مەملەكەت باسشىسى قىتاي حالىق رەسپۋبليكاسىنىڭ قازاقستانداعى ەلشىسى جاڭ شياۋدى قابىلدادى
استانا. KAZINFORM - اڭگىمەلەسۋ بارىسىندا پرەزيدەنت قازاقستان مەن قىتايدى عاسىرلارعا ۇلاسقان بەرىك دوستىق پەن تاتۋ كورشىلىك قاتىناستار بايلانىستىراتىنىن اتاپ ءوتتى. قاسىم-جومارت توقايەۆتىڭ پىكىرىنشە، ءوزارا سەنىم مەن قۇرمەتكە نەگىزدەلگەن ءتيىمدى ىنتىماقتاستىقتىڭ نىعايۋىنا ەكى تاراپ تا ۇلەس قوسىپ كەلەدى.
مەملەكەت باسشىسى بۇگىندە قازاقستان مەن قىتايدىڭ ىقپالداستىعى قارقىندى ءارى سان قىرلى سيپات العانىن ايتتى. ەكى ەل اراسىندا بەلسەندى ساياسي ديالوگ قالىپتاستى، ساۋدا-ەكونوميكالىق ارىپتەستىك وركەندەدى، مادەني بايلانىستار جانداندى جانە ءبىلىم بەرۋ باعدارلامالارى مەن عىلىمي جوبالاردىڭ سانى ارتتى. قاۋىپسىزدىك سالاسىندا، اسىرەسە، «ءۇش زۇلىم كۇشكە» قارسى كۇرەس باعىتىندا تىعىز ىنتىماقتاستىق ورناعان. بۇدان بولەك، ەلدەرىمىزدىڭ ب ۇ ۇ، ش ى ۇ، ا و س ش ك اياسىنداعى، سونداي-اق «ورتالىق ازيا - قىتاي» فورماتىنداعى حالىقارالىق بايلانىستارى بەلسەندى ءوربىپ كەلەدى. پرەزيدەنتتىڭ ايتۋىنشا، قازاقستان مەن قىتاي تاتۋ كورشىلىك قارىم-قاتىناستىڭ ناعىز ۇلگىسىن كورسەتىپ وتىر.
ءوز كەزەگىندە قىتاي ەلشىسى جاڭ شياۋ قاسىم-جومارت توقايەۆقا العىس ايتىپ، بەيجىڭنىڭ جان-جاقتى ستراتەگيالىق سەرىكتەستىكتى ودان ءارى دامىتۋعا بەيىل ەكەنىن راستادى.
مەملەكەت باسشىسى جاڭ شياۋدىڭ قازاق- قىتاي دوستىعىن تابىستى دامىتۋعا، مەملەكەتارالىق بايلانىستاردى تەرەڭدەتۋگە قوسقان ۇلەسىن جوعارى باعالاپ، II دارەجەلى «دوستىق» وردەنىمەن ماراپاتتادى.
اۆتور
اسحات رايقۇل
