مەملەكەت باسشىسى «تالدىقورعان» يندۋستريالىق ايماعىنا باردى

قۇنى 8,5 ميلليارد تەڭگەنى قۇرايتىن جوبا بىلتىر قولعا الىنىپ، الدىمەن عيماراتى جاڭارتىلعان. بيۋجەت قاراجاتىنا ەلەكتر جابدىقتارى ورناتىلىپ، كارىز جانە گازداندىرۋ جەلىلەرى تارتىلعان. اۋماعى 14,3 گەكتار بولاتىن زاۋىت بيىلعى 6-جەلتوقسان كۇنى ىسكە قوسىلدى.

پرەزيدەنتكە ءوندىرىس ورنىن تانىستىرعان «ASMA INDUSTRIAL» ج ش س قۇرىلتايشىسى ءارى زاۋىت ديرەكتورى سەرىكباي اجماعامبەتوۆتىڭ ايتۋىنشا، مۇندا مۇناي-گاز، تاۋ-كەن ونەركاسىبىندە، تەلەكوممۋنيكاتسيادا، تەمىرجول سالاسىندا، سونداي-اق «جاسىل» ەنەرگەتيكادا ۇزدىكسىز ەنەرگيا كوزى رەتىندە قولدانىلاتىن وندىرىستىك اككۋمۋلياتور باتارەيالارى شىعارىلادى.

مەملەكەت باسشىسىنا باياندالعان مالىمەتتەرگە سايكەس، زاۋىت تولىق قۋاتىنا شىققاندا 180 جۇمىس ورنى قۇرىلىپ، جىلىنا 210 مىڭ اككۋمۋلياتور وندىرەدى. دايىندالعان ءونىمنىڭ 60 پايىزىن ت م د جانە بالتىق ەلدەرىنە ەكسپورتتاپ، قالعان 40 پايىزىن وتاندىق نارىقتا ساتۋدى جوسپارلاپ وتىر. سونداي-اق ىسكە قوسىلعان العاشقى جىلى بيۋجەتكە 500 ميلليون تەڭگەدەن استام سالىق تولەيدى.

زاۋىتقا قاجەتتى شيكىزاتتىڭ باسىم بولىگى قازاقستان كاسىپورىندارىنان ساتىپ الىنادى. اتاپ ايتقاندا، «كازتسينك» ج ش س- تەن قورعاسىن، «قازاتومونەركاسىپ» ۇ ك» ا ق- دان كۇكىرت قىشقىلىن السا، سەپاراتور مەن پوليپروپيلەندى قىتايدان يمپورتتايدى.

قاسىم-جومارت توقايەۆ كاسىپورىن جۇمىسشىلارىمەن اڭگىمەلەسىپ، ەلىمىزدەگى ءوندىرىستىڭ ءرولى تۋرالى ايتتى.

- مەملەكەت مىقتى بولسىن دەسەك، ەڭ الدىمەن، وڭىرلەرىمىز قۋاتتى بولۋى كەرەك. ءوندىرىسى دامىعان ەلگە اينالۋ ءۇشىن وسى سالاعا كوڭىل ءبولىپ وتىرمىز. ستراتەگيالىق ماڭىزى بار جەتىسۋ وبلىسىنا ەرەكشە نازار اۋدارامىز، - دەدى پرەزيدەنت.

بۇدان كەيىن مەملەكەت باسشىسى وبلىستاعى كاسىپورىنداردىڭ جەتەكشىلەرىمەن كەزدەسىپ، پىكىر الماستى. سونداي-اق وتاندىق بيزنەستى قولداۋ مەملەكەتتىك ساياساتتىڭ نەگىزگى باعىتى ەكەنىن جەتكىزدى.

وسىعان دەيىن قاسىم-جومارت توقايەۆتىڭ جەتىسۋ وبلىسىنا بارعانىن جازدىق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى