مەملەكەت باسشىسى تالدىقورعانداعى ۇستەل تەننيسى ورتالىعىن ارالاپ كوردى
تالدىقورعان. KAZINFORM - قاسىم-جومارت توقايەۆ «جەتىسۋ- قولداۋ» قوعامدىق قورىنىڭ دەمەۋشىلىگىمەن سالىنعان ۇستەل تەننيسى ورتالىعىمەن تانىستى.
حالىقارالىق ستاندارتتارعا ساي، زاماناۋي قۇرالدارمەن جابدىقتالعان عيماراتتا ۇستەل تەننيسى ويىندارى جانە سپورتتىق تۋريزمگە مامانداندىرىلعان بالالار مەن جاسوسپىرىمدەردىڭ سپورت مەكتەبى ورنالاسقان.
مەكتەپ ديرەكتورى مەرەي ءسۇيىنوۆتىڭ ايتۋىنشا، قازىر مۇندا 600-دەن استام وقۋشى تەننيستەن بولەك، توعىزقۇمالاق، دويبى، شاحمات، قول كۇرەسى جانە سپورتتىق تۋريزم سەكتسيالارىنا قاتىسادى. ولاردىڭ اراسىندا 33 سپورت شەبەرىنە ۇمىتكەر، 41 ءبىرىنشى رازريادتى سپورتشى بار.
پرەزيدەنتكە جەتىسۋ وبلىسىنداعى سپورت ينفراقۇرىلىمىنىڭ دامۋى جونىندە مالىمەت بەرىلدى. اتاپ ايتقاندا، قازىر الاكول اۋدانىنىڭ لەپسى اۋىلىندا جانە تەكەلى قالاسىندا دەنە شىنىقتىرۋ كەشەندەرى، پانفيلوۆ جانە سارقان اۋداندارىندا سپورت كەشەندەرى سالىنىپ، تالدىقورعانداعى ورتالىق ستاديونعا كۇردەلى جوندەۋ جۇرگىزىلىپ جاتىر. سونىمەن قاتار شاعىن اۋىلداردا بۇقارالىق سپورتتى دامىتۋ ءۇشىن مودۋلدىك كەشەندەر سالۋ قولعا الىندى.
بۇعان دەيىن توقايەۆ «جەتىسۋ» ۆولەيبول كلۋبىنىڭ جاي-كۇيىمەن تانىستى.
اينۇر تۋماكبايەۆا
اۆتور
