرىنىڭ ىنتىماقتاستىقتى ودان ءارى ورىستەتۋ، بەيبىتشىلىكتى نىعايتۋ، ورتالىق ازيا ايماعىنداعى دوستىق، سەنىم جانە تاتۋ كورشىلىك اتموسفەرانى قالىپتاستىرۋ، سونداي- اق ولاردىڭ حالىقارالىق ارەناداعى ماڭىزىن ارتتىرۋ جولىنداعى ءرولىن جوعارى باعالايدى.

يتاليا مينيسترلەر كەڭەسىنىڭ ءتوراعاسى كليماتتىق كۇن ءتارتىبىن ودان ءارى ىلگەرىلەتۋ اياسىندا قازاقستان رەسپۋبليكاسىنىڭ ءتيىستى باستامالارىن جوعارى باعالايدى، سونىمەن قاتار الماتى قالاسىندا قورشاعان ورتانى قورعاۋ جانە كليماتتىڭ وزگەرۋى جونىندەگى ورتالىق ازيا ەلدەرىنىڭ جوبالىق كەڭسەسىن قۇرۋ، 2026 -جىلى قازاقستاندا بىرىككەن ۇلتتار ۇيىمى اياسىندا ايماقتىق كليماتتىق سامميت وتكىزۋ جونىندەگى ۇسىنىستاردى ەسكەرەدى.

ەكى ەلدىڭ ءوزارا قۇرمەت قاعيداتى نەگىزىندە ءوزارا ىقپالداستىعىن نىعايتۋدى قۇپتايمىز. قاتار ءومىر ءسۇرۋ مەن ىنتىماقتاستىقتىڭ ورتاق نەگىزى رەتىندە بۇۇ جارعىسىنا تولىق قۇرمەتپەن قارايتىنىمىزدى، سونداي- اق جاھاندىق جانە ايماقتىق دەڭگەيدە بەيبىتشىلىكتى، قاۋىپسىزدىك پەن تۇراقتىلىقتى ىلگەرىلەتۋگە جانە حالىقارالىق كوشى-قون ماسەلەلەرى بويىنشا ديالوگتى ودان ءارى ىلگەرىلەتۋگە، سونىڭ ىشىندە الماتى پروتسەسى جانە بىرىككەن ۇلتتار ۇيىمى سياقتى كوپجاقتى فورۋمدار اياسىندا ەكىجاقتى ىنتىماقتاستىقتى نىعايتۋعا دەگەن ءوزارا ۇمتىلىسىمىزدى قۋاتتايمىز.

كليماتتىق كۇن ءتارتىبىنىڭ وزەكتىلىگى اياسىندا ءبىز 2023 -جىلى دۋباي قالاسىندا وتكەن كليمات جونىندەگى دۇنيەجۇزىلىك كونفەرەنتسياسىندا (COP28) كليماتتىڭ وزگەرۋىنە قارسى كۇرەستە ءوزىمىزدىڭ بەرىك ۇستانىمدارىمىزدى قۋاتتادىق جانە جاھاندىق جىلۋ دەڭگەيىن 1,5°°- تا ۇستاۋ جونىندەگى ماقساتتى راستاۋدى قۇپتايمىز.

قازاقستان رەسپۋبليكاسىنىڭ پرەزيدەنتى يتاليا رەسپۋبليكاسىنىڭ مينيسترلەر كەڭەسىنىڭ ءتوراعاسىنا «ۇلكەن جەتىلىكتە» تابىستى ءتوراعالىق ەتۋىنە تىلەكتەستىگىن ءبىلدىردى.

قازاقستان رەسپۋبليكاسىنىڭ پرەزيدەنتى يتاليا رەسپۋبليكاسى مينيسترلەر كەڭەسىنىڭ ءتوراعاسىن جاقىن ارادا قازاقستانعا ساپارمەن كەلۋگە شاقىردى.

ەسكە سالايىق، ق. توقايەۆ 18-قاڭتار كۇنى رەسمي ساپارمەن يتالياعا بارعان بولاتىن.

مەملەكەت باسشىسىنىڭ يتالياعا رەسمي ساپارى پرەزيدەنت سەردجو ماتتارەللامەن كەزدەسۋدەن باستالدى.

قاسىم-جومارت توقايەۆ شەتەلدىك ينۆەستورلار ءۇشىن ەل ەكونوميكاسىنىڭ اناعۇرلىم تارتىمدى جانە پەرسپەكتيۆتى سالالارى، ونىڭ ىشىندە «جاسىل» ەنەرگەتيكا تۋرالى ەگجەي- تەگجەيلى مالىمەت بەردى.

كەيىن ق ر پرەزيدەنتى «كيدجي» سارايىندا يتاليانىڭ مينيسترلەر كەڭەسىنىڭ ءتوراعاسى دجوردجا مەلونيمەن كەلىسسوز جۇرگىزدى. كەلىسسوز اياسىندا ءبىرقاتار قۇجاتقا قول قويىلدى.

ايتا كەتەيىك، 19-قاڭتاردا قاسىم- جومارت توقايەۆ ۆاتيكان مەملەكەتىنە رەسمي ساپارمەن بارىپ، ريم پاپاسى فرانسيسكپەن كەزدەسۋ وتكىزەدى.

اۆتور

گۇلميرا الياكپاروۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى